Imilayezo ephathiswa izinhlaka neminxa ethintekayo kumatikuletsheni
Ukuphuma kwemiphumela kamatikuletsheni iza nenkulu ingcindezi kulabo abasuke belindele imiphumela yabo. Abazali basuke balindele imiphumela emihle, abangani kanye nezihlobo zisuke zikugade ngabomvu amehlo. Leso simo angisifiseli muntu futhi ubuhlungu bokungaphumeleli ngibazi kahle. Ngikhumbula ngenkathi ngilinde imiphumela kamatikuletsheni wami wokuqala. Wonke umuntu wayejabulile ngaphandle kwami. Ngicabanga ukuthi ngangizwa egazini ukuthi kubhedile. Nganginaso isifiso sokuthi kuphume imiphumela emihle noma ngangibonile ukuthi unyaka wonke awuhambanga kahle. Akulaleki uma ulinde imiphumela kamatikuletsheni. Okwakunzima ngonyaka esenza ngawo umatikuletsheni ukuthi imiphumela yayikhishwa emaphephandabeni futhi kwakubhalwa igama lakho, okusho ukuthi wonke umuntu owazi igama lesikole sakho kanye negama lakho wayekwazi ukubona ukuthi uphumelele noma awuphumelelanga.
Umlayezo kubafundi
Ngiyakubongela ngokufunda kanzima uze ufike kumatikuletsheni. Kunabantu abazamile bangafiki ngisho ukufika lapho ufike khona. Abanye babangani bakho bashayekile, bashaywa izinkinga eziningi ezifaka phakathi ukukhulelwa, ukhuvethe kanye nezinkinga emindenini. Ungakuthathi kancane ukufika kamatikuletsheni ngoba kuyinto enkulu. Ngiyazi ukuthi into oyilindele ukuphumelela ngamalengiso kodwa mina ngikubona kuyimpumelelo enkulu ukuthi besikulindele ephepheni. Ungavumeli ingcindezi eza nemiphumela yamatikuletsheni ikwenze ukuthathe kancane ukusebenza nokuzimisela kwakho.
Umlayezo kwabangaphumelelanga
Ngiyazi ukuthi wonke umuntu uzokutshela ukuthi ungalilahli ithemba futhi ukungaphumeleli akusiko ukuphela kwempilo. Nami ngizogcizelela kulokho abakushoyo, kodwa umehluko wami nawo wonke umuntu ukuthi ngiyabazi ubuhlungu odlula kubo njengamanje.
Ngaphinda amabanga amathathu ngaphambi kokuphothula iziqu zami zobudokotela. Ngicabanga ukuthi lokhu kuzokunika isithombe sokuthi ukungaphumeleli akusiko ukuphela kwempilo. Ukube ngaphonsa ithawula ngabe awusifundi lesiqephu sanamuhla. Ubuhlungu bokubona ontanga bakho bejabule wena ungajabule kubuhlungu futhi ngiyayazi ingcindezi eza nokungaphumeleli kumatikuletsheni. Okubalulekile ukuthi ungalilahli ithemba. Emkhankasweni i#MatricUngazibulali ngigcizelela khona ukungazibulali futhi ungabulali iphupho lakho lokufunda uphothule iziqu zakho ukuze uthole umsebenzi. Usengalungisa izifundo zakho ukuze uphumelele ngonyaka ozayo. Angeke ngathi buyela emuva esikoleni njengoba ngenza mina kodwa usengabhala izifundo ongaphumelelanga kuzo. Uma ufuna ukulungisa izifundo zakho, faka imininingwane yakho kulewebhusayithi www.sanelegamede.com/upgrading kukhona ozokushayela ucingo akucazele.
Umlayezo kwabaphumelele
Ngiyakubongela ngokuphumelela kumatikuletsheni. Anginandaba ukuthi uthole imiphumela enjani, into engijabulisayo ukuthi uphumelele. Ungavumeli abantu abaphumelele ngamalengiso bakubukele phansi. Lokhu okutholile kungangamandla akho futhi kungumsebenzi wakho. Siyaziqhenya ngawe futhi sikufisela inhlanhla kulo nyaka. Uhambo lwempilo seluqalile, Okubalulekile ukwazi ukuthi ufuna ukuba yini noma ufuna ukufundelani. Ngiyethemba ukuthi uzifakile izicelo zokufunda ezikhungweni ezahlukene. Into engifisa ukuyigcizelela kuwe ukuthi uphume uyofuna isikhala kulokhu ofisa ukukufundela. Uma ungazi ukuthi ufuna ukufundelani noma ungazi ukuthi ikhethwa kanjani imikhakha yezemfundo vakashela lewebhusayithi www.sanelegamede.com/career ukuze ufunde ukuthi ikhethwa kanjani imikhakha yezemfundo. Into engizwisa ubuhlungu, njengomeluleki wabantu abantu abasha kwezemfundo, ababantu abafundela nanoma yini ngenxa yokungazi ukuthi bakhetheni, abanye bakhetha nanoma ngabe yini ngenxa yokwesaba ukuthi abangani bazothi uyisehluleki uma uhleli ekhaya ungafundi. Enye ingcidezi izoqhamuka emndenini kanye nakomakhelwane, kodwa ayingakwenzi ukhohlwe ukuthi ufuna ukuba yini. Uma bewufuna ukuba nguthisha kodwa wangathola amaphuzu anele ukuze ufundele ubuthishela, lungisa izifundo zakho kunokuthi uthathe nanoma ngabe ngumuphi umkhakha.
Umlayezo wabazali nomphakathi
Singabazali kanye nomaphakathi sivamise ukufakela izingane zethu ingcindezi ngalesikhathi sonyaka. Sisuke silindele ukuthi zonke izingane ziphumelele futhi sisuke sesichomele wonke umuntu ngokufika kwazo kumatikuletsheni. Ungathi sivele sikhohlwe nokuthi kukhona ukungaphumeleli. Izingane ziyasesaba njengabazali, besaba ukuthi sizobathethisa futhi sibashaye uma bengaphumelelanga. Kungakho abanye babona kuncono ukuthi bavele bathathe umphefumulo wabo. Ngicela sibanike uthando kanye nokubeseka kulesikhathi. Kubalulekile ukuthi bazi ukuthi siyabathanda noma bengaphumelelanga. Asiyeke ukubakhethela imikhakha yemfundo labo abaphumelele. Ukuthi unguthisha, akusho ukuthi ingane yakho kumele ibe nguthisha. Kubalulekile ukuthi sibaluleke lapho singabeluleka khona. Ukuthola umuntu onolwazi ngokukhethwa khwemikhakha yemfundo kubalulekile kunokuthi izwe ngawe ukuthi ayifundele ini.
Umlayezo woMnyango Wezemfundo
Angifisi ukuzwakala sengathi ngiwushayela umthetho umnyango wezemfundo, kodwa njengomeluleki wezingane, ngiyafisa ukuthi umnyango kanye nezisebenzi zawo zonke, ubambisane nezingane. Ayikho into ecoba amandla ezinganeni edlula ukuhlukumezeka kanye nokunganakwa kwezidingo zabo esikoleni. Izingane eziningi zisuka emakhaya lapho kungenamzali, okusho ukuthi uthisha uphenduka umzali enganeni uma efika esikoleni. Asiwuhloniphe umsebenzi wethu, sibathande esibafundisayo. Isibalo sabantu abangaqashiwe sande kakhulu futhi iningi laso isibalo kunabantu abangasiqedanga isikole kanye nalabo abangaphumelelanga kahle ngenhla yokungalitholi ithuba lokunakelelwa uma befika esikoleni.
UMnu uSanele Gamede: UMqeqeshi WezeMpilo Yabantu Abasha Nezemisebenzi