Usizi lwaboHlanga: Zivulwe kungekho bungcono kunalokho yinhlupheko phezu kwenye
Uqalile umshikashika wokuvulwa kwezikole ngesonto eledlule iNingizimu Afrika yonke. Emgwaqeni kuyaphithizela, izindlela ziyaphaphambana ilabo nalabo abafundi baya ezikoleni ezehlukahlukene kulo lonke elakuleli.
Kuliqiniso ukuthi imfundo iyisikhiye sempumelelo kanti nekusasa lezwe lincike kuyona, kepha izingqinamba nezinselelo abafundi boHlanga abedlula baphinde babhekane nazo nsuku zaphuma ngenhloso yokuthola le mfundo, zikushiya ubambe ongezansi.
Kwamanye amaphepha kuyabonakala kukhonjiswa osaziwayo, osopolitiki bephelezela izingane zabo ngosuku lokuqala ziya esikoleni zisuke zijabule kwazise phela azibazi lobubuhlungu obubhekana nentsha eningi yaboHlanga.
Kwejwayelekile ukuthi imindeni yaboHlanga ibe mikhulu ibe nezingane ezine kuya phezulu ezifundayo.
Ukuhlala nezihlobo ekhaya elilodwa ngenxa yezimo ezehlukene zempilo nakho kwejwayelekile, ngaleyo ndlela kuyasizwana. Yize isimo sinzima kodwa imindeni eminingi yaboHlanga iyabuqhuba ubuntu ngokuthi ithathe izihlobo izozihlalisa ndawonye.
Ukuvuka kusempondozankomo, kubangwe amanzi okugeza nawo atholakala kanzima nendishi iyodwa okanye zimbili. Konke lokhu kwenzeka ngenxa yokutatazela ukuya esikoleni kungamahlalakhona.
Ukudla okusale ngayizolo (umfudumezo) ugcina ukushebe nezinyembezi, noma kwakhona lokho kudla kugcine kuphela ungakutholanga ngenxa yabantu abaningi abasuke bekufuna. Kwesinye isikhathi uphuze umbhubhudlo noma amanzi maqede ungene indlela eya esikoleni, kuyindlela abafundi abaningi boHlanga abaqala ngayo usuku lwabo.
Uma kwenzekile waswela, uzwa ngabanye abafundi sebememeza esangweni lakwenu noma egcekeni bekukhumbuza ukuthi iseyinde indlela esazohanjwa kuyiwa esikoleni. Basuke bebona indlela esazohanjwa, becabanga nomhosha abasazokwedlula kuwona odinga ukuthi babe yiqulu uma bezokwedlula ngakhona. Ngaphandle kwalokho basuke befuna ukuba yiqulu nje ngoba befuna ukuthi bekwazi ukubhekana nezinye izigameko endleleni, okungaba izinswela bona ezinezinhloso ezithize.
Ukuhamba emgwaqeni owubhuqu, kwenza ufike esikoleni usumthuqasi nezicathulo sezingasabonakali ukuthi zike zawuthola upholishi. Zinjalo nje lezo zicathulo azikho zintsha nakhona umfundi uphiwe othize kwazise isimo ekhaya simbi.
Ukuphatha inkece uya esikoleni amaqabuqabu. Suku lunye uma kwenzekile kwakhona okuzwelayo ekhaya wakupha upondo, uzizwa ngalolo suku ungusozimali kuvela ngisho elomhlathi kwazise usuke ubo ukuthi nawe ngelisese uzothenga njengezinye izingane. Kodwa ngenxa yezinsizwa thizeni ezingamabhokolo futhi ezikhulile ugcina ungayisebenzisanga leyo nkece ngoba lamabhokolo avele ayithathe.
Lokhu kungezinye zezinselelo ezimbalwa ezenzeka kumfundi izinyawo zakhe zingakafiki emagcekeni esikole. Usizi olubhekana nabafundi boHlanga ezikoleni zasemakhaya nasemalokishini lubukeka luyinto engakanqandeki neyenza kube lula kakhulu ukuba abafundi bathathe izindlela ezinqamulelayo zempilo zokubhekana nempilo okubalwa kuzona ukuyeka isikole. Nokwenza imisebenzi engaholeli ngendlela egculisayo.
Lonke lolu sizi luqhubeka kubafundi boHlanga nje kulo nyaka iNingizimu Afrika izoqeda iminyaka engama-28 yathola “idemokhrasi”. Okubuhlungu ukuthi uma kuvotwa izibalo ziveza ukuthi aboHlanga yibo abavota kakhulu, kodwa kuhlomule abathize.
Kuthi abafundi sebebhekane nobunzima basemakhaya, nasezindleleni ezibheke esikoleni baphinde babhekane nezimo ezingaphezulu futhi ezikoleni.
Izikole eziningi izakhiwo zakhona kakhulukazi ezasemakhaya zikushiya ubambe ongezansi, ezinye izakhiwo zakhona ziyabonakana ukuthi zingawa noma inini. Kwezinye kufana nokuthi kufundwa phandle amawindi awekho, ebusika amakhaza aqala kubona aze aphelele kubona kunjalo nje khona abafundi abagqoke amajezi amadala.
Kuthi kunjalo uthole ukuthi igumbi ngalinye kunabafundi abangaphezulu kwabangama-40 izincwadi ziyashoda kuzomele bazisebenzise ngokwamaqoqo mhlambe amahlanu nokuba nzima kakhulu kubafundi.