Belula isandla abezemidlalo, kuyancomeka
Ngaphandle kokuthi ukhuvethe ludlule nemiphefumulo eminingi ezweni okuze kube imanje lokho kusenzeka kodwa luphinde lwehlisa umnotho emhlabeni jikelele.
Ukusabalala kwalesi sifo kwaholela ekutheni kume izinto eziningi. Ukuvaleka kwezinto kwakhalisa ngisho abadla izambane likapondo, kungaphezulu-ke kwabadla imbuya ngothi.
Kodwa abadlali beminxa yemidlalo ehlukahlukene kuleli babengonkulunkulu basemhlabeni kubantu abaningi njengoba bekwazile nakuba isimo sinzima ukuxhasa ngokuthize emiphakathini eswele.
Abanye balabo badlali ngukaputeni weqembu eligijima kuDStv Premiership i-AmaZulu FC uSiyabonga “Nqaba” Mbatha, owanikela ngokudla emalungwini omphakathi waKwaMashu angama-25.
UMthiya (abakwaMbatha) ngesikhathi ekhuluma nelaboHlanga wathi: “Isikhathi esinzima lesi kuthina sonke. Kodwa izimo zethu zasemakhaya azifani, ingakho sithe ake sizame ukuthi selule isandla emindenini eswele kakhulu. Ngazi kahle ukuthi lokhu engikwenzile ngikwenzele imindeni emincane kodwa ngiyathemba ukuthi uNkulunkulu uzongipha amandla ngandise isibalo salabo abazozuza.”
UMbatha wenza lokhu ngaphansi kwenhlangano yakhe engenzi inzuzo iSiyabonga Qhamukile Foundation.
Abanye abadlali abelule isandla esikhathini esinzima sokhuvethe ezindaweni abakhulela kuzo uBongani Khumalo oyisitobha seSuperSport United.
UKhumalo wanikela ngomholo wakhe wonke emindenini engama-300 yasePretoria kanye naseSwatini lapho kudabuka khona uyise. Ngokusho kwakhe, wathi akenzi ngoba efuna ukuthandwa kodwa wenzela ukusiza abaswele ngoba uyakwazi ukuthi kunjani ukungabi nalutho.
No-Aubrey Modiba weMamelodi Sundowns ngokubambisana noGrant Kekana ogijima kuSuperSport United, banikele ngokudla kanye nezimfonyo emphakathini waseMetz ngaphandle kwasePolokwane.
USiphiwe “Shabba” Tshabalala owaduma kuFree State Stars nakuKaizer Chiefs kodwa osedlala ku-AmaZulu FC kanye nenkosikazi yakhe uBokang Motjane, banikelele abaswele ngokudla.
U-Ayanda Patosi ngokubambisana noMark Mayambela abake badlalela iCape Town City nabo banikelile eKhayelitsha, eCape Town.
Ukaputeni weqembu lesizwe lombhoxo lakuleli amaBhokobhoko, uSiya Kolisi, ongumdlali wamaStormers kanye noFaf du Plessis ongumdlali weProteas banikela emphakathini waseBonteheuwel ngokubambisana nabakwaFood Lovers’ Market group.
Iqembu leHockey elibizwa nge-INK Hockey lanikela kubadlali balo. Kusizwe abadlali abangama-20 abadlala kuleli qembu.
UNathi Ngubane ongumnikazi weINK Hockey ekhuluma nelaboHlanga wathi:“Sinabadlali abaningi abaphuma emindenini ehlukahlukene. Ingakho sithathe isinqumo sokubheka imindeni ethize njengoba sazi ukuthi isimo sibi ngenxa yokhuvethe. Sibonga abaxhasi bethu iMaria and Robert kanye neZero2Five okuyinhlangano ezimele ukuthi sikwazi ukutholela le mindeni ukudla,”
Neqembu lekhilikithi amaProteas lanikela emiphakathini eyahlukene ngokudla okulinganiselwa emalini eyizinkulungwane ezingama-R300.