Ababhikishi bafuna kuqhubeke umbuso wentando yeningi
Izitolo, amafemu kanye namabhange kuvaliwe edolobheni elikhulu kunawo wonke iYangon ngoMsombuluko ngemuva kokuthi izinyunyana ezinkulu ziphakamise ukuthi kuvalwe umnotho njengengxenye yombhikisho omelene nabaphathi bezwe kwezombutho.
Ofakazi bathi babone amasosha edubula emoyeni ezindaweni eziningi kuleli lizwe eliseningizimu ye-Asia futhi ebheka nezimoto enkabeni yaseYangon emizamweni yawo yokunqanda ukuthi ababhikishi babuthane.
Noma kunjalo, ababhikishi ababhikishela ukuvukelwa kombuso ngamabutho ngenyanga edlule bagcine bebuthene kuleli dolobha kanye nasedolobheni okungelesibili ngobukhulu iMandalay kanye naseMonywa okuyidolobha elisentshonalanga yezwe. Lokhu kufakazelwe ngamavidiyo afakwe enkundleni yokuxhumana uFaceebok. Ababhikishi edolobheni iDawei, idolobha elisogwini eningizimu, bebevikelwe yiKaren National Union, iqembu lohlanga oluthize oluhlomile olunempi ende nezombutho zakuleli zwe.
Ababhikishi bebendizisa amafulegi enziwe ngezingubo zabesifazane kwezinye izindawo, kuthi kwezinye bewalengise umgwaqo wonke ukugubha usuku lwabesifazane emhlabeni jikelele ngenkathi bephonsela inselelo ezombutho ezihola leli lizwe. Ukuhamba ngaphansi kwezingubo zabesifazane kujwayele ukubukwa njengebhadi kwabesilisa futhi kuvame ukwehlisa ijubane lamaphoyisa kanye namasosha.
Abezindaba zombuso bathi ezokuphepha zihleli ezibhedlela kanye nasemanyuvesi njengengxenye yemizamo yokugcinwa komthetho.
Cishe izinyunyana eziyisishiyagalolunye ezemikhakha ehlanganisa ezokwakha, ezolimo kanye nezokukhiqiza zinxuse “bonke abantu baseMynamar” ukuthi bame ukusebenza emizamweni yokuguqula ukuvukelwa kombuso okwenzeke ngoNhlolanja kwamabutho, kuphinde kubuyiselwe uHulumeni oqokwe ngentando yeningi ka-Aung San Suu Kyi.
Ukuvumela ukusebenza kanye nokusebenza komnotho kuzoqhubeka kulekelele ezombutho “nejngoba beqhubeka becindezela amandla abantu baseMynamar”, kusho izinyunyana esitatimendeni.
“Isikhathi sokuthatha izinyathelo zokuvikela intando yeningi yethu manje.”
Cishe izitolo ezimbalwa ebezivuliwe edolobheni iYangon kodwa izikhungo ezinkulu zokuthenga kanye namafemu ukusebenza bekumile njengoba bekuvaliwe.
Umholi wemibhikisho uMaung Saungkha enkundleni yokuxhumana uFacebook unxuse abesifazane ukuthi baphume ngobuningi babo ukuphikisa lokhu kuvukelwa kombuso ngamabutho ngesikhathi uNay Chi ongomunye wabahleli bombhikisho besifazane echaze abesifazane njengabavikeli.
“Abantu bethu abahlomile kepha bahlakaniphile. Bazama ukusihola ngokusethusa kepha sizolwa nalokho kusatshiswa,” kusho u Nay Chi ngesikhathi ekhuluma nabezindaba.
Amaphoyisa kanye namasosha sebebulale cishe abantu abangaphezu kwama-50 emizamweni yabo yokunqanda nokuhlukanisa imibhikisho yansuku zonke kusukela kwavukelwa umbuso kuleli zwe, ngokusho kwenhlangano iUnited Nations (UN).
Izibalo ezikhishwe yi-Assistance Association for Political Prisoners zikhombise ukuthi cishe abantu abayi-1 800 baboshiwe ngezombutho ezilawula leli zwe ngeSonto nje kuphela.
Umphathi osemthethweni futhi nomphathi womkhankaso wezindawo weqembu likaSuu Kyi, i-National League for Democracy (NLD), uKhin Maung Latt washona esezandleni zamaphoyisa.
UBa Myo Thein, ongumshayi womthetho owasuswa esikhundleni uthe imibiko yokulimala ekhanda nasemzimbeni kukaKhin Maung Latt ikhona okuveze isithombe sokuthi “wayehlukunyezwe kanzima”.