Uzimisele ngokunqoba izindebe nelaseKapa uMayo
Ukudlala amasizini amathathu kwiGladAfrica Championship, kumkhulisile kakhulu
Umqhudelwano womkhumulajezi ongaphansi kwePremier Soccer League (PSL) iNedbank Cup, ungumqhudelwano odlale indima enkulu kubadlali abaningi ukuthi bekwazi ukubonakala ebholeni elikhulu lapha eNingizimu Afrika.
U-Andile Jali ongumdlali weMamelodi Sundowns ungomunye wabadlali abagqanyiswa ilo mqhudelwano edlalela iPretoria University egijima kuGladAfrica Championship.
Umdlali osanda kuvela ukuthi usayiniswe iqembu laseKapa iCape Town City uKhanyisa Mayo, naye uthola amadlelo aluhlaza nje ingoba wenze kahle kulo mqhudelwano odlalwa amaqembu angama-32.
UMayo ngesizini edlule ubegijima kwiRichards Bay FC egijima kuGladAfrica Championship. Wadlala imidlalo emithathu wavalela phakathi amagoli amabili, amaqembu amaningi ase aqala ukumlandela. Ekupheleni kwesizini waklonyeliswa ngendondo ye Nedbank Cup Most Promising Player.
Ubambe iqhaza elibalulekile kuNatal Rich Boyz njengoba iqede endaweni yesithathu ku-logi, yakwazi ukudlala imidlalo yokuhlungela ukungena kuDStv Premiership kodwa yahluleka ukuyinqoba. Emidlalweni yeligi udlale engama-21 washaya amagoli ayi-7.
Lo mgadli oneminyaka yobudala egama-22 ubalule ukuthi uzimisele ngokuthi akhule kwiCape Town City aphinde anqobe nayo izindebe.
UMayo ongowokuzalwa eMtata uyindodana endala yomgadli osewathatha umhlalaphansi owaba ngumgadli waphinde waba isitobha uPatrick Mayo, owazakhela udumo kuMthatha Bucks, iSupersport United, iKaizer Chiefs, iThanda Royal Zulu neBay United kanti wadlala nakuBafana Bafana.
“Ngicabanga ukuthi imivuzo yami yokusebenza kanzima ibe yinhle kakhulu, iqiniso ngibe nesizini enhle kwiGladAfrica. Ngicabanga ukuthi ukujoyina kwami iCape Town City kuzongakha njengomdlali. Nginesiqiniseko sokuthi ngizothuthuka njengomdlali” kusho uMayo
Amasizini amathathu egijima kuGladAfrica azomenza ekwazi ukubhekana nobunzima bakuDStv Premiership, ugijime ku-Ubuntu Cape Town, iRoyal Eagles nayo iRichards Bay FC.
Ukhule edlala kwizinkulisa zeSupersport United, uke wayozama inhlanhla kwiBenfica FC nakwiSport Libson okungamaqembu asePortugal kodwa izinto zangalunga.
UMayo ubona iCitizens njengekilabhu lapho angazuza khona izindebe njengomdlali. iCity eyasungulwa ngonyaka wezi-2016 isinqobe izindebe ezimbili kuPSL okuyi-Telkom Knockout ngawo unyaka wezi-2016 kanye neMTN8 ngonyaka wezi-2018.
“ICape Town City iyikilabhu enkulu. Ikilabhu ezuze izinto ezinhle kule minyaka edlule yasungulwa, ngalokho ngizizwa ngikuthokozela ukujoyina leli qembu. Ngibheke ukuzuza izindebe eziningi naleli qembu” kusho uMayo.
UMayo egijima kwinkulisa yeSuperSport United, u-Eric Tinkler oqeqesha iCape Town City manje uyena owayeqeqesha iqembu elikhulu Wayelithola ithuba lokuzilolonga neqembu elikhulu ingakho ekujabulela ukuphinda asebenzisane naye uTinkler.
“Ngike ngasebenza nomqeqeshi uTinkler phambilini kwiSuperSport. Bekuyinto enhle ukuqeqeshwa nguye yize bengingasitholi isikhathi esiningi sokudlala ngaphansi kwakhe. Kodwa uyakholelwa kubadlali abasebancane abanezifiso nabaqotho emsebenzini. Ngikubheke ngabomvu ukuphinde ngisebenzisane naye lapha kwiCity” kusho uMayo.
Abanye abadlali abasayiniswe iThe Citizens uDarren Keet, uBongani Mpande, uPatric Fisher, uKatlego Mokhuane nesitobha saseDemocratic Republic of Congo (DRC) uNathan Fasika.