Akazutotoswa nokho isithunzi esimfanele uzosinikwa - uLamola
UNgqongqoshe Wezokuhlumelelisa Izimilo kuleli uthi obenguMengameli wakuleli uMnu uJacob Zuma ungumqemane kanti futhi ukhombisa ukukhululeka ejele.
Ekhuluma nabezindaba izolo ngaphandle kwasejele laseMtshezi ngemuva kokubona uZuma, uLamola uthe ithimba labo lezempilo limhlolile uZuma lathola ukuthi uphile saka.
“Usidlile isidlo sakhe sasekuseni kanti futhi uyayidla nemishanguzo eqondene nesimo sempilo yakhe,” kusho uLamola.
ULamola uthe ukuboshwa kukaZuma akumele kube yisikhathi sokujabula kwabanye.
Uthe ngenxa yokhuvethe olugubuzele izwe nomhlaba wonke, uZuma uzohlala egunjini lakhe yedwa ejele izinsuku ezili-14.
“Sizolokhu sisibheka isimo sempilo yakhe ukwenza isiqiniseko sokuthi usesimweni esikahle njengoba esejele,” kusho uLamola, wengeza ngokuthi lokhu abakwenzi kobenguMengameli kuphela kodwa bakwenza kuzona zonke iziboshwa uma zifika ezikhungweni zabo.
ULamola uthe uZuma angakwazi ukufaka isicelo sokuthi isigwebo sakhe sincishiswe uma esedonse isigamu sesikhathi anikwe sona.
Ukuqinisekisile ukuthi uZuma ngeke aphathiswe okweqanda ejele kodwa wathi uzonikezwa isithunzi esimfanele.
UZuma unguMengameli wokuqala wedemokhrasi ukuthi aboshwe emveni kokutholwa enecala lokudelela inkantolo. Lokhu kuze ngemuva kokuthi anqaba ukuyokwethula ubufakazi kwiKhomishini ephenya ngokugwamandwa kombuso.
Izolo ithimba labasondelene noZuma okubalwa kubo umkhulumeli weMKMVA omisiwe uMnu uCarl Niehaus bavakashele ejele laseMtshezi beyobona umholi wabo.
UZuma uzinikele njengoba kade esenengcindezi kulandela ukuthi bese siphela isikhathi abenikwe sona, namaphoyisa esevivela ukumbopha.
Ekhuluma nabezindaba uNiehaus uthe kubuhlungu ukuthi isishoshovu somzabalazo sigqunywe ejele ngesikhathi sedemokhrasi.