Iqiniso lithi izinkolelo nomgomo kusiza abazisizayo ukuzivikela
Emhlabeni jikelele kuke kwaba khona inkulumompikiswano phakathi kwalabo abamukela ukungenelela kososayensi kanye nezinkolelo ezithile ngalokho. Ososayensi bavele nemigomo eyahlukene yokuthithibalisa ukhuvethe. Lokhu kwamukelwe ngabathile ngoba bakubuke njengempendulo esimweni esisambubhiso. Khona lapho kube khona ngenxa yezinkolelo zesintu nezenkolo abebekuphikisa ukungenelela kososayensi ngenxa yezizathu ezahlukene. Sekuwumlando ukuthi isikhona imigomo nokuthi abantu bayayisebenzisa nokuthi kukhona abasamile kulokho ababekusho ukuthi ngeke bona bagome. Kulaba kuqhamuke izinto eziningi ezibekwe njengobufakazi bokuthi kukhona ugcobho kule migomo.
Izinkolelo zabo zize ‘zafakazelwa’ yizigameko ezithile lapho kukhona ukufa kwabathize abebegoma. Nokho ososayensi bakuvezile ukuthi okunye ukufa bekungahlangene nemigomo kepha kwenzinye izimo izisulu bezinezifo ezithile ngale kokhuvethe.
Ezweni elinjengeNingizimu Afrika lapho zombili izinhlangothi zinamalungelo alinganayo, akekho ozophoqwa ukuthi awuthathe noma angawuthathi umgomo. Akekho uHulumeni, umqashi noma umuntu nje ongaphoqa umuntu ukuba athathe umgomo. Engekho nomuntu ongawuthathi umgomo okumele asole labo abaqome ukuwuthatha.
Njengabafundi belaboHlanga siyamukela ukuthi nani nihlukene kabili noma kathathu. Kukhona abamukela umgomo, abangawamukeli nalapbo abesaba lokho abangakwaziyo.
Sigqugquzela ukuthi noma ngabe yisiphi isinqumo enisithathayo ngodaba lomgomo nicabangele nina kanye nalabo abasondele kini. Iqiniso lithi abantu bayafa lapha phandle ngenxa yomkhuhlane. Elinye iqiniso lithi ngale kwemigomo kukumuntu ngamunye njengoba kukhona ulwazi oluthi uma silandela indlela ethize yokuphila ngalesi sikhathi ngeke sigule ngakho uma singaguli asiyidingi imigomo. Ngamafuphi, asidingi uHulumeni noma ososayensi ukuba sisinde kepha sidinga thina qobo ngoba yizinqumo esizithathayo ezingenza singabhubhi.