KWEZINYE IZINGXENYE
E-EGYPT:
Leli lizwe livule umungcele weRafah ngosuku ngaphambili kwalolo olwaluhleliwe ukuvumela ukudlula kwabafundi, abantu abadinga ukwelashwa nokunye. Umungcele ubusuvaliwe ngeholidi le-Eid al-Fitr kanti bekumele uvulwe ngoMsombuluko kuleli sonto kepha wavulwa ngeSonto. Ukuhlasela ngezomoya kwe-Israel kubulale abantu abangama-33 basePalestine, okubalwa nezingane ezili-13, eGaza ngeSonto, kusho izikhulu zezempilo eGaza. Lokhu kuhlasela kwenze isibalo sabantu abashonile eGaza safinyelela e-181, kubandakanya nezingane ezingama-52, kusho bona. I-Israel ibike ukuthi kushone abali-10, okubalwa nezingane ezimbili.
I-Egypt kuze kube manje ithumele ama-ambulensi ali-16 eGaza ukuyolanda abalinyazwe amabhomu akwa-Israel bayokwelashwa ezibhedlela zase-Egypt, kusho umthombo wezokwelapha. Umthombo uthe kufike ibhasi elinabantu abangama-95 abebegibele lisuka eGaza ngeSonto ekuseni.
ESAUDI ARABIA:
Kuleli lizwe sekuvele ukuthi lizocindezela ababolekisi baseSudan ukuthi bafinyelele esivumelwaneni esibanzi sokunciphisa inqwaba yezikweletu zakuleli zwe eziyizigidigidi ezingama-$50, kusho isikhulu saseSaudi esizobamba iqhaza ezingxoxweni zokuhlela kabusha izikweletu. UHulumeni wezinguquko waseSudan oholwa uNdunankulu u-Abdalla Hamdok, ulwa nenkinga yezomnotho okhubazekile futhi uphusha izinguquko ezinolaka njengoba ufuna ukukhululeka esikweletini esikweletwa amazwe angaphandle, izikhungo zezimali zomhlaba wonke nabakweletisi bezentengiso.
“Mayelana nokuhlela kabusha, sizofaka umfelandawonye ngaphezulu ukuze wonke umuntu ahlele kabusha (izikweletu) futhi anikeze iSudan indawo yokuphefumula kanye nokweseka izinguquko,” isikhulu saseSaudi sitshele abezindaba ngombandela wokungadalulwa ngaphambi kwengqungquthela yaseParis ngoMsombuluko ukukhuthaza ukutshalwa kwezimali kanye nokuncishiswa kwezikweletu eSudan.
E-ALGERIA:
Leli lizwe lizovula kabusha imingcele yomoya nomhlaba lulunye kuNhlangulana, kodwa kuzothathwa izinyathelo ezinqala ukunqanda ukusabalala kokhuvethe, ngokusho kweHhovisi likaMengameli ngeSonto. Izindiza ezinhlanu kuphela ngosuku ezisuka nasezikhumulweni zezindiza zase-Algeria ezizovunyelwa “ngokulandela ngokuphelele izindlela zokuzivikela”, kusho isitatimende ngemuva komhlangano weKhabhinethi oholwa nguMengameli u-Abdelmadjid Tebboune. Imininingwane eminingi izomenyezelwa njengoba kuqhubeka isonto. I-Algeria yavala imingcele futhi yamisa zonke izindiza ngoNdasa wezi-2020 ngenkathi isibalo sabantu abanokhuvethe siqala ukwenyuka, kepha izindiza zasekhaya zaqala kabusha ngoZibandlela nyakenye. Leli zwe elisenyakatho ne-Afrika kuze kube manje linabantu abayizi-125 311 abanokhuvethe nabayizi-3 374 asebeshonile.
ENIGERIA:
NgoLwesibili amaphoyisa aqale umkhankaso eningizimumpumalanga yeNigeria ukunqanda udlame nobugebengu okudlangile okubandakanya nezigameko zokuhlaselwa kwamaphoyisa okudala ukwesaba ukubuyela empini nasodlameni oluvunyelwe ngabathize. Izigelekeqe ebezihlomile zibulale amaphoyisa ezigamekweni ezahlukene esifundeni kulezi zinyanga ezisanda kwedlula zaphinde zeqisa iziboshwa ezingaphezu kwe-1 800 edolobheni i-Owerri ngoMbasa.
Iziphathimandla zaseNigeria zisola iqembu elivalwe umlomo i-Indigenous People of Biafra (IPOB) nalokho amaphoyisa akubiza ngophiko oluhlomile lwaleli qembu, i-Eastern Security Network. I-Operation Restore Peace “izobhekana nezinhlaka zobugebengu” nobugebengu obunjengokuphanga, ukuthumba nokuphanga kuhlonyiwe, kusho isitatimende samaphoyisa aseNigeria.
Ihlose “ukubuyisela emuva ukuhlaselwa kubulawe abantu, udlame, ukwanda kwezikhali nokunye ukusongela umthetho nokuhleleka okulethwe yi-ajenda yokwehlukanisa,” kusho umbutho. Amaphoyisa athe izinhlangano zamasosha nezobunhloli zaseNigeria nazo zizobamba iqhaza kulo mkhankaso, kusho amaphoyisa.