KWEZINYE IZINGXENYE
ERussia:
UMengameli waleli zwe uVladimir Putin usesayinde umthetho ongamgcina esehhovisi kuze kube ngowezi-2036, kusho uHulumeni. Lo mthetho uyamvumela ukuthi akwazi ukungenela amanye amahlandla ambili uma sekuphela leli ngowezi-2024. Lokhu kulandela ukuguqulwa koMthethosisekelo ngonyaka odlule. Lezi zinguquko zasekwa evotini lomphakathi lomthetho omusha ongavumela uPutin oneminyaka engama-68 ukuthi ahlale esikhundleni aze abe neminyaka engama-83. Njengamanje uPutin usebenza ngaphansi kwehlandla lakhe lesibili kulandelana kodwa esewonke asemane. Lezi zinguquko abagxeki abaningi abathi ukuvukela uMthethosisekelo zahlanganiswa nolunye uhla lwezichibiyelo obekulindeleke ukuthi zithole ukwesekwa njengokuvikelwa kwempesheni. Umthetho osayindwe uPutin ukubeka ngokusobala ukuthi omengameli abasha bahlale amahlandla amabili ehhovisi, kepha kuqalisa noma kucima amahlandla asewaphathile. Lo mthetho futhi uvimbela nanoma ngubani owake waba nobuzwe bangaphandle kwaleli zwe ukuthi afune esobumengameli. Lo mthetho usayindwe ezindlini ephansi nephakame zePhalamende ngenyanga eyedlule.
EJordan:
INkosana yakuleli zwe uHamza esiqophamazwini esikhishwe ngoMsombuluko izwakale ithi ngeke iyihloniphe imiyalelo yezempi yokuthi ingaxhumani nabantu bangaphandle ngemuva kokuboshelwa endlini. Umfowabo omncane weNkosi u-Abdullah nowayeyindlalifa esihlalweni sobukhosi uthe kulokhu okuqoshiwe, okukhishwe yiqembu eliphikisayo lakuleli zwe, ngeke enze lokhu okufunwa ngezombutho ngemuva kokuthi evinjelwe ukwenza noma imuphi umsebenzi futhi watshelwa ukuthi athule. Ngisho iNkosana uHamza ingabonwa njengosongo oluqondile eNkosini, kepha izenzo zayo zikhombisa ukuthi ifuna ukuphakamisa isikhundla sayo emphakathini ngemuva kokuthi isuswe njengendlalifa yobukhosi. “Impela ngeke ngilalele lapho bekutshela khona ukuthi awukwazi ukuphuma ukuthumela umyalezo (Twitter) noma ufinyelele kubantu kepha uvunyelwe ukubona umndeni kuphela. Ngilindele ukuthi le nkulumo ayemukelekile nganoma iyiphi indlela, ” kusho iNkosana uHamza. NgoMgqibelo ezombutho zamkhuza ngezenzo zakhe zathi zibukela phansi “ezokuphepha kanye nozinzo” lwakuleli zwe, iningi labantu abaphezulu nabo bebevalelwe.
ETaiwan:
UNgqongqoshe Wezokuthutha kuleli zwe ngeSonto uthe ngeke abalekele umthwalo wakhe wezimfanelo zengozi ehlasimulisa umzimba yesitimela yize isiphakamiso sakhe sokushiya phansi isikhundla sakhe sasinqatshiwe, phakathi kwemibuzo ebikhula ngokushoda kwezokuphepha okwakungaba nomthelela kule nhlekelele. Engozini yesitimela embi kunazo zonke esiqhingini eminyakeni engamashumi ayisikhombisa, kuvela ukuthi sekuqinisekiswe ukuthi abantu abangama-51 bashonile negesikhathi isitimela sishayisa iloli eduze kwasedolobheni iHualien ngoLwesihlanu. Ekhuluma lapho kwenzeke khona lesi sigameko uNgqongqoshe uLin Chialung uthe ngeke “awugweme umthwalo wemfanelo”.