Ukukhula kahle kwekota yangowezi-2020 kusize irandi lakuleli
NgoMsombuluko ziyisi-8 kuNdasa 2021
Kubi mzala. Uwoyela ongahluziwe iBrent uvule ngoUS$70.91. Le ntengo iyona ephezulu kunazozonke kule minyaka emibili eyedlule. Izinkomba ezintathu kwezinhlanu zivule kahle. Irandi livule lintekenteke uma liqhathaniswa nedola laseMelika njengoba livule ngo-R15.35/US$.
Ngesonto eledlule livule ngo-R15.32. Kuyadumaza ukuthi idola livule lingaphezulu kuka-R15 izinsuku eziyisithupha kweziyikhombisa zilandelana. Irandi livule kangconywana kupondo waseBrithani ngo-R21.24/UK£, kuno-R21.28 wangoLwesihlanu olwedlule.
Okukhathaza kakhulu wukuthi upondo waseBrithani usuvule ungaphezulu kuka-R21 izinsuku ezintathu zilandelana. Kanti livule lintekenteke uma liqhathaniswa ne-euro, liwu-R18.29/€, njengoba ngoLwesihlanu olwedlule livule ngo-R18.32. I-Euro selivule lingaphezulu kuka-R18 izinsuku eziwumkhothi zilandelana. Sengathi i-euro lizalele ngaphezulu kuka-R18.
Igolide livule liphezudlwana ku-US$1707, uma liqhathaniswa no-R1692 wangoLwesihlanu olwedlule.
NgoLwesibili ziyisi-9 kuNdasa 2021
Izinkomba ezine kwezinhlanu zivule kabana. Intengo kawoyela yamazwengamazwe yiyo kuphela evule kahle ngenxa yokuntenga kwedola laseMelika. Kodwa ningakhathazeki, nalokhu kuzodlula.
Irandi livule lintekentekana uma liqhathaniswa nezimali ezinkulu zomhlaba. Livule liwu-R15.47/US$ kuno-R15.35 wayizolo. Idola lithola amandla ngenxa yokuthi kunozinzo nesiqiniseko somkhombandlela ePhalamende laseMelika i-US Congress. Irandi livule lintekenteke kupondo, liwu-R21.41/UK£ uma liqhathaniswa no-R21.24 wayizolo. Kanti livule liwu-R18.35/€ uma liqhathaniswa nokuthi izolo livule ngo-R18.29. Igolide livule kabi impela njengoba beliwu- US$1692 kuno-R1707 wayizolo. Lokhu kwenziwa umcabango wokuthi igolide nedola kuyathelelana.
Ukubuyela esimweni kohwebo emhlabeni jikelele ngenxa yokwehla kobhubhane kusho ukwehla kwesidingo segolide njengompheme ophephile. Intengo kawoyela ongahluziwe iBrent ivule yehlile iku-US$68.36,
NgoLwesithathu zili-10 kuNdasa 2021
Kumnandi ekhaya, zonke izinkomba ezinhlanu zivule kahle. Lokhu kuwukubuyisa izinduku ezibuhlungu zayizolo. IStatistics South Africa (StatsSA) imemezele izolo ukuthi iGDP yangowezi-2020 yaseNingizimu Afrika yehle ngamaphesenti ayisi-7, okuyisibalo ebesivele siqagelwe nguMgcinimafa kaZwelonke neBhangengodla laseNingizimu Afrika. Okusize irandi ukuthi ikota yesine yowezi-2020 ikhule ngenguzunga yasi-6.3 samaphesenti.
Irandi livule kahle kuzo zontathu izimali ezinkulu esiziqaphelayo. Livule liwu-15.37/ US$ kuno-R15.47 wayizolo. Irandi liwu-R21.28/UK£ kuno R21.41 wayizolo. Livule linamandla kune-euro kuno-R18.24/€ kuno-R18.35 wayizolo. Igolide lona livule lenyukile kancane likuUS$1712, kuno-R1692 wayizolo. Kuyajabulisa ukubona igolide libuyele kumazinga angaphezulu kuka-R1700.
Intengo kawoyela ogahluziwe ivule iku-US$66.92 uma kuqhathaniswa nentengo ovule ngayo izolo ewu-R68.36.
NgoLwesine zili-11 kuNdasa 2021
Izinkomba ezine kwezinhlanu zivule kahle. Irandi livule liwu-R15.06/US$ kuno-R15.37 wayizolo. Kanti livule lingcono kupondo, liwu-R20.99/UK£ uma kubhekwa intengo yayizolo ewu-R21.28.
Kuyinjabulo ukuthi intengo kapondo seyize yavula ingaphansi kuka-R21 okokuqala kusukela ngomhaka zi-3 kuNdasa. Irandi livule liwu-R17.97/€ kuno-R18.24 wayizolo. Igolide livule likuUS$1731 kuno R1712 wayizolo. Intengo kawoyela ivule ikuUS$68.45, kuno-R66.92 wayizolo.