Icala lowayenguNdunankulu uSoro liqulwa esekudingisweni
UGuillaume Soro, owayenguNdunankulu futhi engumholi wamavukelambuso e-Ivory Coast, kuqulwe icala lakhe engekho enkantolo ngoLwesithathu olwedlule njengoba ebekwe icala lokwakha itulo lokuketula uMengameli u-Alassane Ouattara.
Icala liqale ngesivuthevuthe lapho abameli bakaSoro bebephikelela ekutheni banikwe isikhathi esithe xaxa sokuhlola ubufakazi obubhekene noSoro nabanye abasolwa abali-19 kuleli cala.
Ngenxa yalokhu, usuku lwesibili lokuthethwa kwecala luhlehliselwa uLwesithathu kuleli sonto, lokhu kuvezwe nguDallo Souleymane, oseqenjini likaSoro labameli.
Abameli bakhe baligxekile leli cala lapho bephakamise ukuthi kukhona ukuzibandakanya kwezepolitiki futhi bathi abukho ubufakazi obuveza ukuthi uSoro unecala lokwakha itulo.
“Ezobulungiswa zase-Ivory Coast sezibe nesandla ekuxazululeni ukugadlana kwabantu kwezombusazwe,” kusho isitatimende sabameli bomsolwa ngaphambi kokuqulwa kwecala.
Leli cala seliphakamise ukungezwani ezweni elisuka ezimpini zezakhamuzi ezimbili selokhu kwaqala leli khulunyaka.
USoro, osekudingisweni ezwenikazi i-Europe, usevele ulahlwe yicala lokukhwabanisa kanti ngonyaka odlule wagwetshwa iminyaka engama-20 ebhadla ejele.
Wahola amavukelambuso angenisa u-Ouattara emandleni ngesikhathi sempi yezakhamuzi eyalandela ngemuva kokuphikiswa kokunqoba kwakhe okhethweni ngonyaka wezi-2010 futhi waba nguNdunankulu kanye noSomlomo wePhalamende ngaphansi kuka-Ouattara. Kodwa laba muva nje sebeyinkukhu nempaka njengoba uMengameli wakwenza kwacaca ukuthi uzophikisana nezinhloso zikaSoro zokuba nguMengameli waleli zwe.
Abashushisi bakhipha incwadi egunyaza ukuboshwa kukaSoro ngenyanga kaZibandlela ngonyaka wezi2019, ngaphambi nje kokuthi ahlele ukubuyela ezweni lakhe esuka e-Europe ayokwethula isikhundla sakhe sokhetho lwangowezi-2020 sokuba nguMengameli.