KWEZINYE IZINGXENYE
ZAMBIA:
Lowo owayenguMengameli waseZambia uDkt uKenneth Kaunda ungeniswe esibhedlela eLusaka. Kusho isitatimende esivela ehhovisi lakhe sithi uKaunda ucele ukukhulekelwa ukuze alulame. Iyaqhubeka ithi ithimba lodokotela lenza konke okusemandleni ukuqinisekisa ukuthi umphathi wezwe osekhulile uyalulama. UKaunda waba nguMengameli wokuqala wentando yeningi waseZambia ngemuva kwenkululeko ngowe-1964. Lesi sigomagoma esineminyaka engama-97 ubudala wehla esikhundleni ngowe-1991 ngemuva kweminyaka engama-27 eseHhovisi likaMengameli. Ngonyaka odlule, owayenguMengameli waseNingizimu Afrika uThabo Mbeki wahlonipha uKaunda ngosuku lwakhe lokuzalwa ethi ubuholi obukhona e-Afrika kufanele bubheke ifa likayise ongumsunguli waseZambia, uKenneth Kaunda, lapho ebhekene nezinselelo. Siye koshicilela sekuvele izindaba zokuthi sesiwuflathele umhlaba lesigomagoma.
ETHIOPIA:
Izintaba ezisenyakatho ze-Ethiopia zaba yisiqubulo sendlala embulungeni yonke phakathi nawo1980, lapho isomiso kanye nezingxabano kuhlangene kwakha inhlekelele eyabulala abantu abangaba yisigidi esisodwa. Manje indlala isihlasela isifunda saseTigray futhi, kanti iSikhulu Esiphezulu seUnited Nations (UN) siveze ukuthi indlala isetshenziswa njengesikhali sempi. Bangaphezu kwezi-350 000 abantu baseTigray kwizigidi eziyisithupha abaphila ezimeni zendlala, ngokusho kohlaziyo olwenziwe izinhlangano zeNhlangano Yezizwe (United Nations) nezinhlangano zosizo zomhlaba ezibikwe ngesonto eledlule. Cishe abanye abayizigidi ezimbili kusasele igxathu elilodwa ukuthi bangene ekusweleni okunje, kusho iUN. I-Ethiopia iziphikisile lezi zilinganiso.
ALGERIA:
Leli lizwe libambe ukhetho lwePhalamende ngoMgqibelo lokuthi izinhlangano ezibusayo zinethemba lokuthi zizovala ikhasi lodlame lwezepolitiki phakathi nomkhankaso wokulwa nalabo abangaboni ngaso linye nohulumeni , kepha kwathi kushaya izikhathi zantambama baba mbalwa abantu ababevota-nje. Ngemuva kweminyaka emibili imibhikisho eningi eyaphoqa uMengameli ongumakadebona ukuthi ashiye phansi isikhundla sakhe okwaba inkinga yezombusazwe enkulu kakhulu e-Algeria amashumi eminyaka, iziphathimandla zisalwela ukulwa nemibhikisho. Ivoti langoMgqibelo lilandele ukhetho lukamengameli ngonyaka wezi-2019 kanye nenhlolovo yomthethosisekelo ochitshiyelwe ngonyaka odlule, kodwa abantu abaningi base-Algeria basacabanga ukuthi amandla angempela asetshenziswa umbutho wezempi nowezokuphepha. UMengameli u-Abdelmadjid Tebboune uthe izinqumo zithathwa yiningi lalabo abavotile, kungakhathalekile ukuthi yibaphi abazovota. “Lolu khetho luyisinyathelo esisha sokwakha i-Algeria entsha,” esho ngemuva kokuvota ngaphandle kwenhlokodolobha i-Algiers.
TUNISIA:
Amaphoyisa akuleli lizwe aqhumise isisi esikhalisa unyembezi ngoLwesihlanu ngesonto eledlule ukuhlakaza ababhikishi endaweni yaseSejoumi enhlokodolobha ngemuva kwevidiyo yamaphoyisa akhumula futhi ashaya insizwa eyaholela kulaka lezwe . Le vidiyo iholele ekutholeni ukugxekwa ngamaqembu ezepolitiki nezinhlangano ezilwela amalungelo abantu. UNdunankulu uHichem Mechichi uthe amaphoyisa athintekayo kulesiya sigameko sokushawa komfana asusiwe emsebenzini nokuthi kusaphenywa ngesigameko esingemukeleki.