UMasipala naMakhosi empini yamareythi
Mhleli
Ubani le ndoda okuthiwa umasipala? Mhlazane sahlangana njengesizwe samaZulu ngaphandle kwamaqembu ezombusazwe sobe sinqobile. Okokuqala emalokishini kudlalwa ngathi ngamareythi. Lo mhlaba okuthiwa okamasipala wathathwa eMakhosini nasesizweni sonke. Kumele ubuyele kubo. Izinkampani ezizithathela izimbiwa phansi zikhokhe kuphinde isizwe sibe namasheya ukuze leyo mali isebenzele izidingo amanzi, ugesi nokunye. - nguThabani T Masondo
Mhleli
Kunenunu ebizwa ngoCogta uma ingabhekiwe kumanje kunezigodi ezingenazo izinduna inhloso ukuqeda nokuhlakaza izigodi ngoba izinduna ezikwazi kuhlanganisa nokukhanda amabutho. Usethe azingagcwaliswa izikhala zezinduna ezavuleka, sikhona yini isigodi esake saziphatha ngaphandle kobuholi? Uzongena lapho-ke umasipala sesihlakaziwe uma singaboni. - nguVoos Nkwanyana
Mhleli
Awani lawo mareythi? Kumanje kwelakithi kwaNongoma nakwezinye izindawo behlulwa ukulungisa imigwaqo lokhu okwakwenziwa uHulumeni waKwaZulu zingakabi ningi kwazimonto futhi singavoti kuthi njalo kade linile uhambe uyolungisa. Angiyiphathi-ke eyokufaka itiyela. Amanzi dololo, asisoze sakhokha lawo mareythi. - nguMkhwenyana Wase Mission
Mhleli
Labo masipala baswele abazokusho ke manje, ningadlali nje ngabantu ngoba behlupheka nina nibusa nidla imali yabakhokhintela. Niyajabula bo kanti sikhala kanye nani nje ngokwehlele iNdlunkulu nina nithi ngcingci kamdokwe ukwebuza kweMbube. Inhlangano ebusayo iyihlazo. - nguBongumusa KaGamndane Ngobese
Mhleli
Basisiza ngani bona omasipala ngoba nabo bayisixuku nje samasela adla imali yomphakathi bengawunaki ngalutho. Impilo yamanje inzima, umuntu umazibonele, abasimele kancane ngobutsotsi abasiniki zidingo thina. - nguSenzo Mhlongo
Mhleli
Amathuba emisebenzi, imitholampilo esezingeni, izikole ezisezingeni, imigwaqo, amanzi ahlanzekile nogesi abakwazi kwezinye izindawo ezisemakhaya kodwa sekukhulunywa amagama amakhulu omareythi, ungasibhedeli uHulumeni.
- nguMthembu Khetha
Mhleli
Babethunywe yithi yini ukuthi abebe imali? Abaholi bakaKhongolose bazibonela izinyoni nje. Yithina esiyobe sibaduda uma sike savuma ukukhokha le mali abayishoyo asibambisaneni silwe uma kumele.
- nguSigcino Sibiya Cosmos
Mhleli
Nami ngithi lingawa licoshwe zinkukhu, ngokwenzani kwabo konje? Asinamanzi, asinamigwaqo, awucabange sengikhokha endaweni engizalelwe kuyo ngizikhela amanzi emfuleni. - nguNqo Sompisi Africanpearls
Mhleli
UHulumeni unesibindi esinenyongo eceleni! Kungathi intuthuko ingekho ezindaweni zasemakhaya, behluleka ukuhambisa izidingongqangi kubantu kodwa bathi abakhokhe amareythi? Mina ngibona ukungaphili nje. - nguSmangaliso KaMfan’fikile Sangweni
Mhleli
Kodwa uKhongolose ngempela uBukhosi noma ukubuswa ngokoMdabu yinto ongakaze uyifune uma uShenge akagolozanga kuCodesa yokuqala ngabe kudala yaphela indaba yasemakhaya. nguThemba Khuzwayo
Mhleli
Nize niyibone bantu bakithi i-ANC ukuthi injani. Kodwa uma sekuyovotwa inina futhi enizoyibuyisela, ikakhulukazi abantu abadala ibona abasenzela phansi bayakholelwa kakhulu kulo mbhedo oyi-ANC. - nguThobani
Mhleli
Njengoba imisebenzi ingekho nje, bazokhokha ngani abantu basemakhaya? Uma impilo yasedolobheni isixakile siya emakhaya ngoba khona uyakwazi ukuphila impilo elula engenazindleko. - nguXolani
Mpanza
Mhleli
Ungathi behlulwa wukwakha imisebenzi abantu imali bazoyithathaphi? Izwe libehlule iyokhokhwa okhomlede babo. Iphake Shenge siyogeza emfuleni sizodlala abanye abafana phela. - nguNdodo Mkhweli
Mhleli
Njengoba sisaswele amanzi nje angiphathi-ke inhlalakahle, uma lina izimoto zihamba kabuhlungu lapho zisuke zithwele abantu. Bangadlali ngathi bona bahlala konokusho, abacabangaka kahle. - nguSbusiso Nhlangothi Mbokazi
Mhleli
Mina nje ngayipopola le ngozi, mhla kwebuze iSILO kahle kahle yiso ebesesatshwa. Kade babewuhalela lo mhlaba ongaphansi kwaMakhosi omasipala. Kusuke kwagudluka ihawu sasala obala. - nguGugu
Ndlovu
Mhleli
Sekuyisikhathi sokuba sizimele. Bayosihlukumeza kuze kube nini ngempela, umasipala wawunikwa imaphi aMakhosi lo mhlaba osuqhosha ngawo? nguMcupheni Bhengu
Mhleli
Bayaganga bafuna ukudla yona le mali yethu bakhokhintela, abadeli ilena abayidlile. Abahambe bayofa kwayona le ndaba yomasipala wabo sobafaka umlilo, asiphili ngomasipala thina. - nguDidimalang Mathaba
Mhleli
Lafa elihle kakhulu sibhekile sengize ngithi cishe babengcono abelungu ngoba awukho umuzi owawulala ngendlala, kunzima lapha sikhona. - nguMbongeleni
Ashwell