Umasipala wakhele ugogo ongenabani indlu
UMNDENI wakwaNtshangase esigodini saseNsimbakazi kwesakwaBiyela Obuka ujabulise okwezingane ngenkathi iMeya kaMasipala waseMthonjaneni, ukhansela Sbonginkosi Biyela edlulisa izikhiye zendlu kanokusho abayakhele lomndeni.
Lendlu eyakhiwe amakhansela alomasipala esizwa osomabhizinisi abazimele idluliselwe kuNkk Busiswe Ntshangase ohlala nendodana yakhe ephila nokukhubazeka nomzukulu.
Umzukulu uhlulekile ukuzibamba zehla mi izinyembezi ngesikhathi bemukeliswa izikhiye zalendlu njengoba ebecabanga usizi ebebephuma kulo behlala endlini engekho esinweni esigculisayo. UNkk Ntshangase ubonge kakhulu kuMeya nozakwabo ngokubakhipha enkingeni njengoba bekucacela noma ubani ukuthi indlu yodaka ebebehlala kuyo ibingawa noma inini.
‘Ngeswele amazwi okubonga kuMhlonishwa ubaba uMeya uMenziwa nethimba lonke asebenza nalo ngalesisipho esingaka sikakhisimuzi.
‘Bese sizinikele ukuthi sesiyokuba ukudla kwezimvula namakhaza kulenzizindlwana ebesihlala kuzona. Bese sizinikele nokuthi ziwele phezu kwethu njengoba besekucacela noba ngubani ukuthi zingawa noma inini.’
‘Mhla uMeya efika lapha noKhansela uZincume nethimba abasebenza nalo sazitshela ukuthi bayazikhankasela nje uma bethi bazosakhela indlu. Ithemba laqala ukubuya sesibona kufika izimpahla zokwakha, ngempela waqala umsebenzi. Namuhla nathi sizizwa sibuyelwa isithunzi sokuba ngabantu njengoba sizolala endlini kanokusho,’ kuzibongela uNkk Ntshangase.
IMeya uBiyela ube esebonga omakhelwane bakwaNtshangase ngokwesekela kwawo lomndeni.
‘Ngithanda ukubonga wonke amakhansela, abasebenzi bakamasipala nosomabhizinisi esithena masishaya indesheni kubo sicela ukuba baselekele sisize umndeni wakwaNtshangase bavele basukumela phezulu futhi nomphakathi walapha eNsimbakazi ngokusondela usize kamama,’ kubeka uBiyela.
Lendlu yedluliselwe kulomndeni nefenisha yasendlini, ukudla nesihlalo esinamasondo esizosetshenziswa indodana kagogo engakwazi ukuzihambela nokunye okuningi.
Senior citizen thanks Mthonjaneni Municipality for his new house