Kushe inqolobane ngokuhamba kukaMZ Khumalo
Ukusababala kwezindaba zokwedlula emhlabeni kukaMnu uMelchizedek Zakhele Khumalo (75), abamaziyo bakufanise nokushaya kwesiqotho siqothe konke.
Ukusababala kwezindaba zokwedlula emhlabeni kukaMnu uMelchizedek Zakhele Khumalo (75), abamaziyo bakufanise nokushaya kwesiqotho siqothe konke. Ngakho kucime ubhaqa obelunganakekile obelukhanyisela abantu bawo wonke amazinga empilo. Izifundiswa ebezicwaninga ngeziwombe zombusazwe kanye nomlando weqembu iNkatha zife olwembiza. Abantu abebeshiseka ngokwazi ngenhlonipho, ukuzithoba, ubuholi, ukwakhiwa kwemizi nokukhuliswa kwezingane bafanise ukwedlula kukaMashobane nokusha kwenqolobane. Amalangabi awubuhanguhangu ashiye konke kuwumlotha ngemizuzwana.
Leli Ntungwa laziwe kakhulu ngesithakazelo sakwabo uMashobane abanye bebembiza ngehalanjonjo. Konke bekusukela ekuzihlophipheni kwakhe nasekwaziseni wonke umuntu kanye nenkuthalo yakhe ekwenzeni umsebenzi ngezinga eliphezulu.
Ube ngelinye lamadwala iqembu iNkatha elakhe izisekelo zalo ngaye. Ngenkathi iNkatha isungulwa mhla zingama-21 kuNdasa we-1975 wayengomunye wamalungu ayekhona. Wawokhela ngobunono nangesineke umlilo wokusabalalisa izinhloso nemigomo yeNkatha. Ube yisibuko kulabo ababefisa ukuqonda ukuzinikela okujulileyo nokwethembeka okunganqamukiyo ngezenzo kuMsunguli weNkatha uMntwana uMangosuthu Buthelezi. Iqophelo eliphezulu lokusebenza nokuthanda umsebenzi wakhe kwamakhela ugazi kubaholi namalungu eNkatha. Yilapho kwachuma khona igama lakhe lesiteketiso “iHalanjonjo”. Wayevame ukuthi: “Kufanele singakukhohlwa ukuthi asibona osombuszawe kepha singamahalanjonjo okufanele agxume ahlale ekwenzeni lokho uMntwana asijuba khona.” Lokhu kwabonakala eqhazeni lakhe njengoMsizi kaMengameli weNkatha noNobhala Wezokuphatha eHhovisi Elikhulu leqembu. Ukuphatha ngobunono izindaba ezisindayo nezijulile zeNkatha kumenze insika yamandla phakathi kwezigxobo kubaholi namalungu eNkatha. Inkuthalo yakhe nokuzinikela emsebenzi kumkhulumela kulabo ababengabaza ikhono lakhe. Ukhombise ubuchule obungachazekiyo ekuhumusheni izinkulumo zomsunguli weNkatha. Wayegwena ukunconywa ngokuthi: “Ngisazama namanje. Akulula. Ngisaqala udladlana engangiluhumushile lwalubuya lumanaphanapha yipeni elibovu uMntwana engilungisa. Ngasizwa ukuthamela imihlangano ayekhuluma kuyo, ekucosheni umongo nokuzika kwemicabango yakhe. Ngafunda amagama esiZulu angasetshenziswa yisizwe sakwaButhelezi kanye nabasondelene neNdlunkulu yakwaZulu. AmaShenge awalisebenzisi “elokuthola” athi ngicosha ukumangala. Kuhlonishwa iNkosi uMathole onguyise woMntwana waKwaPhindangene. ENdlunkulu abathi “ngiyabonga” kepha bathi “ngiyathokoza” kuhlonishwa igama leSILO okunguMbongiziyozwa.
Miningi imibhalo nezinkulumo azihumshile uMashobane kepha ezinye ziyohlale ziyingqophamlando nomphako wezizukulwane. Izinkulumomgomo zikaMntwana esewuNdunakulu kuHulumeni waKwaZulu nezezingqungquthela ezahlukeneyo, zaziyinselelo enkulu ngexa yengcidezi yesikhathi. Akekho owayeqonda imfihlo kaMashobane ekuziphothuleni ngesikhathi anqunyelwe sona. Wahumusha imiqingo ngemiqingo yeKhomishini kaButhelezi, yeKwaZulu-Natal Indaba, yeCodesa kanye nenkulumo yomhlangano wongomhla zili-19 kuMandulo we-1977 owawuphakathi kukaNgqongqoshe Wamaphoyisa NamaJele uJimmy Kruger. Kulo mhlangano uKruger wayephoqa uShenge ukuba iNkatha ingasheli abantu abangewona amaZulu. UShenge wambuka ezinhlamvini zamehlo uKruger wathi: “Uma iqembu lamaNeshinali lisayinisa lonke uhlobo lwabamhlophe nami ngizojoyinisa bonke abantu abamnyama eNkatheni.”
Lezi zinkulumo nemibhalo kwakufika kulakanyana kepha aphumelele ukukwenza ngesikhathi esifushane. Nalapho egula esesibhedlela wayezinikela ekwenza ehlaselwe yizinhlungu. Wayengafuni umsebenzi uhlale isikhathi eside ezandleni zakhe. Wayengenaso isikhathi sokungena nokuphuma ehhovisi. Phakathi kwamabili nasezintathakusa wawumthola kukhala ipeni nephepha. Wayengenaso isikhathi somndeni wakhe nesokuvakashela izihlobo. Wayelala amahora amathathu kuphela. Wayehlale enovalo ngomsebenzi anikwe wona, wayengafuni into ifele ezandleni zakhe. Ubeyingxenye yemihlangano yeNkatha eyingqophamlando. Wayekhona eSweeden ngenkathi umsunguli weNkatha eyobonana no-Oliver Tambo mayelana noxhaso lwemali ekusungulweni kwephephandaba “AbantuBatho” elasetshenzelwa wuqweqwe lwentatheli engasekho uJon Qwelane. Wayesethimbeni leNkatha lomhlangano mhla zingama-29 kuMasingana we1991 uShenge ebonana okokuqala emva kokudedelwa kukaMadiba ejele. UMashobane ubenezimpawu ezinqabileyo. Wayemlalesisa umuntu ngaphambi kokuphendula. Wawungacabanga ukuthi akanandaba nokuxoxayo, uma esekhuluma wawuthola incwenga yombono neseluleko. Wayenesineke sokufunda okubhalwe omunye umuntu. Uma esedlulisa imicabango yakhe wayengakwenzi uzibone ungelutho, wayeyiqokothisa ayibumbe imicabango yakho. Wayevame ukugcizelela: “Mina bengibona sengathi kungezwakala kangcono uma siqhamuka nalo munxa.”
Ubelisaba ihlazo. Uma ethunywa wayencamela ukushayela amahora amade ubusuku nemini kunokundiza. Wayekugwema ukulala emahhotela aqome ukufihla ikhanda ezindaweni zezinga eliphansi nasezihlotsheni. Kuye iNkatha kwakuyinhlangano yabampofu ngezenzo! Ubeyinqolobane yolwazi negula lobuhlakani. Ubeyisihlangu sabaholi beNkatha nesiqwanga sayo. Ubeyindoda enemigomo ejulileyo neyimvelakancane. Ubengasho ukuthi uqotho kepha impilo yakhe nokuziphatha kwakhe bekuxoxa indaba ngohlobo lomuntu abenguye. Kukho konke akwenzele iNkatha nesizwe esinsundu ubengashayi amaphiko. Uma uhlangana naye ubungaphika ukuthi yilomuntu ohlonishwa kangaka. Ubengeyena unontandakubukwa nosomathuba ohlale econsela udumo. Izikhundla ubezigwema. Ubethanda ukwenza umnikelo wakhe esithe agcizelele ngokuthi: “Yiphile le nto esixoxa ngayo. Ungalibali igama lami lapho usunconywa.” Uthembeke eNkatheni, emsebenzini wakhe nangezikhathi ebezinzima kakhulu empilweni yakhe. ULongfellow usonkondlo wathi: “Impilo yabantu abakhulu iyasikhumbuza ukuthi nathi eyethu singayenza ibe ngcno sishiye lokho esikwenzileyo ezihlabathini zesikhathi.”