Ezemidlalo ziphumele obala kuliwa nokucwasana
Le nkinga idla lubi emhlabeni wonke ngisho nalapha eNingizimu Afrika kukhalwa ngayo
Unyaka wezi-2020 ube unyaka okugqame kakhulu ukulwa nokucwasana ngokwebala emhlabeni wonke jikelele. Okuyikho okwaba umsusa wokulwa nokucwasana, ividiyo eyasabalala ezinkundleni zokuxhumana kaGeorge Floyd, odabuka e-USA.
Kwabe sekuqala isiqubulo esithi “Black Lives Matter” (BLM) abaningi abakhombisa ukusiseka, ikakhulukazi laba abaqhamuka engxenyeni yezemidlalo.
ULewis Hamilton ongumshayeli wezimoto zeFormula One (F1) ungomunye wabantu abakhombise ukuseseka kakhulu lesi siqubulo.
Ayisalanga ngaphandle intokazi esencane, egila izimanga kwezomphebezo uNaomi Osaka.
Kuyo yonke imiqhudelwano yeGrand Slam, u-Osaka oneminyaka yobudala engama-23 odabuka eJapan, ubegqoka izimfonyo ezibhalwe amagama abantu boHlanga ababulawa ngokucwaswa ngokwebala. Lawo magama elikaBreonna Taylor, u-Elijah McClain, u-Ahmaud Arbery, uTrayvon Martin, uGeorge Floyd, uPhilando Castile noTamir Rice.
Enye yezintatheli yahloma umbuzo u-Osaka emva kokunqoba owamanqamu e-US Open.
“Udlale imidlalo eyisi-7, wagqoka izimfonyo ezahlukene ezinamagama abantu. Imuphi umyalezo owawuthumelela abantu noma owawuqonde ukuwedlulisa?” kubuza le ntatheli.
U-Osaka waphendula wathi: “Lo myalezo uwutholile. Bengifuna ukwenza abantu baqale ukukhuluma.”
NgoNcwaba u-Osaka wajoyina ibutho labezemidlalo ezingeni lo mhlaba wabhala isitatimende sokuthi ngeke awudlale umdlalo owandulela owamanqamu weWestern & Southern emva kokudutshulwa kukaJacob Blake. Lesi senzo senzeka eKenosha, eWisconsin.
Abaphathi bomqhudelwano kwaphoqa ukuthi bamise wonke umqhudelwano, waze waqhubeka ukudlala emva kwezinsuku ezimbili le ntokazi yabe isiqhubeka nawo.
“Ngaphambi kokuthi ngibe umdlali, ngingowesifazane woHlanga. Njengowesifazane woHlanga ngibona sengathi kunezinto ezibaluleke kakhulu eziseduze ezidinga ukunakwa ngokushesha, kunokuthi kubukwe mina ngidlala umphebezo. Ukudlula kwaboHlanga emhlabeni kungenza ngingabi sesimweni esihle sempilo. Kuyophela nini ukuhlukunyezwa kwaboHlanga?” kubhala u-Osaka ekhasini lakhe leTwitter.
U-Osaka ngoMasingana wezi-2019 wakleliswa njengohamba phambili emhlabeni. Usenqobe imiqhudelwano yeGrand Slam kathathu.
Ngonyaka wezi-2018 wanqoba i-US Open nalapho ahlula khona uSerena Williams, ngowezi-2019 wanqoba i-Australian Open ehlula uPetro Kuitova.
Kulo nyaka uphinde wanqoba i-US Open ngesikhathi edlisela ogageni uVictoria Azarenka.
Maphakathi nesonto udaba lokucwasa lube sematheni ngesikhathi kutholene phezulu iqembu laseFrance iParis SaintGermain (PSG) neqembu laseTurkey i-Istanbul Basaksehir.
Umsindo ususwe isekela nompempe uSebastian Coltescu elikhombise ukucwasa isekela lo mqeqeshi weIstanbul uPierre Webo ongowokudabuka lapha e-Afrika eCameroon ethi: “Negro” okuyigama elisho ubumnyama.
Abadlali kanye namaqembu amusekile uWebo, bekhombisa ukungasifuni isenzo sikaColtescu.
Bephawule ezinkundleni zokuxhumana kanje: @KMbappe “Phansi ngokucwasana. M.Webo sikanye nawe” @MutiuAdepoju8 “Sonke ngokuhlanganyela singabeka unobhutshuzwayo ezingeni eliphezulu. Kodwa kumele silwe nokuhlukunyezwa” @Fenerbahce_EN “Sinawe sokuseka kukhona konke”.