UJoko ufuna ukungawulahli umgqigqo
Kuningi akubhekile uma enqoba empini yangempelasonto okukhona nokulwa kuWBF World ngonyaka ozayo nguSabelo Maphumulo
UGcina “Double G” Makhoba, ufuna ukuqhubeka nerekhodi lakhe elihle uma ebhekene noMusawenkosi Ndwandwe.
Lamabhokisa azotholana phezulu ngeSonto eCity Hall, eMgungundlovu, ezimpini eziqhathwe iMvelo Boxing Promotions kaNomvelo MagcabaShezi.
Lempi izobe ingezinye ezizobe zibhulela amazolo impi yosuku ezobe iphakathi kukaMoruti “Babyface” Mthalane noDiomel Diocas wasePhilippines, abazoqhuthana kweyomhlaba esisindweni seFlyweight.
UMakhoba ocijwa nguMtuseni Dube, eSibongile Boxing Gym, ngakubo eDundee, usemhlule kabili uNdwandwe. Ngonyaka wezi-2020 wamuphuca ibhande leWBF Junior Bantamweight, nazobe elivikela okwesibili okukuqala walivikela kuThulani Gumede amshaya ngomcacamezelo womlalisaphansi kweyabe iseThekwini nyakenye. Ngokomthetho uMakhoba bekumele abhekane noSiyabonga Mpangele, kodwa wavele waquleka ezilolonga kwaphoqedeleka ukuthi kube uNdwandwe ozoba seringini.
“Ngomhla ziyi-7 kuMfumfu kuzobe kuwusuku lwami lokuzalwa, sengingasho ukuthi isipho senyanga yokuzalwa kwami uyena uNdwandwe. Akukhona ukuthi ngimthatha kancane kodwa, ngibona ezoqhubeka nokuba isinkwa sami semihla ngemihla. Sekuphele izinyanga ezimbili ngilungisela le mpi. Uma engajimile uNdwandwe uzongena ehlazweni ngoba ngizoqeda ngaye singakafiki emizuliswaneni
eyishumi esibekelwe yona,” kubeka uMakhoba.
zobe ehlanganisa iminyaka engama-29, mhla ziyi-7, ugcine ukuba seringini ngawo uMfumfu nyakenye eshaya u-Enathi Stelle kweyokungcweka.
Lo somankomane uveze ukuthi uma enqoba kuNdwandwe, inkampani ephromotha izimpi zakhe, iHlula Dladla Boxing Promotions imthembise ukumtholela impi yeWBF World ngonyaka ozayo.
UNdwandwe yena uza kulempe ugcine ukuba seringini ngoNhlangulana nonyaka nalapho ahlulwa khona uMxolisi Sibiya. Esibhakeleni esikhokhelwayo uselwe izimpi ezili-11, unqobe eziyisikhombisa wahlulwa kwezine.
Ebuzwa elaboHlanga uMakhoba ngokuthi kusho ukuthini kuyena ukubhulela amazolo uMthalane uthe: “Lokhu kumina ngikuthatha njengesibusiso esikhulu, into engingasoze ngayikhohlwa emlandweni. UMthalane umuntu engikhule kukhulunywa ngaye kakhulu ngazibonela mina elwa, walimela elakuleli amahlandla amaningi. Ukulwa eringini ezobe ilwa yena kusho lukhulu kakhulu lokho kumina” kusho uMakhoba osebenzisa isandla sokudla.
Waqala ukudlala lo mdlalo ngonyaka wezi-2002, wangena esibhakeleni esikhokhelayo ngonyaka wezi-2017. Uselwe izimpi eziyisishiyagalolunye, unqobe eziyisikhombisa, wahlulwa kowodwa wadlala ngokulingana kowodwa.
UMakhoba uphinde wabonga uNomvelo ngokuthi akwazi ukuqhatha izimpi, akholelwa ukuthi zizobe ziseqophelweni eliphezulu.
ElaboHlanga liphinde lakhulula noNomvelo, nocacisile ukuthi iMvelo Boxing Promotions izokwakha ompetha bomhlaba ayizile ukuzodlala. “Kuzoba izimpi eziseqopheleni eliphezulu kakhulu lezi, abantu ngiyafisa begcwalise iCity Hall. Kusho lukhulu kumina ukuthi ngingenaso isikhathi esingakanani ngasungula iMvelo Boxing Promotions kodwa sengikwazi ukuqhatha uMthalane ohlonishwayo kulo mdlalo. Ngesikhathi ngisiyisungula inhloso kwaba ukuthi lapho engihamba khona ngishiye umaka ongafani nowamuntu, ngiphinde nginikeze abashayisibhakela abahlukahlukene ithuba lokuzibonakalisa” usho kanje.
Ubonge uMnyango wezeMidlalo uBuciko namaSiko oholwa umphathiswa u-Amanda Bani-Mapena, iKZN Sport Confederation engamelwe uThami Mchunu, iBP Catoridge, Robs Motors, iFestival beads, iMagma Security, iHlula Dladla Promotions kaHlula “Mhloli Wami” Dladla, iSABC sport noMsunduzi Municipality. Okuyibo abenze lo mqhudelwano wahleleka ngempumelelo.
Kwezinye izimpi ezizobe zibhulelela amazolo ekaMthalane, kukhona ekaBrandon Naude noKhanyisani Mbomazi kweyeJunior Lightweight KZN, uMduduzi Mzimela noRomeo Makwakwa kweyeJunior Feather, u-Andile Mntungwa noJackson Masamba kweyeSuper Middle Weight 6, uNtethelelo Magcaba noSphelele Dubazane kwiBantam Weight, uNtsqko Mayimba noTrinity Mhlongo kweyMiddle Weight, bese kuba eyabesifazane okuzotholana kuyona uNoxolo Mkhasibe noWendy Gcadu kweyeSuper Middleweight weight.