AboHlanga base-Afrika kungenzeka iningi labo liyinzalo kaZulu
Kunokwenzeka ukuthi iningi labantu boHlanga bokufika kuleli, esibabiza ngegama elithi ama‘kwere’ kumbe ama‘kwerekwere’, yimbewu yamaZulu eyasakazwa yiqhawe lakwaZulu uZwangendaba ngenkathi efulathela elakwaZulu, efuduka, engena phakathi naphakathi ezwenikazi i-Afrika.
Umlando kaZwangendaba uyaziwa umhlaba wonke, kodwa lapha ngeke sawuphinda, ngaphandle kokuthi ufuduko lwamaZulu lujulile. Kukhona amabutho ayengamaZulu athunyelwa yiNgonyama uShaka ukuyolanda izinkomo zesiNguni eSudan, eJuba. Kanti kukhona amanye amaZulu ayezinze eKhemethe ngenkathi kubusa iNkosi uKhufu, abanye abambiza ngoCheops (3,900 BCE), owakha amaPyramid amaningi khona eKhemethe naseSudan, ikakhulukazi esifundazweni saseJuba. Kuzokhumbuleka ukuthi ngalesi sikhathi iSudan neKhemethe kwakuyizwe elilodwa, kukhona iKhemethe esezansi bese kuba khona engaphezulu. Le engaphezulu yile esibizwa ngeSudan namhlanje. Igama elithi ‘Sudan’ lisha lafika nama-Arab. Okuyilona yi‘Nubia’. Kulapho-ke kwakuzinze khona isizwe esikhulu samaKhush, aze akha umbuso wawo ngenkathi izwe selizimele lodwa, lingasekho ngaphansi kweKhemethe. Encwadini yakhe uSheik Anta Diop (osesithombeni) ethi ‘The Peopling of Ancient Egypt and the Deciphering of the Meroitic Script’ uthi uma ufuna ukwazi kahle iKhemethe funda ngamasiko aboHlanga baseNubia ngoba yilapho usikompilo lwaboHlanga laqubuka khona. Encwadini ebhalwe nguMfuniselwa Bhengu ethi ‘AmaZulu: Ancient Egyptian Origin’ yabe isihunyushelwa esiZulwini kwathiwa ‘Bona’bakhulu baseKhemethe’ ufuduko laboHlanga besuka eKhemethe besakazeka umhlaba wonke, kuvela kahle kule ncwadi engaphezulu, ukuthi umNguni wokuqala wahola amaZulu besuka eJuba beza kuleli, kwasekuphuma abeNguni. Lokhu kwenzeka ngaphambi kokuba uZwangendaba athathe olwakhe ufuduko ehamba namabutho, amakhosikazi kanye nezingane. Osomlando bathi konke lokhu kwenzeka ngesikhathi se‘Mfecane’ eyadalwa yiNkosi uShaka.
Ababhali abanjengoMassey, uHerodotus, uDkt uMV Gumede, uMagema Fuze, njalo njalo, bayakuveza lokhu ukuthi thina maZulu sadabuka eNtshonalanga ne-Afrika. Yingakho nje ulimi lwethu luncike kakhulu kolwengabade yaseKhemethe, futhi lufana nolukhunywa ngabase-Uganda, abaseCongo, abaseTanzania, abaseZambia, njalo njalo. Noma ukhona umehluko kodwa kukhona lapho izilimi ezikhulunywa kula mazwe zibuye zifane. Umbhali uMassey encwadini yakhe ethi ‘Nile Genesis’ akahlonizi ukuthi zonke izilimi zamazwe ase-Afrika ziphuma eKhemethe. Uze abalule nokuthi ulimi lwesiHebheru nalo lunamagama amaningi elawathatha eKhemethe, esesiwathola eBhayibhelini.
Uhlobo lwaboHlanga olubizwa ngama‘Bantus’ njengesizwe saseLuhya, e-Uganda, eZimbabwe, eRwanda, eBurundi, eKenya, eNigeria, amaZulu, amaXhosa, amaNdebele, amaSwazi, abeSuthu, abaPedi, amaVenda, eTanzania, eMozambique, eMalawi, amaTsonga, amaMeru, amaAkamba, ama-Embu, amaChagga, njalo njalo, zonke lezi zizwe zisho ngazwi linye ukuthi zaphuma eKhemethe. Umbhali odume kakhulu waseKenya u-Alfred M’Imanyara, encwadini yakhe ethi ‘The Bantu in Ancient Egypt’ uthi akungatshazwa ukuthi sonke sathola usikompilo lwethu eKhemethe, ulekelelwa nguAsar Imhotep wase-USA kanye noJordan Ngubane (Conflict of Minds, 1979). UDkt uMV Gumede encwadini yakhe ethi; ‘Traditional Healers’, 1990, uthi abeNguni basuka eKhemethe naseNubia nakho konke okungokwabo, ngisho amasiko nosikompilo baze bazofika kuleli eleNdlovukazi uMthaniya. Inkolo yebeNguni yoBuntu, phakathi kokuningi, basuka nayo eKhemethe, okuyinkolo eyasuselwa kuMaat, okuyigama lenkolo yemvelo yaseKhemethe. Akuyona inkolo le eyafika nabefundisi, kodwa bazikhandela yona, eyayincike kakhulu emvelweni. Kwaze kwaba khona isisho esithi; ‘Ngimunye nemvelo’ besho ukuthi bona bancike kuMvelinqangi, ngoba bekholelwa ukuthi uMvelinqangi uyimvelo, imvelo inguMvelinqangi. Kuwo wonke la mazwe engiwasho ngaphezulu uma ukhuluma ngoBuntu bayakuzwa ukuthi uthini. Ngolimi lwesiSwahili kuthiwa ‘Utu’, ngoba wonke la mazwe usikompilo lawo lusuka eKhemethe. NeBhayibheli lathatha okuningi eKhemethe. Izincwadi zeBhayibheli zokuqala okuthiwa ngezikaMose zasuselwa eBhayibhelini laseKhemethe i‘The Egyptian Book of the Dead’. Abantu abaningi ababalulwa eBhayibhelini, ngabakithi boHlanga, yingakho sithola iNkosi uSolomon eyayinesithembu nezancinza eziningi. Isithembu akuyona into yanamhlanje, aboHlanga abafika nayo ngenkathi befuduka besuka eKhemethe.
Ngakho-ke, kunokwenzeka ukuthi laba bantu esibahlukumezayo, sithi ‘zifikanamthwalo’, sibabize ngegama eliyisifenqo elithi ama‘Kwere’ iningi labo ngamaZulu. Angizukungena emikhubeni emibi abayenzayo edala ukuthi bahlukunyezwe, kodwa ngibalula nje ukuthi kungenzeka ukuthi yinzalo yamaZulu leyo.