Nabangazalwanga ngabalapha ekhaya
KwaboHlanga kunenkolelo ethi kuba nochuku uma bekhishelwe ngaphandle
Yini umndeni, uqalaphi ugcinaphi? Lona umbuzo ongazwakala ulula mhlawumbe nempendulo yawo ingaphuma iqhasha kepha akunjalo ngoba ujululile. Impendulo elula ingathi umndeni ngumama nobaba nezingane zabo. Enye elula ithi umndeni nguye umama nezingane bese kungena nozalo kakhulu lukababa. Kuzo zonke izimpendulo kukhona esingakuqaphela; ukuthi lapha umndeni wamukelwa njengabantu abaphilayo nabaziwayo. Kule ngosi sesikubalulele kaningi ukuthi lo mcabango kawukho kwaboHlanga ngoba kithi nabangabonwayo bangumndeni.
Nokho namuhla ake sicacise nakubo laba abangabonwayo, abafabengafi. Kuvame ukukhulumeka sengathi nxa sikhuluma ngabangabonwayo sisho izalukazi namakhehla kuphela. Siphinde sikhulume sengathi umndeni wabangabonwayo yilabo asebeke baphila. Leli phutha likhipha ngaphandle labo abangumndeni kepha abangazalwanga. Lapha akudingeki ukudideka ngoba thina kasididekile uma sikhuluma ngokuthi abangazalwanga nabo zingane zalapha ekhaya. Kulaba sikhuluma ngezingane ezingaphumanga eziswini noma ezaphuma sezithule. Ezinye yingenxa yokungaphili kukamama, ingozi noma yimikhuba nje yabantu. Okumqoka lapha wukuthi basuke besesibelethweni nje basuke sebebaliwe ezinganeni zalapha ekhaya. Nabo njengezinye izingane zalapha ekhaya ezibonwayo bayakhula.
AboHlanga babenayo indlela yokuhlangabezana nesimo lapho ingane ihamba ingakaveli. Kwakuthi uma sekwenzekile bese ingane leyo yethiwa igama kwamukeleke ukuthi ibuyele noma ingene emndenini wabafabengafi. Kwakunenkolelo yokuthi le ngane nayo inemizwa, njengoba iba nolaka nxa kuwukuthi kugcine ngokuthi kulibelekile ngayo. Abazali bayo babenza okuthile belandela usikothi lwalapha ekhaya. Bayenzele wonke amasiko ingane lena ukuze yazi ukuthi iyathandwa futhi ingumndeni.
Bayahlupheka abantu lapha phandle ngezingane okuthiwa uma kuyobuzwa ohlanyeni kuthiwe zingondinga sithebeni. Kuthiwe ‘zivimbe okuthile’ ngoba zinolaka. Lokhu nje kukodwa kuwubufakazi benkolelo ethi kwaboHlanga umndeni yinto ejulile echaza abaphilayo nabangabonwayo.