Ukumpimpa kwaqala ukutshalwa amaNgisi ezinganeni zaboHlanga
Kunento engayiqaphela ngowe-1965 kuya kowe-1989 sengibona, nengisayiqaphela kulenkathi kodwa engasenzeki, aboHlanga abangasayenzi njengasemandulo ngikazalwa ngowe-1879, zizine enyangeni uNtulikazi, elikaMthaniya nezinye izifundazwe zisaphethwe ngaboHlanga. Sengibona manje ukuthi kwakuyimimoya yobunhloli, yokuceba nokucebana kwabantu abamnyama noma kwaboHlanga baseNingizimu Afrika. Ngizothanda ukuyibiza ngokuthi babeyizimpimpi, ulimi olwejwayelekile.
Abanye sebenza sengathi abakwazi lokhu, sebebheca uhulumeni waseNingizimu Afrika ngeze leze kwenye yezinkonondo, siyazi akenzi kahle. Asisenayo imimoya yobunhloli, yokumpimpa, ngamanye amazwi kuzokonakala izinto kubukwa kungashiwo lutho, bese siyakhala, sibe sikhuluma ekusithekeni. Abanye bethu bayabazi abaphula umthetho, siphila nabo.
Babenemimoya yokumpimpana emaNgisini, yokuba izinhloli zamaNgisi esaphethe iNingizimu Afrika kuqala, kusukela efika eKapa nakwelikaMthaniya iNdlovukazi ngowe-1824. Baqhubeka aboHlanga nemimoya yokumpimpana, izwe seliphethwe ngamaBhunu kusukela kowe-1948 kuze kufike kowe-1994. Kafushane aboHlanga babempimpa kuthi qekelele ngenkathi kamengameli uVerwoerd, uVorster, uBotha, noDe Klerk.
Ngibalula ngaboHlanga besampimpa bengaphoqwangwa ngabamhlophe ababesaphethe izwe. Le nto esingasayenzi manje singaboHlanga izwe selaphathiswa omengameli boHlanga. Asisampimpi kuthi qekelele sesakha umkhanya ngisho ithuba lokumpimpa lisivumela. Sithi amaphoyisa azozitshela izigebengu noma azobatshela esibampimpile.
Kodwa.siphawula ezindaweni ezehlukene ngamaphoyisa, ukuthi ayazitshela izigebengu. Ngikhuluma nje kwakunamaphoyisa axoshwa ngenxa yokungaziphathi kahle okuhambisana nobugebengu emsebenzini phakathi kowe-1965 nowe-1989.
Wonke amaphoyisa ngokwehlukana ayebatshela abantu ababempimpiwe, nangenkathi yamaphoyisa akwaMasipala okwakuthiwa amaBlackJack. Ayefika ezindlini zabantu, emalokishini aboHlanga, iSoweto, iSobantu eMngungundlovu, iKlaarwater (eMangangeni) eManrianhill, iMpumalanga eHammersdale, iHambanathi Othongathi, KwaMakhutha, iLamontville, iChesterville, KwaMashu, emahostela ezophenya,abophe isihlobo sakini esasivakashile, ningayilandanga incwadi yokuthi sasizohlala izinsuku.
Amaphoyisa ayethi ayethunywe ngumakhelwane usibanibani, wona ayengezona izangoma. Kanjalo namaphoyisa okwakuSouth African Police ngaphambi kweminyaka yowe-1965 kuya kowe-1989.
Ngikhuluma ngamabhasi esenganyelwe nguMasipala usabizwa ngoKopeletsheni ngeminyaka ebalulwe ngenhla, ukuthi kwakunomklomelo wemali omkhulu kabi, owawubhale ngaphakathi emabhasini ngoyompimpa ocekele phansi amabhasi.
Ngamanye amazwi noma ngubani wayezethwesa, okwangungenadosi kwakuzethwesa ijoka lokumpimpa izimo, izinto, abantu uma ebona ukuthi kwakungalungile ezweni noma kwakuzokhinyabeza yena, umphakathi, izwe ayelakheleyo noma ayehlala kulona kanye nokunye.
AmaNgisi ukumpimpana akutshala kwaboHlanga kusukela kwababebadala, kwababengabasebuKhosini, kwababeyizinduna, kwababengabamnuzane. Kuyaziwa ukuthi abanye babo ngokwezibongo zabo, baze babekwa kwathiwa sebengamaKhosi ayesebusa izwe ngenkathi yeNgonyama uCetshwayo, emva kokuba esebeyinqobile, zizine kuNtulikazi kowe-1879, aze eshisa nesigodlo seNgonyama, Olundi.
Ukumpimpa amaNigisi aqale ukukutshala ezinganeni zaboHlanga ezikoleni zemfundo yasezimishini ayesezisungulile. Kwakungalenkathi abafundi babempimpa, ngokubabhala phansi ebhukwini amagama abanye ababesuke bekhulume izilimi zabo zebele ngesikhathi sekhefu.
Kwaba nabanye boHlanga bezinye izilimi, ababesetshenziswa ngabamhlophe, ukumpimpa abanye, uBukhosi babanye boHlanga, ukuwalekelela ekulweni nabanye boHlanga nezinye iziNgonyama zaboHlanga. Lezozizwe zaklonyeliswa ngokuba zinikwe amazwe ukuba ziwabuse ngenkathi i-Afrika sebeyidwengula, sebeyihlukanisa phakathi abamhlophe base-Europe kuze kube manje isahlukene i-Afrika.
Ngilapha ekutheni thina aboHlanga,sesilibala ukukhuluma ekusithekeni ngezinto abanye bethu esizaziyo ukuthi zazivele zenzeka izwe lisaphethwe ngabamhlophe. Ithina esingumphakathi waboHlanga esingasampimpi njengoba sasimpimpa izwe lisabuswa ngabamhlophe ngokwehlukana kwabo.
Esikhundleni ngabe sithi; Kwakungadlangile ngalendlela ubugebengu, ukugcwala kwabantu emadolobheni okuzale ukungcola kwamadolobha. Empeleni kuningi okungekuhle sekuwuhulumeni ophathiswe aboHlanga.
Bese sithi nababheke ukugcinwa komthetho babazi ukuthi wawukhona umphakathi owawuzobampimpa ebelungwini, kuphele umsebenzi.
Kuyaye kudabukise kabi ukuzwa owoHlanga ombonayo ukuthi wasewavulile kakhulu amehlo ngeminyaka yowe1965 kuya kowe-1988, esehlanekezela,edidisa umlando awazi kahle, awuphilayo nawubona ngamehlo.
Engabe sibokubalula futhi singakuzibi abanye bethu ukuthi aboHlanga babesalawula umthetho wangowe-1923 wokuphatha kwamapasi ngaboHlanga nowokuvimba ukuthutheleka