Impendulo isekuqondeni ukuthi yini inkinga
Umbhali uthi uHulumeni uyikake lapho ingalele khona odabeni lwentsha kuleli
Selokhu kwathi nhlo kuhlale kunenkulumompikiswano mayelana nentsha emphakathini nasezweni. Ngonyaka we-2004 ngacelwa yinhlangano eyabe ibhekelele ukuthuthukiswa kwentsha, iYouth Development Network ukuba ngenze isethulo. Lesi sethulo sabe sibuka intsha yaseNingizimu Afrika kukhulunyaka ngaphansi kwedemokhrasi. Isethula sami ngaphansi kwesihloko esithi: A Decade of Youth Development: Creating an Enabling Enviroment for Democracy and Development. Uma namuhla ngonyaka we-2021 ngibuka lesi sethulo ngifikelwa wumunyu ngoba cishe konke okwabe kubhaliwe nokwakhushiwo ngabanye esabe senza nabo izethulo akukaguquki kakhulu, empeleni siselapho.
Ngiphindile futhi kwelaboHlanga ngonyaka wezi-2019 oshicilelelweni lwangomhla zili-14 kuNhlangulana ngabhala ngaphansi kwesihloko esithi: Intsha yanamuhla inezinselelo ezehlukene neyangowe-1976 nalapha ngangikhuluma ngomzabalazo wentsha kuleli. Nalapha kuyadumaza ukuthi engabe ngikubeka njengezingqinamba zentsha kuleli zisenjalo nanamuhla.
Kangingabazi ukuthi nakulo nyaka kukhona abanye abenza izethulo ngentsha njengengxenye yesikhumbuzo sangomhla zili-16 kuNhlangulana ngowe-1976. Kulo nyaka kuqopheka uiminyaka engama-45 kwenzeka isehlakalo eSoweto lapho abafundi ababengaphezu kwama-500 abanye abalimala, kwakhona abasala beyizinkubela emuva kokuba bedutshulwe amaphoyisa ayelandela umyalelo wowayephathiswe ezemfundo ngaleso sikhathi. Lo mbhikisho owawuqalwe ngokuthula wagcina usuphela ngesihluku. waqala emalokishini aseSoweto wagcina usubhebhetheka izwe lonke.
Uma sikhuluma ngentsha yanamhlanje ekhule ngaphansi koHulumeni wentando yeningi, sicabanga intsha ekhule sekukhona wonke amathuba, lapho le ntsha yowe-1976 nezishoshovu zomzabalazo ezazikulwela ngoHulumeni wobandlululo sekunqontshiwe, kodwa uma sibuka izibalo zombiko iQuarterly Labour Survey, kukhombisa ngokusobala ukuthi intsha yanamuhla ibhekene nomzabalazo omusha njengoba ngokophenyo kukhombisa ukuthi ayagqoza amathuba omsebenzi entsheni. Esikufunda manje akwehlukile kunalokhu esakutshelwa eminyakeni eyedlule, isibonelo nje ngonyaka wezi-2017 kwabikwa
izibalo zabantu abangasebenzi zikhuphuke ngama-0.5% okwakubeka iNingizimu Afrika njengezwe elihamba phambili emhlabeni ngesibalo sabantu abangasebenzi ngamaphesenti angama-37.
Kuzona lezi zibalo, isibalo sentsha engasebenzi sihamba phambili njengoba uma kwakubhekwa intsha esukela eminyakeni engama-25 kuya kwengama-34 isibalo sentsha engasebenzi silinganiselwa emaphesentini angama-34.2, bese kuthi uma kubhekwa izibalo zentsha esukela eminyakeni eli15 kuya kwengama-24 isibalo sentsha engasebenzi silinganiselwa emaphesentini angama-55.
Lo mbiko awugcini lapho nje kuphela njengoba waveza ukuthi entsheni eswele imisebenzi, izibalo zabesifazane boHlanga abangasebenzi ziphezulu kakhulu uma ziqhathaniswa nabesilisa njengoba abesifazane boHlanga babengamaphesenti angama32.2balandelwe amaKhaladi ngama23.5% bese kugcina abaMhlophe ngama-6.7%.
Ngokwenqubomgomo iNational Youth Policy 2015-2020, okwakuhloswe ngayo ukuqhamuka nezisombululo ezinkingeni ezihaqe intsha okubalwa kuzona, ububha, izinga eliphezulu lentsha engasebenzi, ukusetshenziswa kwezidakamizwa, ezempilo, izinga labatheleleke ngegciwane lengculazi nezinye izinkinga ezibhekene nentsha. Ngonyaka wezi-2020 kwakubekwe ukuthi isibalo sentsha esebenzayo sibe sesikhuphuke sifike ema-14% okuyimanje leli lizwe lisalele ngemuva ngama-12.7%.
Phezu kwalezi zibalo kuphinde kuvele ukuthi ngaphandle kokushoda kwemisebenzi, kunentsha engama-50% ephakathi kweminyaka eli-18 kuya kwengama-24 engenazo izindlela zokuqhubeka nemfundo yamazinga aphakeme ngenxa yokuntuleka kwezimali. Entsheni ebe nenhlanhla yokufunda igogode emazingeni emfundo ephakame, ngokwemibiko yenhlangano ezimele iSouth African Graduates Development Association (Sagda) eyasungulelwa ukusiza labo asebegogodile ukuze bathole imisebenzi kulabo ababe nenhlanhla yokugogoda, abayizi-433 000 kubona bahleli emakhaya neziqu zabo zemfundo ephakeme.
Nakuba zikhona izinhlangano ezasungulwa uHulumeni ngenhloso yokubheka igebe lokungalingani ngokwamathuba entsheni ikakhulu ngokobulili, ziphinde futhi zilekelele intsha ukuba iziqalele amabhizinisi nemifelandawonye okubalwa kuzo izinhlaka ezifana neNational Development Agency eyasungulwa eminyakeni eyishumi edlule, intsha ithi amathemba ayo awasekho kulezi zinhlaka njengoba kumanje ilinganiselwa ema40% intsha ehlezi emakhaya engenayo imisebenzi. Angifisi nokusho ukuthi sikuphi nonayka njengoba ngike ngasho ukuthi siphandle.
Ngabe iwaphi kuyo yonke le minyaka?
Mhlawumbe umbuzo omqoka ngothi kubangwa yini ukuthi uhlelo olwalwa nabadeshi ngaphansi kombuso wobandlululo luqhubeke nokusikhuba ngisho sekuphethe aboHlanga? Yini le uHulumeni angakwazi ukuyenza nokungathi nxa ekwazi engabangula intsha yakuleli iva leminyaka? Owami umbono njengoba ngike ngasho kulo Msombuluko emsakazweni Ukhozi FM, inkinga noma ngithi isixazululo silele ekwazini ukuthi yini inkinga.
Ngokwami uHulumeni kumele amukele ukuthi inkinga ibhekene nentsha yaboHlanga ngqo. Uma evume lokho kusho ukuthi kuzomele nezixazululo zibhekane nale ntsha yaboHlanga. Lokhu kumqoka ngoba ngenxa yokuba nguHulumeni kuba lula ukuthi isimo noma isixazululo asenze sibe ngesikanoma ngubani. Uma esenze njalo kumele amukele ukuthi inkinga kule ntsha yaboHlanga akuyona eyesizukulwane samanje kepha kuxhobelene izizukulwane. Kanjani na?
ENingizimu Afrika namuhla kukhona umumtu ongene esigabeni sokuba yintsha nohluphekayo futhi ongenamakhono. Lo muntu naye uzalwa ngumzali owesilisa noma wesifazane obhukuda kuso lesi simo, naye uyintsha akasebenzi futhi akanamakhono. Naye lo mzali osemncane esikhuluma ngaye ubezalwa ngabantu abaphuma kulolo bishi. Ukuqonda leli qiniso kungenza uHulumeni ayeke ukuyikaka lapho ingalele khona, njengoba ebonakala ephezu kwezinhlelo ezinye ezingumfudumezo wezolo engaguquli lutho olutheni.
Okunye angakwenza ukwamukela ukuthi lesi kulezi zukulwane esengizibalile kumele kube khona okumele asidele, bese elusa lezi ezimbili, khona lapho bese eqelelela ukulungisela leso esingakazalwa. Lesi asidelileyo uyobe esamukela ukuthi ungumama nobaba kuso. Bese lezi ezinye ezihlohla ngamakhono nemfumdo. Izibalo zikhomba ukuthi intsha eningi iphila ngezibonelelo, lapha uHulumeni angathi kulaba ababonelelwa nguye njalo emuva kwezinyanga eziyisithupha akuvuselelwe lolu xhaso ngokuthi umuntu aveze ubufakazi bokuthi kukhona isikhungo abhalise kuso sokufundisa ngamakhono. Ngokwenza lokhu uHulumeni wethu uyobe ulungisa inkinga yamakhono kuleli. Futhi uyobe uyazisiza ngoba uba umuntu esenekhono thizeni usuke esezokwazi ukuba naye aqasheke bese eba ngumkhokhi wentela.
Lezi ziphakamiso zontathu ngibona zingenza abayobe bebhala ngentsha ngeminyaka ezayo bangafani nathi ababhala ngosizi olufanayo bona bayobe sebebika ngezithelo zalokho uHulumeni akutshala manje.