Ngabe usalithanda yini ikhansela lakho noma usuhleli nomhlola nje?
Mhleli
Lapha engigobe khona amadlangala ngenxa yetoho lisiphethe kahle siyaziswa ngokwenzekayo nokuzokwenzeka, siyamenywa nasemihlanganweni kube khona namaphoyisa azosexwayisa ngobugebengu nanokuthi singazivikela kanjani.
Ekhaya eDumbe lapho ngidabuka khona angilazi ikhansela lendawo, mhlawumbe kwenza ukuthi angihlali khona isikhathi eside. Kodwa umnyakazo ukhona liyazama akufani. - nguSihle KaNhleko
Mhleli
Angilazi nokuthi ubani. Impela le nto yamakhansela uHulumeni kusamele ayibheke. Mina angazi yini umsebenzi wekhansela ngempela ngoba qiniso bakhethelwa ukuthola nje itoho.
Nathi njengabantu basemakhaya sisagcwele inkinga ngoba yithina amathuluzi okuvota bese sikhohliswa ngezethenjiswana nathi silutheke sithi ‘iklembu lami iklembu lami’ ekubeni uhluphekile.
Abanye bazi kahle ukuthi umsebenzi wabo ukugqoka izikibha ukuze abanye besebenze bavuse imizi yakubo. Umbuzo, umkhetha kanjani umuntu uma esephethe bese umesaba ajike abe mkhulu kuwe, usabe nokuthi umxoshe uma esebheda? - nguSenzoo Mbatha
Mhleli
NgisoLundi olumahlikihliki kuWadi 3 ophethwe uMhlonishwa uS Buthelezi phansi kobuholi beIFP, okwamanje usasiphethe kahle ngiyafisa nangokuzayo aphinde abuye, kodwa-ke angeke saya nganxaye singewona amanzi. - nguZakhele MZukulu KaGwabalanda
Mhleli
Cha bandla ubesasebenza umfana kaButhelezi uyazama izigubhu zikagesi sizitholile ngonyaka odlule, amanzi akhona nomake umgwaqo singenawo kodwa uyafika umshini uma sekonakele. Uma kungathiwa akabuyele ngiyomupha elami ivoti.
- nguNompumelelo Thandeka Kamabuyakhulu Khanyile Mhleli
Yimikhufekhufe uma ukhuluma okuphikisana naye uvele athi usekwelinye iqembu nako ukuthi bangena bengazi ukuthi umphakathi uzoxhumana nabo ngqo, umuntu uvele acashe kwakhe athi akekho yize ekhona. Omunye athi ngazifundela mina pho ubengenelani ebukhanseleni azi ukuthi uzogaba ngokuthi uwuthisha noma iphoyisa?
- nguSabatha Mhleli
Into engichazayo ngokuhlala endaweni okungeyona eyakini ukuthi awazani nakhansela noma ubani uzohlala wenze okwenzayo uqede kodwa ngathi eDipaleseng kuWadi 6 sihlezi nemihlola emibili yabantu kuyala intuthuko, intsha angisakhulumi ayinamathuba uyoze ubaleke uze eGoli kube kuyima uthola into engcono. - nguSifiso Radebe
Mhleli
Alisekho kwalapha endaweni, lashiya umuzi, unkosikazi nezingane lahamba nezincane. Uma sikhala ngezidingo zomphakathi asilitholi. Alifakwangwa yithi ebukhanseleni kodwa lafakwa uNkulunkulu, angiboni ngisayophinda ngivote, sekuyokwehla uNkulunkulu abafake. - nguThoko Nhleko
Mhleli Mhleli
Ngakithi alikho ikhansela asilazi kumanje sithenga amanzi asinawo. Kunabantu abawadayisayo ngezimoto zabo siwathenga kubo. IHigh School asinayo kufundwa kude, izingane ziyagibela, abazali bakhokha imali yona lena abangenayo, bakhokha amarenti uma ingane isifunda uGrade-12 kuyaphoqa ukuthi iyohlalela ngasesikoleni. - nguNondumiso Ntuli
Savotela ikhansela lilihle lethembisa namuhla sekungumhlola nje ongenandaba. Inkinga ukuthi asizikhetheli inhlangano isikhethela emthandayo ngoba ehamba imihlangano yayo.
Abanandaba ukuthi akakaze enze lutho emphakathini. nguSbusi Zulu