Inkampani ekhiqiza ugesi yethule ukwenyuka izisebenzi ezingakwemukeli
Izinyunyana zezisebenzi zakwa-Eskom zisichithile isiphakamiso sokwenyuselwa amaholo ngama-1.5% esethulwe ngabaphathi.
Abaphathi bathembise lokhu ngaphansi kombandela wokuthi izinyunyana ziyavuma ukuthi zishiye ikhefu ngaphambi kwesikhathi kanye neminye imihlomulo izisebenzi zakwaEskom esezikuzuze iminyaka eminingi. Lezi zingxoxo zamiswa emasontweni amabili edlule emveni kokuthi izinyunyana zifune ukuba isikhulu sakwaEskom uMnu u-Andre De Ruyter, sethule isu lenkampani mayelana nezinguquko. Lokho kwenzeka ekugcineni, kwavula indlela yokuthi izingxoxo ziqhubeke.
Okhulumela le nkampani uMnu uSikonathi Mantshantsha uthe lesi siphakamiso esenziwa yile nkampani singenxa yezimo zayo zezezimali.
“U-Eskom ubulokhu ulahlekelwa imali futhi uthembele kubakhokhintela ukuze uthole uxhaso ngakhoke ukwenyuselwa kwezisebenzi amaholo kwencike kuzona ukuthi zemukele izinguquko ezithile ezimweni zokusebenza,” kusho uMantshantsha.
Izinyunyana zisheshe zasichitha lesi siphakamiso. “Akukho esinikezwa kona noma okubekwa etafuleni, lokhu abakulethile ihlaya, i-1.5% elinemibandela,” kusho uNobhala Jikelele weNational Union of Mineworkers (Num) osabambile, uMnu uWilliam Mabapa.
INational Union of Metalworkers of SA (Numsa) ithi amalungu abo ngeke amukele noma yisiphi isipho esingaphansi kwentengo yamanani abathengi, njengamanje ehleli ku-3.2 wamaphesenti.
“U-Eskom udlala ngathi, ama-1.5% angaphansi kokwehla nokwenyuka kwamandla emali, awuqali ngisho nasezingxoxweni zethu. Sibatshele ukuthi asiwamukeli ama-1.5%. Singakhuluma nje ngabo ukuthi bazonikela uma ama1.5 engaphezulu kwamandla emali,” kusho isikhulu sezingxoxo seNumsa uMnu uVuyo Bikitsha.
Zombili lezi zinyunyana okuyiNum neNumsa zifuna ukwenyuselwa amaholo ngamaphesenti angama-15 njengoba iSolidarity ifuna ukuthi enyuswe ngamaphesenti ayisi-9.5 Lezi zingxoxo ziyaqhubeka.
Ukucinywa kukagesi nomthelela omubi kumabhizinisi amancane
U-Eskom kuleli sonto umemezele ukuthi uzokwehlisa isigaba sokucinywa kukagesi kusuka esigabeni sesibili kuya kwesokuqala kusuka ngehora lesi-5 ntambama kuya kwele-10 ebusuku ngoLwesibili. Lokhu kwenzeke ngemuva kokuthi le nkampani iqinisekise ukuthi kukhona ukuthuthuka komthamo wokukhiqiza.
“U-Eskom uthanda ukwazisa umphakathi ukuthi isigaba sokucishwa kukagesi kuzokwehliselwa kwesokuqala kusuka ngelesi-5 ntambama, lokhu kuzoqhubeka kuze kube ngele-10 ebusuku. Lokhu kungenxa yokuqhubeka nokwenziwa ngcono kwamandla omthamo okukhiqiza lapho besinophiko olubuyela emsebenzini phakathi nosuku, kuyilapho olunye uphiko lusemkhankasweni wokubuyiselwa emsebenzini kusihlwa,” kusho okhulumela u-Eskom uMantshantsha.
Osomabhizinisi abancane eGoli bathi banovalo lokuthi ukuphazamiseka kukagesi kuzoba nomthelela omubi emabhizinisini abo. Lokhu kulandela ukuthi u-Eskom ubeke isibopho sokuqala sokukhishwa kwemithwalo kulesi sikhathi. NgeSonto abakwa-Eskom bamemezele ukuthi basebenzisa isigaba sesibili sokunqanyulwa kukagesi. Osomabhizinisi abancane bathi bayesaba ukuthi lokhu kungaba yinto ejwayelekile phakathi nesikhathi sasebusika.
“Njengamanje sinamamegawatt ayizi-14 000 omthamo ongekho esimweni sokubhidlika kanti amanye ayizi-2300 asemalungiselelweni okulungiswa.
Yize isimo sesingcono, okwamanje sithanda ukunxusa umphakathi ukuthi uqhubeke usebenzise ugesi ngokuwonga. Silindele ukuthi uhlelo luzothuthuka ngokuqhubekayo kuleli sonto njengoba ithimba lakwa-Eskom lisebenza ngokuzikhandla ukubuyisa amayunithi ukuze akwazi ukusebenza. Uma kwenzeka kuba nezinguquko ezinkulu ohlelweni lukagesi sizokwazisa abantu baseNingizimu Afrika,” kusho Mantshantsha, enikeza imininingwane ngokucishwa kukagesi.
Lokhu kuyamkhathaza uTsakani Mabasa owangena ebhizinisini lokuthengisa amakota eMeadowlands, eSoweto, ukuze ondle umndeni wakhe ngemuva kokuzabalaza ukuthola umsebenzi.
“Inkinga esinayo ukuthi uma singenawo ugesi asinalo ibhizinisi futhi asinayo imali engenayo. Ngakho-ke, kuyasithinta isikhathi esikhulu ngoba sidinga ukondla izingane zethu,” kukhala uMabasa.
UMabasa uthe akusona kuphela isitolo sakhe sokudla esithwala kanzima kodwa nezingane zesikole elokishini.
“Nezingane zethu ngoba kwesinye isikhathi kudingeka zenze umsebenzi wazo wesikole futhi zidinga ukusebenzisa amalaptop kodwa uma ibhethri seliphelile futhi ungenawo ugesi, awunakwenza lutho,” kusho uMabasa.