Intokazi esencane ifuna ukubaphebeza ize ibalwe nabaphambili emhlabeni
Intokazi edlala ibhola lomphebezo uLilitha Ndungane, ithi ifisa ukwenza ezibukwayo uma isimele iNingizimu Afrika emqhudelwaneni ozokuba seChina ngasekupheleni konyaka.
Umqhudelwano ekhuluma ngawo i-U/16 Women’s Tennis Association (WTA) Future Stars.
Le ntokazi eneminyaka yobudala eli-15 ifisa lokhu nje inqobe umqhudelwano wabaneminyaka engaphansi kweli-16, obizwa ngeJunior Growthpoint Nationals, kowamanqamu ngokwehlula uKaitlyn Ramduth nyakenye onqobe umkomelo weMomentum gsport School Sports Star.
ULilitha oqale ukudlala lo mdlalo eneminyaka yobudala eyisi-7, ubhekwe ngabovu njengoba ezobhekana nabadlali bakwamanye amazwe abanekhono. Uthe uzimisele ukuthi ahlule noma ubani azobhekana naye. Uthe okunguyena omkhuthazayo ukuthi abe nothando lwalo mdlalo intokazi esencane egila izimanga uNaomi Osaka ongowokudabuka eJapan, nathe uyafsa ukubhekana naye enkundleni ngolunye usuku.
Ngokuyikho okwamenza ukuthi athande lo mdlalo, nanokuthi ikuphi lapho athathe isinqumo sokuthi uyazibona ephumelela ngalo mdlalo uthe: “Umama wami empeleni nguyena owangazisa ithenisi, ngoba ebona ukuthi ngingalidlala kusukela lapho angibange ngisabheka emumva. Uma ngisenkundleni yethenisi ngizizwa ngisekhaya lami lesibili, iyona into engiyiphilayo nengiyithandayo. Nginqume ukuthi ngizimisele ngalo mdlalo ngineminya eli-13, ilapho ngathola khona ukumela iNingizimu Afrika e-USA. Ngathola ithuba lokuyobona umqhudelwano omkhulu i-US Open, ngeke ngaqamba ngangethuke kakhulu. Ngathola ithuba lokuthi ngibone abadlali abahlonishwayo emhlabeni, okubalwa nengizifelayo ngaye uGael Monfils.”
Ebuzwa ukuthi uzizwa enjani njengoba ethole ingqayizivele yethuba lokumela iNingizimu Afrika, uthe: “Ngijabule kakhulu, futhi ngifuna ukwenza abangani bami, umndeni, abaqeqeshi baziqhenye ngami kanye neNingizimu Afrika imbala. Ngizizwa ngihloniphekile ngokuba ngumpetha wokuqala we-U/16 Nationals nokumela izwe lami eChina.”
Le ntokazi ithe ithanda ukuchitha isikhathi sayo ngokuthi izibukele iNetflix, nokuthi ifunde izinto ezintsha empilweni.
Ebuzwa uLilitha ukuthi yini ayilangazelele kakhulu emqhudelwaneni weWTA Future Stars, uthe: “Ngibheke ukuhlangana nabadlali abehlukene abavela ezingxenyeni ezahlukene zomhlaba nokubazi nokubona uhlobo lwabo lokudlala. Ngizwile ukuthi sizokwazi ukuhlangana nabanye babadlali beWTA namanxusa okuyinto ethokozisayo impela njengoba bezobe besinikeza izeluleko futhi beseluleka ukuba sibe wuhlobo oluhamba phambili kulo mdlalo.
ULilitha uzichaza njengomuntu ongancengi, ohlezi efuna ukusheshe aqede ngesitha, futhi abaqeqeshi bakhe bahlezi bemuncoma ngendlela adlala ngayo.
Uthe uyakwazi ukuthi ethi efunda ebe edlala imiqhudelwano emusa kude, othisha bakhe bayakwazi ukumfundisa ukuze angasaleli emuva ezifundweni zakhe.
“Ngibonga umama wami ngokuba umsekeli wami omkhulu njengoba engisekela zikhathi zonke. Ungifundisa ukuzethemba nokukholelwa kimi futhi kwesinye isikhathi ungitshela izinto engingafuni ukuzizwa kodwa ngiyazi ukuthi usuke ekusho lokho nje ufuna ngikwazi ukubhekana nomhlaba. Bengingeke ngifinyelele kuleli banga ukube bekungekho ngaye. Umama wami uyikho konke kimi,” kusho le ntokazi
Isonga ithe ifisa ukuthola umfundaze e-USA ngawo lo mdlalo bese idlala imiqhudelwano emikhulu ngaphansi kwe-International Tennis Federation (ITF), bese ibalwa nabadlali abangama-20 abahamba phambili emhlabeni.