Abe-ITB, uBukhosi noMnyango abaphumele obala
Ngesento eledlule sibike ngesinqumo esimqoka nesithinta uhlaka loBukhosi, i-Ingonyama Trust Board (ITB). Njengoba sabe sihlonzile, lesi kwabe kuyisinqumo esimqoka nesilandela isimangalo sabeCouncil for the Advancement of the South African Constitution (Casac).
Enye yezinhlangano ehambisana neCASAC eNkantolo iRural Women’s Movement (RWM) ethi ilwela abesifazane basemakhaya. Lezi zinhlangano zabe zifuna iNkantolo iphoqe i-Ingonyama Trust ukuthi ingenzi abantu iziqashi kodwa babe ngabanikazi bomhlaba.
Sekungumlando ukuthi sesiphumile isinqumo nokuthe yize lapho iNkantolo ingavumanga konke obekufunwa ngabamangali kepha okudume kwabezindaba wukuthi odabeni lobunini iNkantolo ichithe abe-ITB. Abanye iNkantolo ebakhombe ngomunwe kube nguMnyango kaNgqongqoshe uThoko Didiza nonikwe izinyanga ezithile ukuthi ulungise lokho iNkantolo ethi konakele.
Njengephephandaba sisifundile isinqumo seNkantolo futhi sinombono othile. Lo mbono siwubona uzokwenza umqondo uma abe-ITB, uBukhosi kanjalo noMnyango bezophawula. Yize samukela ukuthi kungenzeka ukuthi basaxoxa ngesinqumo sikubona kuwubudedengu ukuthi kuze kube kuphela isonto singezwa incazelo ngesinqumo. Phela asikhulumi nje nabo kepha sikhuluma ngamakhulu ngamakhulu abantu abahlala ezindaweni ezingaphansi koBukhosi. Ngenxa yalokho ukuthula nje kungashiwo lutho kuliphutha.
Okunye esithi abakugweme wukuthi bakhulume nomphakathi ngabezindaba bangayi kubo. Usukhona lo mkhuba wokuthi abaholi bangayi kubantu bese becabanga ukuthi izikhangisi lezi seziyibo. Umphakathi udinga aMakhosi, izinduna nabe-ITB bazifikele bona mathupha bezochaza ngokuthi lesi sinqumo sithini ngesimiso sikaZulu.
Lokhu kumele kwenzeke ngokushesha ngoba uma kungenzeki ikhona ingozi yokuthi abantu benyele noma ukukhuluma kuphambane. Ukuhlonipha leyo ngxenye sizonika lezi zinhlaka isikhathi okuyothi uma zehluleka nokuyobe kulishwa, bese singenelela.