Injolozela enhlokweni yezwe neyeqembu elibusayo
UMengameli akagweme ukwedlulisela nokuvikelwa ngezinye izinhlaka zeqembu
Igama elithi ‘Mengameli’ lisho amandla athize. Lisho ukuthi loyo onikwe esobumengameli usuke amukeliwe njengozohola wonke umuntu, ahlonishwe ngoholo lwakhe. OnguMengameli wezwe usuke eyinhloko yombuso futhi enamandla athize. Phakathi kwalawo mandla kukhona awokuqasha nokuxosha ongqongqoshe.
Kusimangalisile uma uMengameli wezwe noweqembu elibusayo enza lokho esikuhumushe njengokwedlulisela amandla nalokho okulilungelo lakhe kwezinye izinhlaka ezingaphandle kukaHulumeni. Odabeni oluthinta yena naloyo amqashileyo uNks uSisulu uRamaphosa ubukeka engabaza noma esaba ukuthatha isinqumo.
Iqiniso lithi uMaXhamela (abakwaSisulu) umdelelile uMengameli, ukuthi bekufanele noma qha sekungolunye udaba. UMaSisulu uthi kithi sinoMengameli onamanga osho izinto ezingekho. Lokho nje kukodwa kumele kumkhiphe ngesango uMaSisulu. Lokhu kokuthi kuthiwe uzoqala ayiswe ekomitini leqembu lokuqondisa ubugwegwe kuyingozi ngoba kusho ukuthi uMengameli wethu akakwazi ukuzithathela izinqumo kunalokho ucasha ngeziphathimandla zeqembu lakhe ukwelusa abantu yena abaqashileyo.
Ngisho ezindabeni ezithinta yena sibona amalungu eqembu lakhe elwa enqamuka izandla emvikela uma eke wahlaselwa. Muva nje ilungu lePhalamende lithe kazovela esigcawini, kuse lelo lungu selixoshiwe kuleli komiti kwavela nezindaba zokuthi lizoqondiswa ubugwegwe yiqembu elibusayo. Konke lapho kakasho lutho umengameli. Umbuzo uthi uthule nje uyazi yini ngalokhu okushiwoyo ngaye? Nguye yena osasazela abanye ukuze avikeleke njengomengameli?
Kungenzeka ukuthi nembala umsulwa kepha indlela okwenzeka ngayo ingahle imenze abukeke kabana. Yikho sithi kalungise izinto zakhe nokuyobuyisa isithunzi sakhe nesehhovisi lakhe okumele njalo lihlale livela kithi zakhamuzi njengehhovisi elinegunya nelinamandla phezu kwethu.