Selufana nenkomo yomthimba udaba lwepulazi iPhala Phala
Umholi we-Economic Freedom Fighters (EFF), uJulius Malema, usexwayise ngokuwohloka kwezikhungo zikahulumeni uma kuza ekuphenduleni kosopolitiki.
Ufunge wagomela ukuthi uzophendula uMengameli uCyril Ramaphosa ngodaba lwePhala Phala. Lowo owayenguMqondisi Wezokuphepha KoMbuso u-Arthur Fraser wafaka isikhalazo ngoRamaphosa ekuqaleni kwalo nyaka ethi uMengameli uzame ukufihla ukwebiwa kwezigidi zamaDollar aseMelika epulazini lakhe eliseLimpopo.
UMalema ubevala umhlangano wesithathu wesifundazwe waleli qembu eGauteng. Kule ngqungquthela kuphume uNkululeko Dunga njengoSihlalo waseGauteng. “Ibhange eliyisiqiwu alikwazi ukusitshela, abakwaSARS abakwazi ukusitshela, iNPA ayikwazi ukusitshela, oklebe abakwazi ukusitshela futhi uma izikhungo zikahulumeni zingakwazi ukuchaza ukuthi kwenzekeni lokhu kuyisiqinisekiso sokuthi siphethwe umgulukudu. sesiphenduke isimo semigulukudu.
Zisebenza kanjalo izigebengu, zintshontsha izimpahla ezintshontshiwe ngomunye umgulukudu lowo mgulukudu uzofuna wena ngaphandle kwamaphoyisa. wakwenza lokho,” kusho uDunga.
IForum For Service Delivery isabise ngokuya eNkantolo yoMthethosisekelo uma umbiko wophenyo lwepulazi iPhala Phala ungakhishwa maduze.
IForum ibiphakathi kwamalungu aphikisayo amashele emahhovisi oMvikeli woMphakathi ePitoli.
Ilungu lalenhlangano uMotswaledi Rankapole lithi, “Njenge-F4SD esizokwenza ukuthi, sinethimba lethu lezomthetho. Uma umbiko ungakhishwa zingakapheli izinsuku ezingu-7, sizobonisana nethimba lethu lezomthetho ukuze siphonsele inselelo umvikeli womphakathi ukuthi akhiphe lo mbiko enkantolo. Sizofika nasenkantolo yomthethosisekelo uma umvikeli womphakathi engakawukhiphi umbiko. Njenge-F4SD sicace bha, sifuna ukwazi ukuthi kwenzekeni epulazini iPhala Phala. Umengameli ungumengameli waseNingizimu Afrika, ungumengameli wezwe lethu, kumele simphendule.”