Ukholelwa ekutheni iseneqhaza elimqoka ezweni iDenel
Isikhulu sesikhashana senkampani yezokuvikela iDenel, uMichael Kgobe, uthi lenkampani iyakwazi ukumelana nezimo futhi inamandla okuqamba izinto ezintsha ukuze ikwazi ukuhambisana nesikhathi sesimanje.
Ekhuluma esithangamini nabezindaba embukisweni weAfrica Aerospace and Defense eWaterkloof Air Force Base ePitoli, uKgobe uthe iDenel isibuyile njengenkampani emqoka embonini yezokuvikela. Ingase ibe sesimweni esihlukile futhi ibe nezinhlaka ezihlukene, kodwa ingqikithi yenkampani izosala.
Ugcizelele ukuthi iDenel iyinkampani kazwelonke enendima ebalulekile ekuqinisekiseni ukuzimela. Yasungulwa ngowe-1992, lapho izigaba zokukhiqiza zihlukaniswa ne-Armscor. I-Armscor yabe isiba yi-ejensi yokuthengwa kwempahla yoMbutho Wezokuvikela Kazwelonke waseNingizimu Afrika (iSANDF).
UKgobe uthe nakuba kungenakuphikwa ukuthi iDenel isiphenduke insakavukela umchilo wesidwaba kulabo abafuna ukugwamanda umbuso nempahla yawo kodwa lokhu akusho ukuphela inkampani.
Ukuqinisa lokhu, uthe kunezici ezine ezihilelekile: izinga eliphezulu lomkhiqizo, ububanzi nezinga lenkonzo enikezwa amakhasimende, izinga langaphakathi labasebenzi kanye nokwesekwa kukahulumeni.
Uthe okuningi kwalokhu kubambisana kusinda ezikhathini ezinzima, futhi izisekelo zokusebenzisana esikhathini esizayo zisekhona.
Ukwesekwa nguhulumeni kugcizelelwe ukuba khona kukaNgqongqoshe Wezamabhizinisi Kahulumeni uMnu uPravin Gordhan esithangamini.
Ugcizelele ukuthi iDenel isesigabeni sokusimamisa, ukugcina, ukukhula kanye nokusungula izinto ezintsha. Isikhulu esiphezulu sezokuhlela kabusha uRiaz Saloojee, owaqokwa kulesi sikhundla cishe ezinyangeni ezintathu ezedlule, ukugcizelele ukuthi ngokungenelela okwenziwayo kanye nokwesekwa kukahulumeni manje sekukhona umhlahlandlela oya ekusaseni elisimeme.
Ugcizelele ukubaluleka kweDenel, wathi isenomkhiqizo ongakholakali futhi kusenemibuzo eminingi mayelana nokusebenzisana ngoba inkampani isabalulekile emakethe.
Uthe iDenel ibaluleke kakhulu ezweni ngoba ihlinzeka ngokuzimela kwezwe kanye nokuphepha kokuhlinzekwa kwezidingo. Uveze ukuthi iDenel inamakhono abucayi, wathi awekho amazwe amaningi emhlabeni anamakhono ezikhali njengeNingizimu Afrika, kanye nekhono lezinhlelo ezididiyelwe ezihlanganisa uhlelo lokuvikela emoyeni olusekelwe phansi noma amakhono amaGBAD ombutho wezokuvikela kazwelonke.
USaloojee uthe: “Uma sihluleka ukuthola ikusasa leDenel, siyehluleka ukuthola ikusasa lale mboni nobukhosi bezwe lethu kanye nokwesekwa kombutho wezokuvikela wezwe.”
IDenel isanda kumemezela uhlelo oluphelele lokuhlehlisa nokugxila kabusha kokusebenza nokubuyisela inkampani enzuzweni. Kusukela ekubeni inkampani engaphansi kukahulumeni ezinzile, ngemuva kuka-2016 inkampani yaqala ukubonisa izimpawu zokucindezeleka ngokwezimali ngokwengxenye ngenxa yokubanjwa kombuso, ukungaphathwa kahle kanye nokungaqhubi kahle kwephrojekthi kanye nokuphathwa kwenkontileka.
Ayikwazanga futhi ukukhokhela amaholo ngokugcwele cishe iminyaka emibili - nokho-ke, abasebenzi bagcine bekhokhelwe izimali ebezisilele ngoNcwaba.
I-Aerospace and Defense Expo (AAD) ibuyile ngemuva kwekhefu leminyaka emine ngenxa yobhubhane lwe-COVID. UNgqongqoshe Wezokuvikela uThandi Modise uvule umbukiso wezokuvikela wezinsuku ezintathu ngomhlaka-20 Septhemba.
I-AAD 2022 izophetha ngohlelo lwasemoyeni lomphakathi ngoMgqibelo nangeSonto.