Imindeni ilandisa ngezibazi zempi yaseGaza
Imindeni eseGaza Strip isiyaqala ukubhekana nobungako bomonakalo odalwe ukuhlaselwa ngezomoya kweIsrael muva nje, kanti izingane eziningi ezisencane nazo zisale zishaqekile ngenxa yalolu dweshu.
Lolu dlame obeluphakathi kwePalestine ne-Israel oluthathe izinsuku ezili-11, olwaqubuka mhla zili-10 kuNhlaba kophezulu lube yimpi embi kunazo zonke kusukela ngonyaka wezi-2014, njengoba lushiye abantu abangama-243 basePalestine bebulewe, kuhlanganisa nezingane ezingama-66, kwathi abayi-1 910 balimala.
Lokhu kuhlasela kudlule nemiphefumulo yabantu bakwa-Israel abali-12, okubalwa nezingane ezimbili, kwathi abangama-300 balimala. Umbango uqhamuke nje lapho imindeni eminingi ibilungiselela ukugubha umcimbi i-Eid al-Fitr kusihlwa mhla zili-12 kuNhlaba, obekukhomba ukuphela kwenyanga yeRamadan.
Omunye umndeni uveze ukuthi balahlekelwe kanjani yindlu kulokhu kuhlaselwa lapho obekufanele kube yisikhathi sokujabula.
“Besilungiselela ukugubha i-Eid al-Fitr ukuletha injabulo ezinganeni nokuthola umoya oguqukayo. Siphume nezimpahla esizigqokile kuphela, ”kusho ubaba womndeni othintekile.
“Ngangigqoke izingubo zokulala lapho ubaba eza kithi ezosifisela i-Eid emnandi. Angizange ngizigqoke. Sacelwa ukuba siphume endlini, futhi ngafaka izicathulo zikamzala wami, hhayi ezami, lapho siphuma ngokushesha. Angisithathanga isipho sikababa. Angihambanga nalutho ngaphandle kwe-iPad yami, ”kusho indodakazi yakhe ekhathazekile.
Umama waleli khaya usale ekhathazeke kakhulu kodwa unethemba lokuthi konke kungaxazululwa. “Basicekele phansi, bachitha nempilo yethu. Konke konakele,” kusho lo mama.
Impi phakathi kwabasePalestine nabakwa-Israel ibangwe yintukuthelo yabantu baseGaza ngenxa yezinsongo zokuxoshwa kwemindeni ehlala empumalanga yeJerusalem. NgoLwesihlanu olwedlule kube nesivumelwano sokubeka phansi izikhali.
Ukubekwa phansi kwezikhali phakathi kuka-Israel neHamas kungene osukwini lwesithathu ngeSonto ngesikhathi abalamuli bekhuluma nazo zonke izinhlangothi ngokwelula isikhathi sokuthula. Abalamuli base-Egypt bebelokhu bexakekile bezama ukuthola ukuthula phakathi kwe-Israel neGaza Strip, ebuswa yiHamas, futhi bahlangane noMengameli wasePalestine uMahmoud Abbas, eWest Bank. UNgqongqoshe Wezangaphandle wase-Egypt naye bekulindeleke ukuthi ahlangane nezikhulu eziphezulu zaseJordania ngeSonto ukudingida ukwehla kwezinga lale ngxabano nangezindlela zokuvuselela inqubo yokuthula yaseMiddle East.
ULynn Hastings, onguMxhumanisi we-United Nations Humanitarian ezindaweni zasePalestine, uthe i-United Nations (UN) izokwethula isicelo sokulungisa umonakalo eGaza enabantu abaningi, lapho kunovalo lokusabalala kokhuvethe.
“Lokhu kukhuphuka kubhebhethekise isimo esivele sibucayi eGaza, esidalwe yiminyaka engaba li-14 yokuvinjelwa kanye nokungezwani kwangaphakathi kwezepolitiki, kanye nempi ebiphindaphindeka,” esho.
“Kumele futhi siqinisekise ukwesekwa ukuze siqhubeke nokubhekana nezidingo ebezivele zikhona, kubandakanya nalezo eziqubuka ngenxa yobhubhane oluqhubekayo.”
I-Israel ibivimbele iGaza kusukela ngowezi-2007. UHastings uthe sekunesikhathi eside i-UN icela i-Israel ukuthi iyeke ukuvimba futhi izoqhubeka nokwenza kanjalo.