Siqhakambisa amantombazane
ElaboHlanga lizonika injolozela abesifazane kwezemidlalo ngokuba namakhasi akhethekile elizowashicilela
Njengezwe sidume njengabantu abakuthandayo ukukhuluma nokwenza izethembiso. Lona wumkhuba omubi. Esinye nje isethembiso yileso esikhuluma ngokuxhaswa kwabesifazane kwezemidlalo. UHulumeni uyakhuluma ngalokhu. Izinhlangano zezemidlalo ziyakhuluma ngalokhu. Ngisho nabezindaba bayakhuluma ngakho kepha akukho noma kuncane okwenzakalayo. Ngisho nabamabhizinisi banalesi sifo sokuthembisa bangenzi. Leli yichilo ezweni elithi leseka ukulingana kwabesifazane kuyo yonke imikhakha yempilo.
Njengephephandaba laboHlanga sinqume ukwenza okuthile ngalokhu. Sinqume ukuba sibe nenjolozela yansuku zonke emidlalweni yabesifazane. Lokhu siyokwenza kulo iphephandaba ngokuqinisekisa ukuthi imibiko kanjalo nokuhlaziya ezemidlalo ezithinta abesifazane kuba semakhasini amqoka. Siyokwenza futhi ngokuthi sifundise siphinde sazise izwe ngabesifazane bethu kwezemidlalo. Baningi ngakho lokhu sikwenza sazi ukuthi siyovumbulula amakhono kanjalo nezifundiso eziningi ngabo. Kanjalo nakuso isizindalwebu sethu siyoyiqhakambisa le midlalo.
Inhloso yethu ilapha, iya kuleya ntombazanyana esemakhaya ethi nxa izibuka bese ibona izungezwe yindlala nethemba lingekho. Sifisa ukuyigqugquzela ukuthi amaphupho ayo afanele futhi angafezeka. Sikhuluma naleya ntombazanyana eselokhishini nasemakhaya lapho kungekho ingqalasizinda yezemidlalo. Nansi iya esikoleni nayilapho zingekho izinhlelo nezifundo ezigqugquzela ukuba amantombazana azibandakanye nezemidlalo.
Siyakholwa ukuthi uguquko kwezemindlalo ezithinta abesifazane lungenzeka kuphela uma nabo beyingxenye. Ngamafuphi ngeke sibhale nje ngabo bengekho bona ukuxoxa izifiso nezinhlelo zabo. Siyobambisana nazo zonke izinhlaka zabo, uHulumeni, izikole, abezamabhizinisi, nezinhlangano ezizimele kanjalo nemiphakathi la mantombazane aphuma kuyo ukuze lesi sethembiso sethu sisigcine.
Njengomfundi sikumema ukuba weluse lesi sethembiso sethu ubheke ukuthi siyasigcina yini, ukuthi nembala siyawuguqula yini umkhokha wokuthembisa kungenzeki. Phambili mantombazana.