Imbokodo iyazivikela
Isikhungo sithi sizivulile izandla ukusiza abesifazane ngamaqhinga okuzivikela kubahlukumezi besebenzisa umkhalambazo.
Ukwenza kahle umsebenzi kwabaqeqeshi beqembu elikhulu lekhilikithi esifundazweni iKwaZulu-Natal, iHollywoodbets Dolphins, sekuholele ekutheni balulelwe izinkontileka yize bekusasele iminyaka emibili ukuthi ziphele.
Izinkontileka zabo neHollwoodbets Dolphins bezizoze ziphele ngonyaka wezi-2023, kodwa sebengezelwe omunye unyaka njengoba sezizophela ngowezi-2024.
Kuleli thimba labaqeqeshi kukhulunywa ngo-Imraan Khan oyinhloko yabaqeqeshi, uMduduzi Mbatha noQuinny Friend.
ElaboHlanga libe nengxoxo noMbatha ukuzwa ukuthi uzizwa kanjani njengoba benyuselwe izinkontileka.
“Kuthiwa ukusebenza kanzima kuzala impumelelo, ngibona ekusebenzeni kwethu kanzima kuyikhona okwenze salulelwa izinkontileka. Kungijabulise kakhulu ukuzwa lezi zindaba,” usho kanje.
Ngaphansi kwaleli thimba amaDolphins anqobe umqhudelwano iMomentum One Day Cup.
UMbatha uthe ukwelulelwa kwabo izinkontileka ubona kuzobasiza kakhulu ngoba kuzokwenza ukuthi bathole isikhathi esanele ukufeza iphupho labo.
“Sibe nesizini edlule enhle, kodwa ngikholwa ukuthi asikafiki lapho abantu abacabanga ukuthi sesikhona. Kule minyaka emithathu esinayo sifuna ukwakha iqembu eliqinile, elizobe lisatshwa ukwedlula wonke amaqembu. Lokho kuzokwenzeka ngoba sineqembu labadlali abancane abanekhono eliyisimanga, nengikholwa ukuthi kula masizini amathathu esinawo bazobe bebatshazwa lapha eNingizimu Afrika nasemhlabeni wonke jikelele,” kusho uMbatha.
Iningi labadlali abagijima kumaDolphins baneminyaka yobudala engama-22 kuya kwengama-25. Leli qembu landise isikwati salo ngabadlali abancane.
Kulabo badlali kubalwa uBryce Parson oke waba ngukaputeni eqenjini elincane lesizwe, uThando Ntini oyindodana kalowo owake wadlalela iqembu lesizwe iProteas uMakhaya Ntini, uJason Smith noThamsanqa Khumalo obekuKZN Coastal.
UMbatha uthe uyakholwa ukuthi laba badlali bazosebenza kanzima ukulwela ukuthola ijezi uma kuqala isizini yangowezi-2021/22.
UKhan yena uncome ithimba labaqeqeshi kanye nabadlali, nathe ibona abenze izinto zabalula.
“Sisungule iqembu eliqine ngokwanele kakhulu nengikholwa ukuthi ikhona okwenze umsebenzi wabalula.
Engingakusho ukuthi usemuningi umsebenzi okusamele wenziwe. Siyabonga kakhulu ukuthi abaphathi basinike leli thuba esilitholile. UFriend noMbatha bangabantu abawuthandayo umsebenzi wabo, ngikholwa ukuthi ngokubambisana nabo sisazoqhubeka sikhiqize abadlali abazodlala eqenjini lesizwe iProteas,” kusho uKhan.
Kubadlali abahlukane naleli qembu singabala uSenuran Muthusamy, uMangaliso Mosehle, uKeith Dudgeon, u-Andile Mogakane noRob Frylinck yena osethathe umhlala phansi.
Ephawula ngabadlali abasayiniswe ileli qembu uKhan, uthe: “Basadinga ukuba sibapholishe kahle, kodwa banekusasa elihle kakhulu, kanti uBryce Parasons ungukaputeni emazingeni aphansi, sibheke lukhulu kuye. UNtini udlale kahle sibhekene neTitans kuhle ukumbona ekhula. USmith udlale kahle eshwiba amabhola kanti nakuye silindele ukuthi angene athi khaxa eqenjini. UKhumalo ungomunye wabadlali ababhekiwe kakhulu lapha KwaZulu-Natal.”
Uthe akusele isikhathi esingakanani ukuthi baqale ukuzilungiselela isizini ezayo.
Selilonke iqembu leHollywood Dolphins limi kanje:
UMarques Ackerman, u-Ottneil Baartman, u-Eathan Bosch, uRuan De Swardt, uDaryn Dupavillon, uSJ Erwee, Tuhamsanqa Khumalo, uKerwin Mungroo, uLifa Ntanzi, uThando Ntini, uBryce Parson, uJason Smith, uKeagen Petersen, uGrant Roelofsen, uPrenelan Subrayen, noKhaya Zondo (ukaputeni).