Umbhali unxusa ukuba kubekwe aboHlanga phambili ezweni
Kula makhulukhulu eminyaka edlule kunezimpawu ezithize wonke amazwe aphumelele ekuthuthukiseni izakhamizi zawo zifike ezingeni elithize eliphakeme ngokwesimo sezomnotho, ubuciko nesikompilo anazo. Lapha singabalula amazwe anjenge-USA, iGermany, amazwe aseMpumalanga ne-Asia ikakhulu iChina, muva nje. Yize noma la mazwe ebefunda lukhulu kwabezizwe, kodwa yonke inqubo yabo ibisuselwa ekuzazini, ekuzaziseni nasekuzithandeni bona uqobo kuqala nokwenza izinto ezihambisana namasiko nenqubompilo yabo.
Ngakolunye uhlangothi cishe wonke amazwe ezwenikazi lakithi i-Afrika aqhubeka nokuncela nokuhambisa cishe zonke izinhlelo zabo zentuthuko ngokubukela nokuholwa ngababengabacindezeli babo kanye namakoloni. Kunobufakazi obuqandula ikhanda namhlanje bokudlanga kobubha, izifo, ubuphofu nezinxushunxushu emazweni ase-Afrika emuva kwe“nkululeko” ikakhulu uma uqhathanisa nentuthuko ebonakale emiphakathini yalawa amanye amazwe akwezinye izingxenye zomhlaba engiwabalule ngenhla. Yikho lokhu okungivusele usinga kwathi mangibhale ngiphawule, ngiphose esivivaneni emuva kokufunda imibono yabafundi nababhali beBAYEDE ngezindaba zaseNdlunkulu nezinselelo zenhlupheko nentuthuko ezobhekene nesizwe sonke, ikakhulu lapha kwelikaMthaniya. Ngiphosa nje, elijikayo ngoba ziningi izinto esingazisho okumele zilungiswe noma zenziwe kodwa ngibeka amaphuzu ambalwa okungasiza uma ngabe iNgonyama nabasizi nabeluleki bayo begxila kuwona ukusiza isizwe siye phambili.
Ngicela ukuphawula ngiqhubeke lapho kugcine khona ababhali (SC Sithole) nabafundi beBAYEDE ngokumele iSILO uMisuzulu sikwenze futhi sibhekane nako ukuthuthukisa nokuxazulula izingqinanmba ezibhekene noZulu wonkana. ISILO Samabandla kumele sibe yisibonelo futhi sibe umholi kubo bonke abaphathi bomphakathi kwezamabhizinisi nakwezepolitiki kuloku okulandelayo:
Zonke izinqumo ezenziwayo nezinqubo ezithathwayo kumele zilawulwe imigomo yokubeka phambili izimfuno, izidingo nentuthuko yaboHlanga kuqala okunye kulandele kamuva.
Kumele bonke abantu boMdabu ezindaweni ezihlukene babe nezindlela ezilula nezishibhile zokuxhumana bebodwa kanye nokuxhumana nomhlaba jikelele. Ngakho kubalulekile ukwakha, ukugxumeka nokusabalalisa ingqalasizinda yezokuxhumana (imigwaqo, izitimela, ezomoya nezamaselula) neye inthanethi esezingeni eliphezulu kuzo zonke izifunda zesifundazwe sakithi ngokushesha.
Imfundo ekuwo wonke amazinga (kusuka ezinkulisa zabantwana kuya ezikhungweni eziphakeme) ayisuke esizindeni sokuzigqaja kwethu njengabantu belengabadi ekuzithuthukiseni kwethu nasekuxhumaneni kwethu nokuthuthukisa umhlaba wonkana.
Ezempilo nezokwelapha zibaluleke kakhulu kunoma yisiphi isizwe. Umashayabhuqe wengculazi kanye nenhlekelele kakhuvethe muva nje, bakubeke ngokusobala ubumqoka bolwazi bokulapha kwendabuko kulelo nalelo lizwe; kanye nokusebenza kolwazi olusha lwezesayensi yaseNtshonalanga nakwamanye amazwe. Ukusebenzisana nokucobelelana ngolwazi kuzo zonke izinhlaka ngenhloso yokulwa nezifo, ukwelapha abantu baphile babe nempilo engcono yiko kuphela okumele kulawule hhayi ukuthi iluphi ulwazi noma isisekelo solwazi olungcono kunolunye ngenxa yobuzwe nemvelaphi yalo. Ngakho-ke abalaphi nezazi zemithi nezindlela zendabuko neqhaza labo ekulweni nezifo zansuku zonke kanye neziwumbhedukazwe (njengengculazi nokhuvethe) kumele kubekwe eqhulwini.
Amaciko, ezemidlalo nezokungcebeleka ngenye yezingxenye ezibalulekile zempilo nentuthuko yesizwe. Kubalulekile ukuthi kube nomhlahlandlela owumgomo okumele zonke izinqubo nezinqumo ezikule mikhakha zakhelwe ngaphansi kwayo. Lokhu kunganqanda lokhu kunhlanhlatheka nokudideka esikubona esizweni sakithi namhlanje, ikakhulukazi entsheni. Izikhangisi zamabhizinisi, imidlalo yeshashalazi, izindaba, umculo, izingoma nokunye esikubona emisakazweni, kuma thelevishini, emaphephabhukwini nase maphepheni konke kunemithelela futhi kuncike kakhulu ekuthuthukeni kwesizwe nobuqotho baso. Isibonelo nje: Ukudicelelwa phansi nokululazwa kolimi lwesiZulu emsakazweni wesiZulu u-Ukhozi FM . UKhozi FM sekwaba umsakazo wesiZulu ngegama nje leli elikhulu ihlazo nechilo okumele abaphathi bezwe nabesizwe balusukumele ngokushesha ngaphambi kokuthi lubhebhetheke lungabe lusanqandeka. Mhla ngathola isikhathi nethuba ngiyocacisa ubudlelwane phakathi kolimi nokuthuthuka kwesizwe noma kwabantu kwezomnotho. Ngiyobuye ngiveze futhi ukuthi akukho nelilodwa izwe emhlabeni elake lathuthuka lincike olwimini lwabezizwe, ikakhulu labo ababelicindezele. Empeleni esinye sezizathi zokungabi bikho kwentuthuko ezwenikazi lakithi i-Afrika yiko loku ukuthi sisebenzisa futhi siqhakambisa izilimi zezifikanamthwalo. Abanye bakithi baze basho ngokukhulu ukuziqhenya ukuthi “ngizodlani ngesiZulu, sizongenzelani isiZulu, angidli amasiko mina”. Lobu ubufakazi obubuhlungu bokulimala nokukhubazeka kwengqondo yomAfrika okungaselapheki.
Ngamafuphi, ngingajabula uma iSILO neNdlunkulu benza isiqiniseko sokuthi aboHlanga abasali ngemuva futhi kuba yibo abahamba phambili entuthukweni yezobuxhakaxhaka kulezi zimboni nezizinda ezilandelayo: “Internet of Things, Digitisation, Connectedness”; kanye nezolimo ezisezingeni lesimanje neliphezulu ezizoqiniseka ukuthi sikhiqiza ukudla okwanele minyaka yonke ukondla isizwe nokuwhebelana nezizwe esakhelene nazo.