Libonakala liza mawala igagasi lesithathu lokhuvethe eDRC
Izibhedlela enhlokodolobha yaseDemocratic Republic of Congo iKinshasa “zikhungathekile” ngokwanda kwabantu abahaqwe ukhuvethe, kusho uMengameli uFelix Tshisekedi ngoMgqibelo, njengoba izwe lishaywe igagasi lesithathu lalesi sifo. Njengamazwe amaningi ase-Afrika, iCongo ibhalise ngokusemthethweni izibalo ezisaphansi . Kepha leli gciwane selibulale osopolitiki abaningi abadumile, futhi amazinga okugoma aphansi ashiye izwe lisengozini yokutheleleka kakhulu.
Izikhulu zezempilo ziqophe ukuthi abantu abangama-254 sekuqinisekisiwe ukuthi banokhuvethe ngoLwesihlanu, okungenye yamanani aphakeme kakhulu ansuku zonke selokhu kwaqala lolu bhubhane. Sezihlanganiswe zonke izibalo, iCongo isibhalise ukuthi bayizi-35 000 abanokhuvethe kwathi abangama-830 lwase lubabulele.
“Ngizothatha izinyathelo ezinqala ukubhekana nalokhu kunyuka kwalezibalo zabantu abanokhuvethe. Sikhuluma ngalolu khuvethe oluqhamuke e-India kusho uTshisekedi etshela izintatheli, ebhekisa ngqo egciwaneni elihlukile lokhuvethe elibizwa ngeDelta, elaqala ukutholwa e-India futhi elithelelana kakhulu. UMengameli akachazanga kabanzi ukuthi uzothatha ziphi izinyathelo ukuqondana nalesi simo.
ICongo ibambezele umkhankaso wayo wokugoma isikhathi esingaphezu kwenyanga ngenxa yokukhathazeka ngemiphumela emibi kakhulu evela emgomweni i-AstraZeneca. Kusukela ekuqaleni umkhankaso waqala ngenyanga kaMbasa zili-19, kusetshenziswe imithamo engaphansi kwama-30 000 womuthi wokugoma.
“Nazi kahle ukuthi umuthi wokugoma we-AstraZeneca ubulokhu uqhubeka nokuba nezinkinga, lezi zinkinga ezivela ezinhlangothini ezimbili ezibe imiphumela emibi kanti futhi nangokungethenjwa ngabantu,” kusho uTshisekedi.
Abalawuli bezidakamizwa bamazwe omhlaba bathe izinzuzo zokusebenzisa imishanguzo eyenziwe yi-AstraZeneca neJohnson & Johnson zidlula izingozi njengoba bephenya imibiko yokuba ngamahlwili egazi (blood clots) okungavamile kakhulu, kodwa okungaba yingozi.
Ochwepheshe bathi eCongo, ukuntuleka kokuhlolwa kusho ukuthi izibalo zabanokhuvethe kanye nabasebebulewe ukhuvethe kungenzeka zibe phezulu kakhulu kunezinombolo ezisemthethweni. Baphinde bathi izibhedlela azihlonyelwe ngokwanele ukubhekana negagasi elisha legciwane.
“Kunenkinga enkulu yokutholakala komoyampilo (oxygen) eKinshasa,” kusho uPascal Lutumba ovela emnyangweni wezokwelapha eNyuvesi yaseKinshasa.
“EKinshasa, abanendaba abantu nokhuvethe, abakholelwa nokuthi lukhona, inkinga enkulu leyo,” esho, ebhekise kubantu bakuleli dolobha.