Abantu nezinhlanga okwabadabuka e-Atlantis
Akusibona aboHlanga baseKhemethe kuphela abaqhamuka ezwekazini elabhubhayo i-Atlantis, kodwa izinhlanga zonke zadabuka kuyo, zabe sezihlakazeka umhlaba wonke. Lokhu kuvezwa nguJ.S. Gordon encwadini yakhe esihloko sithi “Esoteric Egypt” eshicilelwe ngowezi-2001 kuya kowezi-2015 e-United Kingdom. Lo mbhali udume kakhulu ngemibhalo yakhe ekhuluma ngokusungulwa kweKhemethe, kunokubhala ngokwenzakalayo ngemva kokuba isisunguliwe. Asike simulalele ebeka ngokocwaningo lwakhe, engibona mina ukuthi labo abenza izifundo eziphathelene nemvelaphi kanye nentuthuko yaseKhemethe, bazokuthokozela lokhu okushiwo yilo mcwaningi.
Ngake ngabhala kule ngosi ngaphambilini ukuthi kusesekhona ukudideka okukhulu ukuthi ubani futhi evelaphi owakha amaPyramid neSyphinx eGiza, eKhemethe. Ngathi uThoth kumbe uHermes, waseKhemethe, uyaveza embhalweni wakhe ukuthi nguye uqobo kanye nozakwabo, njengoba babevela e-Atlantis, abakha amaPyramids aseGiza. UThoth lo kwakungowoHlanga, ofana nami nawe. Kufana neNkosi uSolomoni, uMozisi, iNkosi uDavide, nabanye, abantu nami nawe. Okuxakayo akushiwo ukuthi laba bangamaAfrika. Abacwaningi abaningi bathi uThoth waqhamuka eTopiya, abanye bathi amaPyramids akhiwa yiNkosi uKhufu. Sekuyavela manje, kancane kancane, uma ulandela imibhalo yabacwaningi abaningi, ukuthi lithini iqiniso. Akulula ukuthola iqiniso eliphelele uma ubhala ngomlando wasemandulo ngaphandle uma uzocobelela kubabhali basemandulo abanjengoHerodotus nabanye, bona ababebhala izinto ababezibona ngamehlo, hhayi ngokufunda imibhalo yabanye abantu. Ngakhoke ekuchazeni ngale nkiyankiya ngizothembela kuGordon noKameme obhale incwadi ethi ‘Spirituality Before Religion’, yashicilelwa ngowezi-2019. Bobabili bakhuluma into efanayo, kodwa akubona bodwa ababhale ngale nto, baningi abanye.
Ngenkathi uMvelinqangi ethumela amadodana akhe emhlabeni ukuthi azokwenza umsebenzi othize, akhetha ukwehlela ezwekazini laseNtshonalanga, elalimamaphakathi nolwandlekazi i-Atlantic Ocean. Abe esekhetha indawo yawo ayenza ikomkhulu labo, ayibiza nge-Atlantis. Leli zwekazi labe seliduma ngokuthi yi-Atlantis. Uma la madodana efika akhohlwa ayekuthunyiwe kodwa angenela amantombazane ngesinene. Yilapho kwaphuma amaNdiya ase-USA, aboHlanga base-Afrika, nezinhlanga eziningi, kodwa thina sizobheka umkhakha wama-Afrika. Leli zwekazi lalixube indawo yaseMiddle East, iNigeria, iNiger, iCongo, iMorocco, neAlexandria. Kafushane nje yonke iWest Afrika kanye neMiddle East, kuyongena phakathi e-Atlantic Ocean. Ngalezo zikhathi izwe eliningi lalisagubuzelwe ulwandle. La madodana kaNkulunkulu kuthiwa ayehlakaniphe ngendlela exaka ukwenza, kwazise ayenikezwa ubuhlakani obabuthe xaxa. Ngenxa yokudinwa izenzo zamadodana akhe uNkulunkulu wathukuthela kakhulu. Nawo avuma ezisola ngokwenza izinto angathunywanga zona nokungawulaleli umthetho kaMvelinqangi. Konke lokhu kwenzeka ngemva kokuba uNkulunkulu eseqedile ukwakha iZulu nomhlaba, futhi esewakhile umphefumulo nenyama yomuntu, futhi umuntu esexhumana neZulu (iKosmos) ngokwamaChakras asemzimbeni. Ngokubona umonakalo owenziwa amadodana akhe, uMvelinqangi wathukuthela kakhulu ngoba konakala uhlelo lwakhe ayeluhlosile. Okwenzakalayo ngemva kwalokho kwaba ukubhidliza okwasekwakhiwe. Kwadingeka ukuba i-Atlantis ayibhubhise, aqale phansi. Ngokuzwa ngabaProfethi ukuthi izwekazi lizocwila lonke, nokuthi-ke uNkulunkulu bakhona akhuluma nabo ngaleli lisu. Uma ufunda incwadi ka-Enoch, engafakwanga eBhayibhelini ngamasibomu, kuningi okutholayo ngenhloso kaNkulunkulu ngaboHlanga base-Atlantis. Lokhu kwenza ukuba abantu abaningi bajokole, bafuduke, babalekele kwezinye izindawo. Yingakho nje sibona amaRed Indians eMelika, nezinhlanga eziningi ezahlukahlukene. AboHlanga bangena e-Afrika, basabalala neWest Afrika, ne-East Afrika, neMiddle East, neNorth Afrika, njalo njalo. Ukucwila kwe-Atlantis kwaguquka izinto eziningi.
Kodwa kukhona ithimba elathunyelwa futhi eKhemethe ukuthi liyoqhubeka nokwakuhloswe uNkulunkulu. Kulo kwakukhona namhlanje esimubiza ngoThoth noma uHermes. Abantu abaningi ababephuma e-Atlantis bazinza ko-Indonesia, kuze kuyofika e-East Afrika, kakhulukazi eTopiya. UThoth nethimba lakhe bafikela e-Topiya, basukela kona sebeyoqhubeka nababekuthunywe eKhemethe. Ngakho-ke, iKhemethe yakhethwa njengendawo yesibili, ngemva kokuwa kweAtlantis, emhlabeni ukuba ibe yisizalo soluntu lonke lomhlaba. Siqhamuka lapho-ke isisho esithi: “Thina boHlanga siyindlalifa yomhlaba jikelele”. Ngamanye amazwi kudingeka siziqhenye ngobuthina. Singalingisi ezinye izinhlanga, ngale kwalokho uMvelinqangi uzosijezisa. Siyazi ukuthi uMvelinqangi waqala ngokwakha umphefumulo womuntu, ohlukene amahlandla ayisikhombisa, wagcina ngokwakha inyama nomzimba womuntu. Esekuqedile lokhu kwadingeka ukuba akhe umthethosisekelo ozolawula lesi sidalwa sakhe, wabe esakha umthetho obizwa ngeMaat, thina beNguni esiwubiza ngoBuntu. Konke lokhu, uMvelinqangi wayezokwakhela e-Atlantis, kodwa kwaphoqa ukuba ayokwenzela eKhemethe, lapho yonke imfundiso kaNkulunkulu yehliselwa khona ukuba idluliselwe kulolonke uluntu.
UMnu uMfuniselwa Bhengu, ungumbhali noMshicileli wezincwadi