Inqabakutholwa yethuba lokukhuculula kwaBendawo
Abavoti bangazibangula iva kulokhu babe nohlobo lwabaholi abehlukile kunemihlola abanayo kulesi sikhathi
Oshicilelweni lwethu lwaleli sonto sibheka udaba olumqoka loHulumeni Bendawo. Lolu wuhlaka lukaHulumeni oselwaphenduka umgodi kwamanye amaqembu okulahla noma ukwehlisela labo asebehluleke kuzwelonke nasezifundazweni.
Kwamanye amaqembu lena yindawo yokuqinisa ukwesekwa kwabaholi abasemazingeni okuthiwa aphezulu kulawo maqembu. Bafaka abantu abangabangani babo, izihlobo zabo ngisho abalingani kwezamabizinisi. Amathenda lawa asaba wumkhumba wokwenza inkohlakalo kusetshenziswa ubuhlobo lobu.
Le mikhuba seyiphendule imikhandlu eminingi kuleli yaba zizinda zenkohlakalo. Okubi kakhulu wukuthi ngenxa yale mikhuba imiphakathi eminingi yaboHlanga iphila ngaphansi kwezimo ezinyantisayo. Imigwaqo imagebhugebhu, amanzi ahlanzekile kawabonwa, ugesi ngabakhwekazi kanti nokuqoqwa kwemfucuza yinto engaziwa. Konke lokhu kuholela ekucijeni kwemikhonto emiphakathini kanjalo nakumiphakathi kanye neziphathimandla.
Ukhetho oluzayo ngokumenyezelwa nguMengameli uRamaphosa oluzoba ngoMfumfu lulindeleke ukuba lube ngolunzima emaqenjini amaningi. Kwelibusayo kumele libuyise izinduku njengoba ngokwedlule laphucwa imikhandlu emqoka.
Kulawo aphikisayo ukhetho lolu luveza ithuba lokwandisa abantu abalimele kanjalo nokwanda kwemali ngoba baqokwa nje kukhona lapho bazobuye bathi phohlo lapha kulo iqembu. Amanye lolu wukhetho lokugcina ngoba uma beguqe kulo kuyizinkomba zalokho okuyokwenzeka eminyakeni embalwa ezayo lapho sekubanjwa olukazwelonke.
Abanye abamqoka kulolu khetho ngabavoti. Yibo phela abaklomelisa inkohlakalo noma bajezise abenzi bayo. Kulokhu abavoti abekade bekhala ngenkohlakalo, ukugqoza kwezinsiza nentuthuko basethubeni eliyinqabakutholwa ukuba bakhulume, hhayi ngomlomo. Hhayi babhubhise impahla ngomlilo kepha ethubeni lokuzibangula iva leminyaka.
Ngokuvota nje umvoti uyaklomelisa noma uyagweba okuthi uma sekwedlule ukhetho ukukhala lokhu kuqale embuzweni ekutheni kanti ukhala nje wabe ukhethe mhlola muni? Abathi ngeke bavote bazishaya ngetshe endaweni ebucayi ngoba phela bayovota abathanda imihlola kuthi nina enifuna ukubangula iva nihlale, umphumela kuyoba yiwo umhlola osuyoba nani iminyaka emihlanu.