KWEZINYE IZINGXENYE
EGermany:
Umshayi womthetho eqenjini likaNdunankulu waleli lizwe u-Angela Merkel uthe ngoMsombuluko uzoshiya ePhalamende ngokushesha ngemuva kokuthola inkokhelo yezivumelwano zokuthengwa kwemaski yobuso kubaphathi baleli lizwe. Leli hlazo lisengcupheni yokwandisa ukungajabuli kwabavoti ngemuva kokuba umfelandawonye obusayo weqembu likaMerkel iChristian Democrats (CDU) kanye neqembu iSocial Democrats (SPD) bethole ukugxekwa okukhulu ngokuhamba kancane komkhankaso wokugomela ukhuvethe. UNikolas Loebel uthole ukugxekwa okukhulu ngesonto eledlule ngemuva kokuthi uzosula kuCDU kepha aqhubeke abe nesihlalo endlini yePhalamende iBundestag kuze kufike ukhetho lukazwelonke ngoMandulo.
ESpain:
UHulumeni waleli lizwe ngeledlule uvimbe amamashi agubha usuku lomhlaba wonke lwabesifazane lwango mhla ziyisi-8 edolobheni iMadrid, uphinde waphakamisa ukuthi kubekwe imikhawulo yokuhamba ukuze kuvinjwe noma kunqandwe ukubhebhetheka kokhuvethe ngamaholidi ePhasika. Amamashi angonyaka odlule, ayehanjelwe amashumi ezinkulungwane zabantu ayegqugquzelwa uHulumeni wobumbano lophiko lwesobunxele, kwaphakamisa ukuphikisana okuningi kokuthi ngabe le micimbi iyona yini eyasabalalisa ukhuvethe kakhulu. “Inkinga isibalo sesixuku esingakhula ngamahora ambalwa ezindaweni ezimbalwa,” kusho omele uHulumeni omkhulu esifundeni ngesikhathi ekhuluma esithangamini sabezindaba. UJose Manuel Franco uthe amamashi ahlongozwayo awosuku lwango mhla ziyisi-7 naziyisi-8 abezoletha cishe abantu abayizi-60 000 emigwaqeni yenhlokodolobha. Uxwayisa futhi ngokuthi imigubho yesonto lePhasika nayo ingadala ukuphakama kwezibalo zabanokhuvethe, uMnyango Wezempilo uphakamise ukuvinjelwa kokuhamba phakathi kwezifunda ezahlukahlukene nokukhawulela imicimbi yomphakathi kubantu abane ngalo iviki elingcwele.
E-United States of America:
Ukuqulwa kwecala lalowo owayeyiphoyisa laseMinneapolis, uDerek Chauvin (osesithombeni), ngokufa kukaGeorge Floyd bekufanele kuqale ngoMsombuluko ngokuhlolisiswa kwabahluleli abebezokala amacala okubulala amabili ecaleni elithathwa njengenhlolovo ngodlame lwamaphoyisa olubhekiswe kwaboHlanga base-USA. Umehluleli ubebeke eceleni amasonto amathathu okuqokwa kukamehluleli, ecabangela ubunzima bokuthola abantu baseMinneapolis abangahambi nohlangothi oluthize kuleli cala eselidunge izwe futhi lapho isithombe sesisulu uFloyd emamatheka kancane sibe isithonjana somhlaba wonke sobulungiswa bezinhlanga.