Isihluku sabamhlophe
Ulokhu uqhubekile umkhuba wokulinyazwa kwamathuna aboHlanga emapulazini abamhlophe KwaZulu-Natal njengoba kuvela umndeni wasoPhongolo othi wehlelwe yilo mshophi.
Ziyaqhubeka izingxoxo zamaholo ezisebenzi zikaHulumeni ezibanjwe ngokwehlukana okukhona ezezisebenzi zeminyango, amabhizinisi oMbuso nezomasipala.
Ezezisebenzi zomasipala zisingethwe iSouth African Local Government Association (SALGA). IPhini likaMengameli wenyunyana yezisebenzi iSouth African Municipal Workers Union (SAMWU) uMnu uMluleki Mbhele, lithe: “Ngingakuqinisekisa ukuthi emveni kokuba siye ezingxoxweni sibe sesibiza umhlangano ophuthumayo wesigungu sikazwelonke lapho esibuyekeze khona izimfuno zethu ngoba sizama ngandlela yonke ukuba sibambisane neSALGA njengoba iqhamuke nesiphakamiso esibonayo ukuthi asizilekeleli izisebenzi.”
Uthe basamile ekutheni kuqashwe izisebenzi ngaphansi kohlelo lukaHulumeni i-Expanded Public Works Programme (EPWP) neCommunity Work Programme (CWP).
“Siphakamise ukuthi izingxoxo zamaholo kube ngezonyaka owodwa nokuthi kwenyuswe amaholo ngezi-R2 500 sisuka ezi-R4 000 ebesikufuna ekuqaleni. Siphinde sathi umuntu ohola kancane akube ngothola izi-R10 829 sisuka ezi-R15 000 okukhombisa ukuthi sizimiselele ukubambisana nomqashi,” kusho uMbhele.
Uthe ohlelweni lwezindlu baphakamise izi-R2000 bathi yonke imihlomulo ehlobene nomholo yengezwe ngama-7%.
Izisebenzi zifuna uthi oyobeletha athole ikhefu lezinsuku eziyisi-6, abalingani babo okungenani bathole inyanga eyodwa.
Bafuna umqashi enyuse impesheni ngama-18%.
“Lezi izinqumo esizibuyekezile sazihambisa kuSALGA sathi nayo uma ibuya mhla zintathu kuya zizine kuNhlangulana okungenani iqhamuke nento ezobe inika ithemba ezisebenzini,” usho kanje.
Mayelana nokuthi basenalo yini ithemba ngoba ngesikhathi beqala izingxoxo bekubukeka sengathi abezwani neSALGA ngezimfuno zabo, uthe: “Esikushilo kulokhu ukuthi ngoba basithumelela ababamele abangenayo imvumo yokuphawula nokukhipha izinqumo, sibabhalele ukuthi ababe khona okubalwa neSikhulu Esiphezulu sakwaSALGA uMnu uXolile George, khona kuzofika abantu abakhuluma kuzwakale nabanemvumo yokuphawula bangathumeli abantu abangenalo ulwazi ngoba ngeke sivumele lutho emva kwalokho. Njengamanje sisahlela izisebenzi emazingeni aphansi, sizazisa ukuthi kwenzekani ngoba into ephakanyiswe umqashi ngama-3% kuphela, azothi kumihlomulo okubalwa usizo lwezempilo akuzongena lutho, kuzindlu nempesheni akafaki lutho lokho siyakuchitha, asivumelani nakho futhi asisoze.”
Uthe njengamanje basaxhumana nezisebenzi asikho isiteleka abasihlelayo kusanezingxoxo.
“Okwamanje sisahambisa izimfuno ezintsha kuzisebenzi bese kube izona ezizosinika umyalelo khona uma sesibuyela ezingxoxweni ngoNhlangulana sikwazi ukusho ukuthi izisebenzi zisithumeni eNingizmu Afrika,” kusonga uMbhele.