Ithimba elizocwaninga ngesimo sokukhululeka okhethweni lwendawo
IKhomishini Yokhetho Ezimele (Independent Electoral Commission) isimemezele ukusungulwa kwethimba elizoncwaninga, licubungule ukuthi ngabe ukhetho loHulumeni Bendawo oluzayo lungaba olukhululekile yini ngaphansi kwesimo sokhuvethe.
UMengameli uCyril Ramaphosa usanda kumemezela ukuthi ukhetho loHulumeni Bendawo luzobanjwa mhla zingama-27 kuMfumfu wezi-2021.
Ememezela leli thimba ePretoria namuhla oyiSikhulu se-IEC, uGlen Mashinini (osesithombeni), uthe lowo owayeyiSekela likaMehluleli Omkhulu uMehlulei uDikgang Moseneke, uyena ozohola leli thimba.
“Leli thimba lizothola ukuthi ngabe ngaphansi kwesimo sokhuvethe esibhekene naso singakwazi yini ukuba nokhetho olukhululekile noma qha,” kusho uMashinini ogcizelele ukuthi i-IEC yona isikulungele ukubamba lolu khetho loHulumeni Bendawo.
Uthe ukusungulwa kwaleli thimba kulandela uhlelo lokuzwa izimvo zosopolitiki nabanye abathintekayo olwenzeka zingama-22 kuMbasa kophezulu emveni kokuthi ezinye zezinhlangano zepolitiki zizwakalise ukungeneliseki ukuthi ukhetho lungabanjwa ngaphansi kwesimo sokhuvethe.
Uthe ithimba likaMoseneke lizoyala i-IEC ngokuthi ukhetho lungaqhubeka noma qha kule sosimo sokhuvethe.
“Lokhu kuyingqinamba yokuthi sikhethe phakathi kokuvikela impilo yabantu nokuvikela intando yeningi. Kithina be-IEC ngingasho nje ukuthi simi ngomumo, ngaphandle-ke uma ongoti besho okunye ngesimo. Ukhetho lona singalubamba kahle njengamanje,” kusho uMashinini.
UMoseneke uthe ukhuvethe kalubanga namusa ngisho kuzinhlelo zentando yeningi.
Uthe ithimba lakhe lizovula ihhovisi ngesonto elizayo lizwe izimvo zabo bonke abathintekayo okuhlanganisa izinhlangano zepolitiki, ongoti bezempilo nalabo abasingethe izimo zenhlekelele ngaphambi kokwethula umphumela wocwaningo wethimba lakhe.