Ugqugquzela intsha ukuba ingene kwezolimo
NgokweNational Development
Plan (NDP) ithi ezolimo ingakwazi ukudala amathuba emsebenzi ayisigidi ngowezi-2030, nekukholakala ukuthi kungalima indima emqoka ekutheni kulwiwe nokwantuleka kwamathuba emisebenzi. Ukuvikeleka kokudla kubukeka kuyinkinga emhlabeni wonke jikelele njengoba kubukeka abantu banda emhlabeni. Ngokombiko weNhlangano iSouth Africa Graan Grain uthi e-Afrika isidingo sokudla sizonyuka ngama-70% ngowezi-2050 ngenxa yokwanda kwabantu.
UMnu uDumisani Nhlengethwa ongumlimi aphinde asebenze ukucathulisa intsha enemifelandawonye wezolimo uthi intsha seyiyekile ukuthi ezolimo zithathwa njenge mboni engekho emfeshinini. Uthi okwenza kushinsthe indlela ekubukeka ngayo ezolimo eNingizimu Afrika nokuthi zidlala indima engakanani nase Afrika yonke ngoba umhlaba ongama-60% uyakwazi ukulimeka kulelizwekazi, izibalo ziphinda ziveze ukuthi abantu abangama-70% baziphilisa ngokulima lokhu okwenza ezolimo zibukeke njengento esikwimfashini.
“Okumqoka ukuthi ezolimo zikwazi ukwakha umnotho, ziphinde zikwazi ukuthatha abantu abasha, nesikubona kusabalala kakhulu, lapha sikhuluma ngabantu abangalimi ingadi encane nje kuphela kepha abathatha ezolimo njengamabhizinisi,” kusho uMnu uNhlengethwa. Esengena ekutheni amathuba okuthi amabhizinisi abo aphumelele uthe kuke kugqame ukuthi ukungena kwezolimo kwenzeka kaningana, kepha ukugcina ibhizinisi linozinzo futhi abantu bekwazi ukuziphilisa kubukeka kusanezingqinamba ezikhona.
Uthi ezinye zezingqinamba ezikhona ukucijeka ngokwamakhono, abantu baphinde bangaqondi ukuthi ezolimo ziyibhizinisi, ngaphandle kokuthi umuntu unothando lwaleso silwane noma isitshalo kepha kungukuqonda ibhizinisi. “enye into eyingqinamba ukukwazi ukufinyelela ezimakethe abanye babalimi bayatshala bayafuya kepha ukungena ezimakethe kusanezingqinamba okubala nanoxhaso nesithemba ukuthi ngokubandakanyeka kwabantu abaningi nokumukezelana ngolwazi lokhu sizokwazi ukuthi sikhulume ngakho futhi sikuxazulule sibambisene,” usho kanje.
Uthi izinselelo kwezolimo zikhona ngesikhathi umlimi esakhiqiza kanjalo noma eseya emakethe, nokuyizingqinamba zebhizinisi. “uma ubuka eNingizimu Afrika yonke abantu abaningi bakwisigaba sokuqala okungukukhiqiza nje kodwa igebe elikhulu elikhona ukuba ingxenye kwezomnotho la kuthintwa khona nokuguqula imikhiqizo elihlaza yezolimo, ilapho abantu abasha kubukeka kunamathuba khona amaningi, okungagcini ngokukhiqiza kuphela kepha sekuthuthwa, kuphinde kugcinwe ukudla kusesimweni, noma kuguqulwe kuze kwenziwe umkhiqizo loyo usesimweni esifanele,” kusho yena.
Uthi izinto ezifana nezinkukhu abantu bangakwazi ukwenza amaqanda noma inyama yenkukhu. Uthi amathuba akhona kepha izingqinamba azigcini ekutheni kukhiqizwe kuphela kepha nakuxhasomali kusanezingqinamba.
Kuvamile ukuthi uHulumeni uma exhasa abalimi axhase ngezimbewu kepha imali bangayitholi, ukuze bathenge izinto ezifana nemishini kanye nazo zonke izinto ezisuke zidingeka okuyangokuthi umuntu ukhiqizani. “Uxhaso lwemali ingqinamba ekhona enkulu futhi nengicabanga ukuthi izinhlelo ezikhona ikakhulukazi kuHulumeni kanye nezinye izinhlaka ezihlukene uma bengazenza zisebenze nengicabanga ukuthi emenye yemisebenzi engaphumeleli ikakhulukazi yentsha idalwa izingqinamba ezahlukahlukene okubala phakathi nokungaqeqeshwa, ukungena kwimakethe kanye nezezimali,” usho kanje.
Uthi kumele uHulumeni abe nezinhlelo lapho intsha izozibonakalisa khona ngokwamakhono bebukwa ngeso elibukhali lokuhlinzeka imakethe kanjalo nokuthola uxhaso lwezezimali ukholwa ukuthi bangakwazi ukuthi basebenze eNingizimu Afrika. “Uma ubuka indlela esiwasebenzisa ngakhona amaqanda kanye nezinye izinto la eNingizimu Afrika uyabona ukuthi ziphezulu engikholwa ukuthi izinhlelo ezingabeka intsha phambili zingakwazi ukuthi zilekelele ukuthi umnotho kube ngovulelekile la abantu abasha bezobekwa phambili, nengikholwa ukuthi kuzobuya namathuba omsebenzi. Kugcina kuyikona ukuthi ezolimo kube iwona mkhakha esiwukhuthazayo kungagcini ngokuthi banikezwe imbewu kepha banikezwe imakethe nolwazi,” usho kanje.
Umsebenzi kaMnu uNhlengethwa ukucathulisa intsha esechaza ukuthi umsebenzi wakhe ufinyelela kangakanani entsheni leyo esuke ikudinga lokho uthe; “Ngicabanga ukuthi izinkundla zokuxhumana zisilekelela kakhulu ukuxhumana nabantu abanensthisekelo kulomkhakha njengoba sikwazi nokuxhumana nabalimi abahlukene sithakelane ngolwazi abanye bafunde ukuthi bangenza kanjani nengikholwa ukuthi iyona ndlela yokuqala elula kakhulu yokumukezela ngolwazi.”
Uthe yesibili ilapho uHulumeni nezinhlaka ezizimele kuke kube nezifundo lapho kuqeqeshwa noma kwelulekwa abantu. “okwami kuba ukugqugquzela instha ukuba isebenzise izinkundla zokuxhumana ukuba ikwazi ukufunda izinto ezibalulekile kwezolimo, ngoba uma bezochitha isikhathi ezinganikezeli ulwazi ngezolimo asizokwazi ukufinyelela kulentsha ekumele siyithole ukuthi ingene kwimboni yezolimo,” kusho uMnu uHlengethwa.