Ilumbo noma amabomu?
Le yezinkampani zikaHulumeni ingale kwepolitiki yamaqembu
Esikhathini esingangesonto zintathu izinto ezimqoka ezenzeke kuleli. Eyokuqala kube wukudayiswa ngokusemthethweni kwenkampani yamabhanoyi yakuleli iSouth African Airways. Lokhu kufakazele izinsolo ekade ziqalile zokuthi kukhona uhlelo lukaHulumeni lokudayisa ngamasheya akhe, adayisele izinkampani ezizimele.
Okwesibili ngomhla zili-14 kuqopheke iminyaka engama-25 kwethulwa uhlelo iGrowth, Employment and Redistribution (GEAR) Ngesikhathi lwethulwa kwavela ukuthi uHulumeni ngalo uhlose ukwenza imisebenzi eyizi-400 000 ngonyaka wezi-2020. Lungena nje lukhipha olunye neyabe inhlangano ebusayo ilithengise kubantu iReconstruction and Development Programme (RDP). Sekungumlando ukuthi konke lokhu kuselutalagu nje emuva kweminyaka engaphezu kwamashumi amabili.
Ukuthengiswa kwezinkampani zikaHulumeni nakho ngalezi zikhathi kwake kwankankanywa. Yize kwaba khona inkulumompikiswano, namuhla sekungumlando ukuthi sake saba nenkampani yezindiza iSouth African Airways (SAA).
Injolozelake isikwezinye izinkampani nazo okusobala ukuthi zidonsa kanzima. Ukukhuluma lapha phandle kuthi zikhutshiwe lezi zinkampani ukuze zicoshwe phansi uma sezidayiswa. Okuyishwa abasho njalo ababuthuli ubufakazi balawo manyala uma ngabe ngempela enziwa.
Esesisele nakho zinkinga nje. Kwa-Eskom okwakhona sekulihlazo kanti kudala nolaka kuwo wonke umuntu. Khona okwakobani ukuphelelwa ngugesi likhithikile bese kuthiwa qhubeka ukhokhele lowo gesi.
Okusobala wukuthi lolu sizi esibhekene nalo ngogesi aluyi ndawo, luzoba nathi kuze kube yileyo ndaba. Okunye esikulindele wukuthi yona futhi le nkampani izobe isicela ukukhuphula amanani kagesi okuyobe sekusigojela njengoba isimo sethu njengezakhamuzi siqhubeka siba sibi ngakwezezimali.
Okwenkampani eyenza izikhali iDenel kufikisela amahloni nezinyembezi njengoba kuvela nokuthi abantu kabasayazi imiholo. Okucanulayo lapha yikuthi ubufakazi bokungenzi kahle nokulahleka kwemali kusobala kepha abantu naba sihamba nabo, abekho ezikhindini.
Lokhu kwenza sizibuze ukuthi engabe lokhu okwenzakalayo wukukheqwa ngabomu kwezinkampani zikaHulumeni noma yishwa nje lokukhethwa kwabantu abangawazi umsebenzi. Njengezakhamuzi sinelungelo lokwazi okuyikho.