Uthi ukulingana nokungalingani akungaphazamisi inqubo nesiko lesintu
Bagasela onontandakubukwa kwababizwa ngabalwela ukulingana ngokobulili. Bathi bafuna kube semthethweni ukuthi owesifazane abe nelungelo lokugana abesilisa abaningi noma yena lo wesifazane aganwe abesilisa abaningi. Inhlekelele. Bathi uMthethosisekelo uthi akube nokulingana kwabantu.
Mina ngifuna ukwazi ukuthi lokhu bakusho phezu kwaliphi, yini isisekelo salokhu abakufanayo? Okusobala wukuthi bafuna ukususa impi nesiko lesithembu eselamukeliwe wumthetho wezwe kusukela ngowe-1998.
Okokuqala, indaba yesithembu kayihlangene nokulingana noma ukungalingani phakathi kwabesilisa nabesifazane. Owesilisa akafani nowesifazane futhi owesifazane akafani nowesilisa. Bona bafuna abesilisa babe abesifazane nabesifazane babe abesilisa.
Umphuphe. Isithembu sihlangene nesiko lesintu ukuthi ngesintu umndeni wakhiwa kanjani. Kuhlangene nelungelo lokuqhuba isiko, elalingavikelekile phambilini. Yize leli siko labe lingavikelekile ngaphambilini, emiphakathini eminingi yabantu labe lilokho likhona.
Okungakhulunywa wukuthi kungabe isithembu siyakwazi yini na ukwakha umuntu olindeleke ukuba abe yingxenye yokwakha umphakathi ophilayo noma qha? Okwesibili, akekho owesifazane ophoqwayo ukuba sesithenjini yisiko nawumthetho.
Ophoqwayo unelungelo lokuphuma kulowo mendo. Oguqule umqondo wakhe wazithola engasakujabuleli ukuba sesithenjini naye unelungelo lokuphuma kuleso sithembu kaphoqekile ukuhlala kuso.
Lokhu bona abakufunayo, ukuthi owesifazane agane noma aganwe abesilisa abaningi akunamphakathi nanhlanga akunankolo ezikwenzayo lokhu. Balwela amalungelo abantu abangekho. Uchuku lunuka phu kulezi zinhloso zabo. Akukho okunye bahlasela isiko lesithembu, egameni lokuzenza ngcono. Yisifo esikhona-ke lesi, isifo sokuzenza ngcono. Uma kungekhona ukuzenza ngcono abasivezele labo ababalwelayo.
Uma belwela ilungelo labo asiqale sibone ngabo begana noma beganwa abesilisa abaningi. Basikhombise ukuthi kulelo siko labo umndeni wakhiwa kanjani? Yisiko elisukelaphi lelo ngoba kasilazi?
Uma umthetho uthi uzohambisana nabo laba, uzobe uvikela ilungelo labaphi abantu, isiko, noma umphakathi? Uma bethi bachibiyela isiko lesintu, balichibiyela ngawaphi amandla ngoba abanawo amandla okugxambukela esikweni lesintu?
Isiko nokulawulwa kwalo yinto yaMakhosi nabanikazi balo kuphela. Kake basitshele nali igwagwa lilindile.