OweSADC ufuna kuphuthunyiswe uzinzo nokuthula eMozambique
USihlalo weSouthern African Development Community (SADC) ophinde abe nguMengameli waseMalawi, uDkt uLazarus Chakwera, uthi lesi sifunda akumele nje sigcine ngokuqeda amaphekula eCabo Delgado, eMozambique, kodwa kumele kube nohlelo oluphelele lokwakha kabusha ingxenye esenyakatho yezwe. Ekhuluma emhlanganweni wezinhloko zezwe zeSADC eMalawi lapho kuzobhekana khona nobushokobezi kanye nodlame eMozambique, uChakwera usephonsele inselelo ezinhlelweni zokwakhiwa kabusha kweCabo Delgado.
Uthi lokhu kubalulekile ekuqinisekiseni ukuthi abantu abakhahlanyezwe wubushokobezi bayasizwa eMozambique. “Osekusele manje ukuthi sihlale siqinile, sibambelele ndawonye futhi ngeke sihlehle indlela yethu kufanele ibe yeningi futhi iphelele, igxile futhi sidinga ukuba nohlelo lwangemva kwengxabano ukuze sakhe kabusha futhi ngiyabonga ubuholi bukamengameli uJacinto Filipe Nyusi kanye nohulumeni waseMozambique ngokwethula uhlelo olunzulu lokwakha kabusha iCabo Delgado,” kusho uMengameli uChakwera.
Ngaphambi komhlangano wokugcina weziNhloko zemibuso yeSADC, uMengameli Cyril Ramaphosa, ohola uphiko lwenhlangano yesifunda yezepolitiki, ukubambisana kwezokuVikela kanye nezokuphepha, uveze ukuthi ubushokobezi akumele buvunyelwe ukuthi buqhubeke kahle esifundeni. ISADC ithi ifuna kube nokuthula nokuzinza kuwo wonke amazwe angamalungu.
“Le ngqungquthela engajwayelekile ihlinzeka ngomkhombandlela wokulwa nobushokobezi eCabo Delgado futhi inqande noma yikuphi ukuchitheka okungase kube khona kulesi sifunda futhi siyaqonda ukuthi sisesimweni esiphuthumayo,” kusho uNobhala Omkhulu weSADC u-Elias Magosi.
Sekuphele cishe izinyanga eziyisithupha iSADC ithumele umsebenzi wayo wokuqeda ubushokobezi eMozambique. Abaholi bathi bazimisele ukubhekana nesihlava sobushokobezi kanye nodlame. UMengameli waseMalawi, uLazarus Chakwera, uthe umbutho weSADC Mission eMozambique ngeke uhlehle kuze kube isimo sesilawulekile. Uthi umbutho wamasosha wesifunda uzoqhubeka nokusebenzisana noMbutho Wezokuvikela waseMozambique ekuqedeni ubushokobezi kanye namavukela mbuso esifundeni esisenyakatho yeCabo Delgado. UChakwera ukusho lokhu ngesikhathi sokuvalwa kweNgqungquthela yezinhloko zamazwe eSADC eLilongwe, ngoLwesithathu. Le Ngqungquthela inqume ukwelula umkhankaso owawuphelelwa yisikhathi kuleli sonto ngezinye izinyanga eziyisithupha.
UChakwera uthi iSADC Mission eMozambique (SAMIM) kumele iqhubeke futhi ibone ukuthi ukuthula nozinzo kuyabuyiselwa esifundeni iCabo Delgado: “Indlela yethu yokwenza lo mkhankaso kumele iqhubeke ihlanganisa izinhlangothi eziningi futhi iphelele. Akumele nje igxile ekunciphiseni usongo kodwa futhi ibe nohlelo lwangemuva kokungqubuzana lokwakha kabusha..” Intando yezombangazwe yokwenza ngcono ukusebenza kwaphansi ibonakala ikhona kodwa izohumushela umgomo onezinsiza ezingcono.
Le Ngqungquthela iphawule izinselelo iSAMIM ebhekene nazo maqondana nokushoda kwezimali kanye nokungatholakali kwemishini okuhlanganisa nezindiza. Amazwe angamalungu avumelene ngokuthi azothola imali edingekayo ukuze umsebenzi oqinile we-1 000 ube yimpumelelo. Iphuzu elibuhlungu ngomkhankaso wesifunda ukuthi uMbutho Wezokuvikela waseRwanda ubonakala uzuze kangcono eCabo Delgado futhi unobudlelwane obuqinile neMaputo. Ngempelasonto – iRDF kanye nesikhulu samasosha aseMozambique bahlangane ukuze badingide indlela eya phambili.
Umhlangano awuzange uhlanganise iSAMIM - into abahlaziyi bezokuphepha abayibheka njengephutha elikhulu futhi ngokombono wezombusazwe, iDiplomatic Faux Pas.
Igunya leSAMIM leluliwe izinyanga ezi-3 ngokuhambisana neSimo 6 sohlaka Lokusebenza Lokusekela Ukuthula KweNhlangano Yamazwe ase-Afrika. Kusukela ngoMbasa - ukuthunyelwa kuzoba ngaphansi kweSimo 5; okusho amandla anezinhlangothi eziningi.
Khonamanjalo, iSAMIM isiphothule imisebenzi emibili emikhulu esifundeni saseMacomia eqale ngoMfunfu kwaze kwaba sekuqaleni kwalo nyaka. Kwabulawa amaphekula angama-31 kwathi izisekelo ezimbalwa ze-Al Sunnah wa Jama’ah zacekelwa phansi. Lo mkhankaso uthi usebenzisana namasosha aseMozambique ukuze bakwazi ukubuyisela izigodi kubantu.