Yebo sisho ngazwi linye ukuthi naboHlanga bangabantu
Namuhla njengephephandaba sithathe isinqumo okungenzeka ukuthi singahle sisidalele amazinyo abushelelezi kungaqali. Namuhla siqome ukuqhubeka nalokhu esihlale sikwenza njalo; okuwukuma naboHlanga. Izigameko zakamuva lapho aboHlanga abegcweleze khona ePhoenix akwehlanga kahle kithi. Akwehlanga kahle ngenxa yendlela abagetshengwe ngayo ngabantu abebethi “bagcina umthetho” kepha akwehlanga kahle ngoba kube sobala ukuthi abebekufela yibala labo.
Beziphungela ababulali bathe bebezama ukuphunga izigebengu ezitapa imphahla. Abanye bathi bebevikela umphakathi wabo wamaNdiya. Zombili lezi zimpendulo zishiya imibuzo. Okokuqala izidumbu lezi azitholakalanga eduzane komuzi womuntu, ithilomu noma inxanxathela yezitolo. Lokhu kwenza kube lukhuni ukukholwa ukuthi “bekuvinjwa” izigebengu. Okwesibili asizwa kuthiwa babulawa nje bese bebanjiwe beyiswa emaphoyiseni ngoba bebile kepha okusobala yikuthi bahlangane nokufa kude. Njengezinyamazane abanye kuvela ukuthi batholakale nasemihosheni.
Okusixakayo wukuthi lesi sehlo sibukeka sithathwa kancane okumqoka yikuthi “akube nokubuyisana nokuthula”.
Yebo sonke sisho njalo kepha siyabuza ukuthi kuyocoshakala kanjani ukuthula manxa iqiniso lingakhulunywa? Ngalesi sikhathi esinzima nesibuhlungu sinxusa ukuba uhulumeni wethu angasenzi lemihlola esenziwa ngesikhathi sikaHulumeni kaMhlonishwa uMandela ngesikhathi sidlala iKhomishana yamaQiniso eyathi izobheka udaba lokubulawa kwaboHlanga wamaDlagusha.
Imindeni yalabo ababulewe, imiphakathi yabo nesizwe siyadinga ukwazi ukuthi kwenzakalani. Lokhu kuyoqinisekiswa wukuthi sonke seluse ukuthi uphenyo lolu luhamba kanjani, liphethwe ngobani kuphi , batholani nokuthi isiphetho siyothini.
Njengephephandaba laboHlanga sizibophezele ukulwelusa loludaba. Nawe siyakumema ukuba ungathuli, ungadikibali kepha ufake ingcindezi kwabaphenyayo nakuhulumeni ukuze ekugcineni umhlaba wazi ukuthi phezu kwenhlupheko, ubumba aboHlanga nabo bangabantu. Kosopolitiki sithi le ayidingi koniwa yibo ngoba sibabhekile. Kuhulumeni sithi akukho ukuthula kwangempela manxa lingekho iqiniso. Sethembisa ukuthi kuyothi lapho amakhamera nabezindaba nosopolitiki sebehambile, thina sizoqhubeka sime nemindeni nemiphakathi elahlekelwe.