Zinkani zababili emqhudelwaneni wezimoto eMonte Carlo ngeSonto
Isikhulu sezimoto zeFormula One
(F1) iMcLaren uZak Brown, sibona engekho ozophazamisa umbango phakathi kwabashayeli ababili uLewis Hamilton oshayela ngaphansi kwezimoto iMercedes noMax Verstappen yena oshayela kwaRed Bull Racing. NgeSonto kuzokuba nomqhudelwano weF1 iMonaco Grand Prix ozobanjelwa eMonte Carlo, eMonaco, ngele-15:00. “UHamilton ungumpetha womhlaba ohlonishwayo kulo mdlalo, kodwa kuyangijabulisa ukuthi ukhona umuntu abanga naye lowo okunguVerstappen. Umbango ophakathi kwalaba unyusa isithunzi seF1 kungahlezi kunqoba umuntu oyedwa kalula nje. Laba bobabili kusukela kuqale umqhudelwano wakulo nyaka bayakhombisa ukuthi bazosinika isizini enhle,” kusho uBrown.
Kulo nyaka sekube nemiqhudelwano emine yeF1 okuyiBahrain Grand Prix, i-Emilia Ramagna Grand Prix, iPortugesse Grand Prix neSpanish Grand Prix.
Imiqhudelwano yeBahrain Grand Prix, iPortugesse Grand Prix neSpanish Grand Prix inqotshwe uHamilton, kwathi i-Emilia Ramagna Grand Prix yanqotshwa uVerstappen. “KuMonaco Grand Prix kuzoshuba kakhulu, okungichazayo ukuthi akekho umshayeli okuthiwa uvunwa umlando, lokho kusho ukuthi unganqotshwa inoma imuphi umshayeli. Akukhona ukuthi nginenkinga noHamilton ngiyamhlonipha kakhulu kodwa ngifisa ukuthi anqobe esebenze kanzima,” kusho uBrowm.
Ngokomlando weF1 iMonaco Grand Prix iwona mqhudelwano oneminyaka eminingi ukhona, njengoba owokuqala wawo waba ngonyaka we1921 owanqotshwa uWilliam Grover owayeshayela ngaphansi kweBuggati.
Umshayeli ogcine ukunqoba lo mqhudelwano uyena uHamilton ngonyaka wezi-2019, iMonaco Grand Prix ayibanga khona nyakenye ngenxa yokhuvethe. Kusukela ngowezi-2012 uHamilton usewunqobe kabili njengoba awudla nangonyaka wezi-2016. UNico Rosberg oshayela kuMercedes usawunqobe kathathu kusukela ngonyaka wezi-2012, wanqoba kulandelana ngowezi-2014 kuya kunyaka wezi-2016.
UHamilton kuqala unyaka naye usho okufanayo kokushiwo uBrown ukuthi kuyamjabulisa ukuba khona komuntu omfakela ingcindezi okunguVerstappen.
Ngokwezikleliso zabashayeli uHamilton nguyena ohamba phambili ngamaphuzu angama-94, uVerstappen unamaphuzu angama-80. Ngokwezimoto, ehamba phambili iMercedes enamaphuzu ali-141 kulandele iRed Bull enali-112.
“Kungiphatha kabuhlungu ukuthi iMonaco Grand Prix inqotshwa inoma imuphi umshayeli mina angikaze ngiyinqobe. Isifiso sami ukuthi ngiqede leli shobolo, ngifuna ukuqhubeka nokuba sezithendeni zikaHamilton okunguye ozihola phambili kuyimanje,” kusho uVerstappen.