Sifundeni nge-ANC nangathi?
Leli sonto limqoka emlandweni wethu kanjalo neKhomishini eholwa nguMehluleli uZondo. KuKhomishini lokhu kumqoka ngoba ukuvela konguMengameli kwenza yethembeke futhi ihlonipheke. Futhi kumqoka ngoba ukungasondeli kukaMnu uZuma kube nomthelela ongemuhle kuyo kwenza kwamuncu nasezweni.
Njengosopolitiki osemkantshubovu uRamaphosa ukwazile ukuziphungela yena neqembu lakhe. Ukwazile futhi nokudayisa lokho okuyinqubomgomo yeqembu lakhe ezindabeni ezithile. Ukuvuma kwakhe ukuthi akhona amaphutha enzakalayo akuyona into entsha nengalindelekile. Lokhu kuhle kepha washo okufanayo noNkk uMandela okaMadikizela mhla enza isethulo kuSobaba uTutu. Nabanye basho njalo kuKhomishini Yamaqiniso.
Kithi okumqoka wukuthi lokhu akushoyo ngeqembu lakhe kuthini kithi. Abanye abaholi abaqavile ku-ANC bake basho into ejulile. Owokuqala kwaba nguMandela qobo nowathi uma ngabe uKhongolose wenza kubacindezelwa lokho okwenziwa ngabadeshi ngezikhathi zobandlululo abayilwise i-ANC. Omunye kwaba nguMnu uMotlanthe owathi kungayiphaphamisa i-ANC ukulahlekelwa zikhundla noHulumeni ukuze ukwazi ukuzihlela kabusha.
La magama amqoka ngoba namuhla uRamaphosa uvuma lokhu ekade sakwazi ukuthi abanye eqenjini lakhe babolile. Ukuthi izwe linjena nje yimikhuba yabanye eqenjini lakhe. Umbuzo omqoka uthi pho ngalokho sizokwenzani? Amagama yena qobo uRamaphosa awasho eFree State ngesikahthi ethula inkulumo ngosuku lwenkululeko acishe abe yimpendulo. Lapha uRamaphosa wathi uma abavoti benganeme ngalabo ababavotele ababakhiphe. Lapha wayesho amakhansela angenzi kahle nangamaqola. Kuleli sonto usivezele ukuthi izigebengu ngobani nokuthi zikuliphi iqembu. Umbuzo uthi ngabe uma sekuvotwa sizobajezisa yini labo noma lelo qembu? Ngabe uRamaphosa uyawamukela yini amazwi kaMotlanthe okuthi iqembu lakhe kuyadinga linikwe uswazi oluncane? Yena uMandela owathi uma uKhongolose usugila imikhuba le uRamaphosa ayivumayo kwamukelekile yini ukuthi njengoba senza kubadeshi nalapha siyinyomfe?
Impendulo ikubavoti ukuba banqume ukuthi iqembu leli elibusayo seliwumlotha noma kukhona okusengenziwa ngalo. Okungenani uMengameli walo ushilo ukuthi akulungile konke akekho oyosolwa uma ekuphindaphinda lokho.