Awase-England ayogabadela enkundleni yamaPhuthukezi elwela ukudla isicoco se-UEFA
Umqeqeshi weqembu lase-England iManchester City uPep Guardiola, uya emdlalweni wangempelasonto kubhekwe ukuthi angene emlandweni.
IManchester City izotholana phezulu nezimbangi zayo ezinkulu iChelsea FC emdlalweni wamanqamu womqhudelwano omkhulu i-UEFA Champions League. Lo mdlalo uzokuba kusasa ngoMgqibelo ngele-21:00, eDragao Oporto, ePortugal.
Kubhekwe ukuba uGuardiola ajoyine abaqeqeshi abathathu aseke banqoba i-UEFA Champions League amahlandla amathathu.
UGuardiola usewunqobe kabili lo mqhudelwano neBarcelona yaseSpain ngonyaka wezi-2009 nangowezi-2011.
Abaqeqeshi asebewunqobe kathathu lo mqhudelwano uBobby Paisley, uCarlo Ancelotti noZinedine Zidane.
UPaisley wawunqoba ngonyaka we-1977, ngowe-1978 nangowe-1981 eqeqesha iLiverpool FC yase-England, u-Ancelotti wawudla ne-AC Milan yase-Italy ngonyaka wezi-2003 nangowezi-2007 waphinde wawunqoba ngowezi-2014 neReal Madrid yaseSpain. UZidane yena uwunqobe kulandelana neReal Madrid ngonyaka wezi-2016, wezi-2017 nangowezi-2018.
Okunye okubhewe kuGuardiola ukuthi aphule irekhodi lokunqobisa iMan City i-UEFA Champions League okokuqala emlandweni.
USihlalo waleli qembu uKhaldoon Al Mubarak, eminyakeni edlule wakubalula ukuthi ufuna leli qembu liwunqobe lo mqhudelwano ingakho engathenga noma imuphi umdlali ofunwa umqeqeshi osuke eqeqesha ngaleso sikhathi.
IMan City iya kulo mdlalo nje ihambela phezulu njengoba iyiqede kahle iligi ye-EPL ngokubhaxabula i-Everton ngamagoli amahlanu eqandeni yabe isiqukula isicoco eyasithatha kusasele imidlalo emine ngaphambi kokuthi isongwe iligi. UGuardiola ngoMsombuluko umenyezelwe njengeMeneja (uMqeqeshi) evelele kuligi yase-England, nalapho eqokwe inhlangano i-England’s League Managers Association (ELMA).
“Kungijabulise kakhulu ukunqoba lo mklomelo, futhi akekho ozothi ngenzelelwe ngoba ngivotelwe ngezinye izimeneja. Umklomelo ofana nalona ngeke wawunqoba uma ungasebenzi nabantu abazinikelayo nabahlelekile. Ngingasho ngithi nginenhlanhla enkulu yokuba nethimba elizinikela kanje, lingenzela umsebenzi wami ube lula kakhulu,” kusho lo mqeqeshi waseSpain.
Uthe lo mklomelo uwubhekisa kulona lonke iqembu iManchester City. Ubonge bonke abayingxenye yaleli qembu ngokumeseka njengoba eke wavelelwa umshophi wokuhanjelwa unina ngenxa yokhuvethe.
Umdlalo wokugcina la maqembu etholene phezulu unqotshwe iChelsea FC ngamagoli amabili kwelilodwa owabe ubanjelwe e-Etihad Stadium okuyinkundla yeMan City.
Ekhuluma ngomdlalo wakusasa uGuardiola uthe: “Ngiyayibongela iChelsea FC ngokuthi ikwazi ukufika kulesi sigaba. Lona kuzoba umdlalo onzima kuwona womabili amaqembu, emidlaweni yomlenze wokuqala nowesibili yeligi yasihlula. Lokho kucacisa ngokusobala ukuthi kuzoba umdlalo onjani. Kodwa ngeke ngaqamba amanga iqembu lami ngiyalethemba kakhulu ukuthi lizokwenza kahle kulo mdlalo.”
Uphinde wabalula ukuthi kungenzeka uSergio Aguero adlale umdlalo wakhe wokugcina kuleli qembu njengoba esezoba umdlali weFC Barcelona.
Unompempe ozobe ephethe lo mdlalo u-Antonio Mateu Lahoz.
IChelsea FC kungenzeka iye kulo mdlalo ngaphandle kukanozinti wayo u-Eduard Mendy olimale ngeledlule leli qembu libhekene ne-Aston Villa kowokugcina weligi lapho liguqe ngamabili kwelilodwa.
Omunye umdlali okuqale isonto eziqeqesha yedwa uN’Golo Kante naye olimele.
IThe Blues (iChelsea FC) yagcina ukufika kowamanqamu ngonyaka wezi-2012 lapho yatholana khona neBayern Munich yaseGermany, yanqoba kumaphenathi ngamane kwamathathu. Ngeke ivume ukuphindwa eyakwenziwa iManchester United ngonyaka wezi-2008 iyehlula sekukhahlelwa amaphenathi kowamanqamu.
Abadlali beChelsea FC abazobe bebhekiwe kulo mdlalo uTimo Werner, uChristian Pulisic, uMason Mount, uHakim Ziyech no-Olivier Giroud. Ngasohlangothini lweMan City kulindeleke ukuthi kugqame uKevin De Bruyne, uRiyad Mahrez, uPhil Foden, uRaheem Sterling noBernado Silva.