Ubuholi boMdabu bukhomba uHulumeni ovikela iso lawo
Zingaphezulu kwama-27 izinduna esezibulewe esifundazweni iKwaZuluNatal eminyakeni emibili eyedlule okungabaholi abaklama indima emqoka ukuqinisekisa inhlalakahle, ukuthula nozinzo emphakathini kepha bazithola sebengabagilwa ngokubulawa.
Emasontweni amathathu edlule uSihlalo waMakhosi KwaZulu-Natal iNkosi yaseMadungeni uPhathisizwe Chiliza, icele uHulumeni ukuba ubavikele futhi ubaseke njengobuholi boMdabu.
USikhwama wenhlangano Ubumbano Lwezinduna uMnu uPhakamani Dlamini (osesithombeni), ukhale ngokubulawa kobuholi beNdabuko. “Kunemali okumele engabe siyayithola kuHulumeni kusukela ngoMbasa wezi-2013 kodwa kuze kube yimanje awusikhokhelile. UHulumeni usikweleta leyo mali okuthe uma sikhuluma ngayo sathola ukuthi kunethimba oliqokile eliholwa uNgqongqoshe uNkosazana MaDlamini Zuma elithunyelwe kuNgqongqoshe uTito Mboweni ukuba liyokhuluma ngale mali. Akukho okunye esike sakuthola ukuthi kwahanjwa kanjani,” kusho uDlamini.
Uthe baphinde bathola ukuthi uHulumeni uthe izinduna ezintsha ezingena ezikhaleni zesezashona azingabe zisaholelwa ngoba imali ayikho, isetshenziselwe ukubhekana nokhuvethe.
“Esingakubeka ukuthi sinezinduna ezingama-500 ezingaholi, ezingene ezikhaleni zalezo ebezihola, asazi ukuthi uHulumeni lokho ukwenza ngaliphi. Lokho sikuthatha njengokubulala ubuholi boMdabu. Ubuduna ubuholi obumqoka. SesinoBukhosi obungenayo ngisho neyodwa induna eholayo, uBukhosi bakwaMavuso oPhongolo buyaxhuga izinduna aziholi kuhlukaniswa phakathi ubuholi boMdabu,” kusho uDlamini.
UDlamini uthe kuyabaxaka ukusetshenziswa kokhuvethe njengesizathu sokungaholelwa kwezinduna ngoba lokhu kade kwaqala, lesi sizathu sebesithatha njengento yokucasha.
“UMnyango usuphenduke osopolitiki, wethembisa izinto zingafezeki. Izikhulu akukhulumeki nazo zimatasa ziyokhankasela amaqembu ezepolitiki. Siyamasha asizitholi izimpendulo. Sibonile ukuthi lolu daba sekumele luxazululwe izinkantolo, iKhomishini Yamalungelo Abantu kanye noMvikeli WoMphakathi,” usho kanje.
Uthe uHulumeni uke ube nezizathu zokuthi kunokushayisana ekuqashweni kwezinduna kepha yiwo onohlaka lokuxazulula olungaphansi koMnyango. Uqhube wathi lokhu bakubona njengesizathu nje esingatheni sokungaholeli izinduna lokhu okuba nomthelela nasekuhanjisweni kwentuthuko emphakathini. “Kuhamba kuze kufike ekutheni imali ayikho ithathwe izinduna. Lokhu kusiqhatha nabantu ingakho sekubulawa nezinduna,” usho kanje.
Uthe udaba abazolufaka enkantolo olokungaholelwa kwezinduna kanye nokubuyisa imali yalezi ezinye ezindala, ngoba uma bebheka kuyahambisana kuwukwephula ilungelo lomuntu ukuthi bangene esikhundleni somuntu obehola kodwa bona abasaholi. UDlamini uthe bazokufaka enkantolo konke lokhu ababona becindezelwe kukho. “Sesibazisile ukuthi siya enkantolo, siyile eMnyangweni kaNdunankulu, sawazisa noMnyango Wezokubusa Ngokubambisana Nezindaba ZoMdabu, bonke sibabone besibukela phansi kungekho ofuna ukuxazulula lolu daba futhi oludala esilokhu silubona emaphephandabeni, kanjalo nezinqumo uMnyango ozithathayo uzithatha ngasese awuzi kuthina usazise ukuthi kwenzakalani ngoba udaba olwethu,” esho. Eveza ukuthi kuzwelonke uMnyango umiphi ngodaba lwezikhalo zabo, uthe bake bezwe emithonjeni yabezindaba kepha lokhu akukusha ngoba bakuzwa kubo bonke ongqongqoshe abafikayo kusukela kusenguDkt uZwelini Mkhize owayekhuluma ukuthi uyalwazi lolu daba kepha akekho ofika kuBumbano
Lwezinduna kanye nakubuholi ezosho ukuthi baya kanjani phambili,
“Siyawexwayisa uHulumeni ukuthi uma uqhubeka nalesi senzo uzohlangana nemfene iphuma ukuyotapa izinyosi,” kwexwayisa uDlamini.
Okhulumela uMnyango KwaZuluNatal uMnu uSenzo Mzila, ephawula njengoba izinduna zithi umunwe ukhomba bona ngokubulala izinduna, uthe: “Lokho akusilona iqiniso ngoba uNgqongqoshe uSipho Hlomuka azimisele ngako ukusebenza okuhle kusukela koHulumeni Basekhaya kanye nezinye izinhlaka esisebenzisana nazo. Siyazi ukuthi kunezingqinamba esihlangabezana nazo. uNgqongqoshe usebenza ngokuzikhandla ukuqinisekisa ukuthi izinduna ziyahola, udaba useze walwedlulisela kuzwelonke bafisa kubanjiswane.”
Ephendula ukuthi ngabe ukubambisana kukephi njengoba udaba lwaqalwa ukudingidwa uMnyango usaholwa uMphathiswa uNomusa MaDube Ncube futhi kubukeka sengathi uMnyango awusazimisele ukukhokha imali yezinduna ezindala nalezi ezisanda kungena, uthe: “UMhlonishwa uHlomuka ube nomhlangano noMama uMaDlamini Zuma kanye nobaba uTito Mboweni ngoba ezama ukuthi axazulule lolu daba. Iqiniso limile ekutheni le ngqinamba uMnyango obheke nayo kumele ubambisane noHulumeni kazwelonke ukuze ixazululeke, izingxoxo zisaqhubeka okwamanje akukho okungabekwa etafuleni, nesisangabazisa kona.” Ubuholi