Bezimamatheka izimakethe zemali kuleli sonto
Impelasonto eyedlule kubukeka ibe nengcindezi phezu kwerandi, kwalenza labhekana nenselelo emakethe yezimali ekuqaleni kwesonto.
Kuthe ngokuqhubeka kwezinsuku zavuleka izinto lasombuluka irandi lathi ukudlondlobala. Kube njengephupho phakathi nesonto ukubona irandi lifinyelela ezingeni elagcina ukuba kulo ngaphambi kwemvalelwakhaya esezingeni lesihlanu. Singeke sakuqinisekisa ukuthi ukusimama kwerandi kuhlangene yini nombiko wakwaStats SA wesigamu sesithathu sonyaka ophezulu. Asizukugxila kulo mbiko okwamanje.
NgoMsombuluko ziyisi-7 kuZibandlela 2020
■ Kuvule izimakethe ngoMsombuluko idola lase-USA lilingana namarandi ali15,22. Lokhu bekuveza isithombe sokuthi bekunzima ngempelasonto ngoba liphele kukuhle isonto eledlule, kwakuvulwe ezimakethe irandi lisimama lilingana namarandi ali-15,16 uma liqhathaniswa nedola lase-USA ngoLwesihlanu ekuseni.
■ Ngempelasonto irandi lalahlekelwa ngamasenti amathathu uma liqhathaniswa noPondo waseBritain, kwavula izimakethe ngoMsombuluko ekuseni kudingeka ahlangane amarandi abe ngama-20,43 ukuze akwazi ukulingana noPondo waseBritain owodwa.
■ Kuvule izimakethe ngoMsombuluko iYuro lisina lizibethela erandini, kuphoqa ukuba amarandi ahlangane aze abe yi-18,47 ukuze abe namandla alingana neYuro elilodwa. Ngempelasonto irandi lalahlekelwa ngamasenti ayisihlanu licindezele iYuro.
■ Kusiqunga isibindi ukuba siqale isonto intengo yegolide isalokhu ingaphezulu kwe-1 800 yamadola ase-USA. Ngendlela ebeyehla yenyuka ngayo intengo yegolide bekungathi kuyokube kuvalwe amehlo kuleli sonto. Kuvule izimakethe i-awunsi legolide libiza amadola ase-USA ayi-1 837, okuveza ukuthi yehlile kancane lapho yayikhona ngoLwesihlanu.
■ Intengo kawoyela ongahluziwe iphambane nehlombe ngoba kuzo zonke eziyisihlanu izinkomba esijwayele ukuzisebenzisa ezimakethe zemali, yiyo yodwa ekhombise ukuvuna iNingizimu Afrika. Sivuke ngoMsombuluko intengo kawoyela ongahluziwe yehlile kancane yaba ngamadola ase-USA angama-49,03.
NgoLwesibili ziyisi-8 kuZibandlela 2020
■ Lithole amandla irandi ebusuku bangoMsombuluko kwavula izimakethe likhombisa ukusimama uma liqhathaniswa nedola lase-USA. Idola lase-USA belilingana namarandi ali-15,15 ekuseni ngoLwesibili.
■ Ekuseni ngoLwesibili uPondo waseBritain ulahlekelwe ngamasenti angaphezulu kwamashumi amabili ngenxa zokusimama kwerandi. Kuvule izimakethe ngoLwesibili uPondo waseBritain ulingana namarandi angama-20,22.
■ Kubuyise ithemba ukubona irandi liphinde lisimama ngokushesha kulokho ebeliyikho ngayizolo. NgoLwesibili ekuseni iYuro elilodwa belilingana namarandi ali18,34 ngenkathi kuvula izimakethe zemali.
NgoLwesithathu ziyisi-9 kuZibandlela 2020
■ Ngokokuqala emveni kwesikhathi eside kubonakale into eyagcina ngaphambi kwemvalelwakhaya lapho idola laseUSA lalingenawo amandla angaphezu kwamarandi ali-15. Kuvule izimakethe ngoLwesithathu kudingeka amarandi ahlangane abe yi-14,94 ukuze amandla awo alingane nedola lase-USA elilodwa.
■ Kuvukwe lesese irandi emva kokweqa omunye wemigoqo libhekene noPondo waseBritain. Ekuseni ngoLwesithathu uPondo waseBritain bewulingana namarandi ali-19,95 ezimakethe zemali.
■ Kuyacaca ukuthi irandi belinqathuza lishaya konke okusondelayo ezimakethe zemali, ebusuku bangoLwesibili. Kuvukwe ngoLwesithathu iYuro lilingana namarandi ali-18,08 ekuseni okuyizinga osekukudala lagcina ukuba kulo irandi.
NgoLwesine zili-10 kuZibandlela 2020
■ Liqhubeke lapho ligcine khona irandi libhekene nedola lase-USA lisimama. Kuvule izimakethe idola lase-USA lilingana namarandi ali-14,93 ekuseni ngoLwesine.
■ Akulula ukuvuma ukuphunyukwa wumuzwa omnandi. Lokhu sikubone ngokuthi irandi lingavumi ukuphunyuka ezingeni elibekeke kulo ngayizolo, lazabalaza kwaphunyuka isenti elilodwa vo ebusuku. Kuvukwe ekuseni uPondo waseBritain ulingana namarandi ali-19,96.
■ Kuvule izimakethe ngoLwesine ekuseni iYuro lithwele kanzima uma liqhathaniswa nerandi. iYuro elilodwa kuvule izimakethe lilingana namarandi ayi-18,06, okukhombisa ukuthi irandi liqhubekile labuyisa amasenti amabili kuYuro.
■ NgoLwesine ekuseni intengo yegolide beyimi kumadola ase-USA ayi-1 840. Noma beyenyuka iphinde yehle ezinsukwini ezedlule, kuyathokozisa ukuthi ikhombisa ukuzinza kuleli zinga ekulo.
■ Intengo kawoyela ongahluziwe ilimise kabi elakuleli ngoba sivuke ngoLwesine umphongolo kawoyela ongahluziwe ubiza amadola ase-USA angama-49,13. Uma kuqhubeka kanje, kubukeka kungelula ukuvika ukwenyuka kwentengo kadizili nophethroli ekuqaleni konyaka ozayo.