Iya ngokucija imikhonto kuHulumeni nasezisebenzini
UNgqongqoshe Wezemisebenzi KaHulumeni Nokuphatha uMnu uSenzo Mchunu usenxuse umphakathi waseNingizimu Afrika, izinyunyana nabo bonke abathintekayo ukuthi balekelele ekutholeni isixazululo ukuze kugwemeke isiteleka esihlongozwa yizinyunyana
Yize lolu daba selunesikhathi esingangonyaka, kepha ngesonto eledlule uHulumeni unikeze izinyunyana impendulo engazigculisi nethi nonyaka ngeke akhushulwe amaholo. Lokhu kunenge izinyunyana ebezithe zona zihlongoza amaphesenti ayisi-7. Isinqumo sikaHulumeni ngokusho kwezinyunyana sibaphoqe ukuba bahlomele isiteleka esiwukhukhulelangoqo ngenyanga ezayo. Khona lapho odabeni lukaHulumeni loku‘hlomisa umphakathi’ izinyunyana zithe inhloso wukuqhatha izisebenzi nomphakathi ngodaba oluthinta umqashi nomqashwa.
Nokho uMchunu uthi kuyinto ejwayelekile ukuthi uHulumeni ucele uvo lomphakathi uma kunesidingo. “Angixoxisani nabezindaba, phela uHulumeni waseNingizimu Afrika waba khona ngenxa yevoti labantu, njengoHulumeni ngeke sikwazi ukwenza lokhu sisodwa. Akukho lutho olungalungile ngokusebenzisana nabo. Asikhulumi, izingxoxo zisendaweni yokuxoxisana. Konke engikushoyo, ngabe othile angakhulisa noma mhlawumbe anikele ngemibono. Sisebenza kanzima kakhulu ngalolu daba kodwa kungaba khona umuntu ovela emphakathini ongaba nombono ongcono, akukho lutho olungalungile ngalokho,” kusho uMchunu.
Umfelandawonye wezisebenzi iCosatu nodlelana neqembu elibusayo uthi umkhakha wezisesebenzi zikaHulumeni akumele ukhishwe ezinhlelweni zokwenyuselwa amaholo njengoba uHulumeni uvumele amanye amabhizinisi kaHulumeni nezisebenzi zasePhalamende ukuba banyuselwe amaholo.
UMkhongi Omkhulu (Chief negotiator) wezinyunyana zezisebenzi zikaHulumeni uMnu uMugwena Maluleke uthe: “Kunezisebenzi ezibalulekile abezikade zibheka impilo yabantu bakithi, zihlinzeka ngemisebenzi ethile. Kumele bachaze ukuthi bakwaze kanjani ukunika izisebenzi zasePhalamende ukunyuka kwamaholo ngesikhathi izwe libhekene nobhubhane kanye namabhizinisi kaHulumeni njengoba kunyuke ngamaphesenti ayisi-6. Sasiphakathi nalo ubhubhane ngonyaka odlule kepha abafuni ukwandisa amaholo ezisebenzi zikaHulumeni. Iyiphi inqubo abayisebenzisile ukunikeza abanye kodwa abanye banganikwa?” Kuphetha uMaluleka.
Ngakolunye uhlangothu uMnu uClaude Naicker wePublic Servants Association uthi balindele ukuthi uHulumeni enze isithembiso esibuyekeziwe.