KWEZINYE IZINGXENYE
E-INDIA:
Leli lizwe ngoMgqibelo linciphise intela ezintweni zokwelashwa ezifana nama-Oxygen Concentrator nezidakamizwa ezisetshenziselwa ukwelapha ukungenwa yisifo ukhuvethe, ngemuva kokugxekwa kabanzi ngezindleko zokunakekelwa kwezempilo ngesikhathi segagasi lesibili elibi laleli gciwane ngenyanga kaMbasa noNhlaba. UHulumeni unciphise intela ku-Oxygen Grade, izifakamoya, amaRemdesivir Antiviral Drug, izihlonzazifo, izilinganisakushaya kwenhliziyo kanye nezinto zokuhlanza izandla kwaba ngama-5% kusuka ema12-18% ngokushesha. Amalevi amasha azoba khona kuze kube sekupheleni kukaMandulo, kusho uNgqongqoshe Wezezimali uNirmala Sitharaman, engeza ngokuthi kuzobandakanya intela ezithandweni zikagesi ezindaweni okushiswa kuzo izidumbu nakumaambulensi. “Ukwehla kwezinga akukwenziwanga kucatshangelwa izindleko (ezimalini zikahulumeni), kwenzelwe ukuthi abantu bathole ukuthula… .isinqumo sesithathiwe sokunikeza iziguli ithuba lokukhululeka,” kusho uNobhala Wezimali uTarun Bajaj etshela inkomfa yabezindaba.
E-EUROPE:
Izwe i-USA libuyile njengomholi obambisanayo wezwe elikhululekile ngaphansi kukaMengameli uJoe Biden, kusho u-Emmanuel Macron waseFrance ngoMgqibelo, okukhombisa ukukhululeka okuzwakale kubalingani abaningi baseMelika ababalulekile ukuthi isiyaluyalu sobumongameli bukaDonald Trump sesiphelile. Ukuphawula kukaMacron kufana nalokho kukaNdunankulu waseBritain uBoris Johnson obonge uBiden ngoLwesine olwedlule ngokuthi “uletha umoya omkhulu omusha”. Akekho phakathi kukaMacron noJohnson abadwebe ngokusobala ukuhlukana phakathi kukaBiden noTrump, yize bobabili bencoma ithoni kaBiden yokubambisana futhi izikhulu zathi kwaba nokukhululeka ngemuva kokuthi uTrump kwesinye isikhathi eshaqise futhi edida abaningi ababambisene naye base-Europe.
EVENEZUELA:
Izikhulu zaseVenezuela zithe ngoLwesine uHulumeni wezwe uhlulekile ukuqedela inkokhelo edingekayo yokuthola imishanguzo yoKhuvethe ngoba ukudluliselwa kohlelolwemali womuthi wokugoma iCOVAX lomhlaba wonke bekuvinjelwe. UHulumeni kaMengameli uNicolas Maduro ezinyangeni ezedlule uthe uhlulekile ukukhokhela uhlelo lweCOVAX ngenxa yokujeziswa yi-United States of America, kwathi ngoNdasa wamemezela ukuthi wenze cishe yonke imali edingekayo eyizigidi ezili-$120. IPhini likaMengameli uDelcy Rodriguez emsakazweni kamabonakude ngoLwesine uthe uhulumeni wehlulekile ukukhokha imali esisele eyizigidi ezili-$10 ngoba kuvinjwe imisebenzi emine. “Uhlelo lwezezimali olufihle indawo yokwamukela izivakashi e-USA, lunamandla okuvimba izinsiza ezingasetshenziswa ukugoma abantu baseVenezuela,” kusho uRodriguez. UNgqongqoshe wezangaPhandle uJorge Arreaza ngokuhamba kwesikhathi ubhale kuTwitter ikhophi yencwadi evela kwaCOVAX ethi ithole imininingwane evela ebhange laseSwitzerland i-UBS ukuthi imisebenzi emine, isamba esiyizigidi ezi-$4.6, ” ivaliwe futhi kusaphenywa.”